E tukuni ena nodra ivola na dauveivakasucumi, “ena sega vakadua ni tautauvata na wai ni sucu nei tina kei na medra sucu volitaki na gone. Dua na vuna e ganita ga kina na gone na wai ni sucu nei tinana, ya ni veiveisau tiko na yago i tina me salavata kei na ka e gadreva o luvena.

 Vakasamataka mada: Na gauna kece e gunu sucu tiko kina o gone vei tinana, ena veisau tiko na wai ni sucu me yacova ni sa sucu oti. Ni qai tekivu, ena levu na protein, vitamin, mineral, kei na wai. Ia oti ya ena levu na uro lai vakavuna me mamau vinaka o luvena. Ena veisau tale ga na wai ni sucu me salavata na yabaki nei gone kei na gauna.

 Eso na hormone me vaka na melatonin e tiko ena wai ni sucu e dau levu ena bogi, ia eso tale na hormone e dau levu ena siga. Na veiveisau ni hormone qori, e rawa ni vakavuna me moce se yadra o gone ena loma ni dua na siga.

 Oti e vica na siga nona vakasucu e dua na tina, ena tiko e wai ni sucuna na sucu sosoko dromodromo e vakatokai na colostrum. Qori e vakarawarawataka na qaqi ni kakana e kete i gone, e levu tale ga kina na veika bulabula ena yaga vua. Ke lailai mada ga na ka e kania o gone ena yaga tiko ga vua na colostrum. E tiko ena colostrum e levu na antibodies e taqomaki gone mai na tauvimate. Kena ikuri, e vukea tale ga nona valelailai qai vakasavasavataka na gacagaca e dau qaqia na kena.

 Mera kua gona ni leqataka e dua na ka na tina, ke drua mada ga na gone ena veirauti tiko ga na wai ni sucu e vakarautaka na yagona me ganiti rau na luvena.

 Cava o nanuma? E buli se bula vakaidewadewa na vakatubuqoroqoro ni ka e rawa ni cakava na wai ni sucu nei tina?