Rawa ni Vakacegui Au na iVolatabu?
Kena isau vakaivolatabu
Io. (Roma 15:4) Raica mada eso na tikinivolatabu sa vakacegui ira e levu era sotava na ituvaki dredre kei na yalolailai.
Ena ulutaga qo
iTuvaki dredre
Same 23:4: “Keu lakova na buca butobuto loaloa, au sega ni rerevaka na ca, ni oni tiko vata kei au.”
Kena ibalebale: Ke o sotava na ituvaki dredre, o rawa ni vosota ni o masu vua na Kalou qai nuitaka nona Vosa me dusimaki iko.
Filipai 4:13: “Au rawata na ka kece ena vuku i koya e vakaukauataki au.”
Kena ibalebale: Ena vakaukauataki iko na Kalou mo vosota na ituvaki cava ga.
Takali e dua o lomana
Dauvunau 9:10: “Ni sega na cakacaka se na vakasama se na kilaka se na vuku ena iBulubulu o lako tiko kina.”
Kena ibalebale: Era sega ni vakararawataki tu na mate, sega ni rawa tale ga nira vakaleqai keda. Era sega ni vakila e dua na ka.
Cakacaka 24:15: ‘Era na vakaturi.’
Kena ibalebale: Na Kalou ena vakabulai ira tale na wekada lomani era sa takali.
Ora vakasivia na lomamu
Same 86:5: “Ni o kemuni Jiova, a oni vinaka qai tu vakarau moni veivosoti, e vuabale na dei ni nomuni loloma vei ira kece na kaci yani vei kemuni.”
Kena ibalebale: Na Kalou ena vosoti ira era veivutunitaka nodra cala makawa. Era vakadeitaka tale ga nira na sega tale ni cakava.
Same 103:12: “Me vaka na yawa ni icabecabe ni siga mai na idromudromu ni siga, sa biuta vakayawa vei keda o koya na noda cala.”
Kena ibalebale: Ni veivosoti na Kalou, ena kauta laivi vakadua na noda ivalavala ca. Ena sega ni weroka tiko na noda cala me beitaki se totogitaki keda kina.
Rarawa
Same 31:7: “Oni sa raica na noqu rarawa, oni kila tu na levu ni noqu leqa.”
Kena ibalebale: E kila vinaka na Kalou na rarawa kece o sotava. E kila na ka e tu e lomamu ke ra sega mada ga ni kila qori eso tale.
Same 34:18: “E voleka o Jiova vei ira sa ramusu na lomadra, e vakabulai ira sa dasila na yalodra.”
Kena ibalebale: E yalataka na Kalou ni na tokoni iko ke o rarawa. Ena vakaukauataki iko mo vosota na nomu rarawa.
Tauvimate
Same 41:3: “Ena vakacegui koya o Jiova ena nona idavodavo ni tauvimate.”
Kena ibalebale: Na Kalou ena solia vei iko na lomavakacegu mo vosota kina na tauvimate bibi. Ena vakaukauataki iko, vukei iko mo vosota, ena solia tale ga vei iko na vuku mo vakatulewa kina vakayalomatua.
Aisea 33:24: “Ena sega ni kaya e dua na lewenivanua: “Au tauvimate.’”
Kena ibalebale: E yalataka na Kalou na gauna eda na bulabula vinaka kina.
Lomaocaoca kei na nuiqawaqawa
Same 94:19: “Ni bikai au na nuiqawaqawa, oni vakacegui au qai vakayaloqaqataki au.”
Kena ibalebale: Nida lomaocaoca, ena vakacegui keda na Kalou ke da kerea na nona veivuke.
1 Pita 5:7: “Moni biuta vua na nomuni lomaocaoca kece, ni kauaitaki kemuni o koya.”
Kena ibalebale: E kauaitaka na Kalou na rarawa eda sotava. E uqeti keda meda tukuna vua ena masu na ka eda lomaleqataka.
iValu
Same 46:9: “Ena mai vakaotia o koya na ivalu e vuravura taucoko.”
Kena ibalebale: Ena vakaotia kece na ivalu na Matanitu ni Kalou.
Same 37:11, 29: “Era na taukena na vuravura na yalomalumalumu, era na kunea na marau vakasakiti ena levu ni vakacegu. . . . O ira na yalododonu era na taukena na vuravura, era na qai bula tawamudu kina.”
Kena ibalebale: Era na vakila na tamata vinaka na vakacegu e vuravura me tawamudu.
Leqataki ni gauna se bera mai
Jeremaia 29:11: “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’”
Kena ibalebale: Na Kalou e vakadeitaka vei ira na nona tamata e dua na gauna totoka e se bera mai.
Vakatakila 21:4: “Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”
Kena ibalebale: Na Kalou e yalataka ni na vakaotia vakadua na veika ca kece eda raica qai sotava tu nikua.
a Na yaca ni Kalou o Jiova. (Same 83:18) Raica na ulutaga “O Cei o Jiova?”
Rawa ni o Wilika Tale ga
NA VALE NI VAKATAWA
Yaga ni Nona Kauaitaki Iko na Kalou
Na iVolatabu ena vaqaqacotaka noda vakabauta na yalayala i Jiova me baleta na gauna se bera mai.
SAUMI NA TARO VAKAIVOLATABU
Au na Kunea i Vei na iNuinui?
Ena rawa ni yaga na iVolatabu ena nomu bula ena gauna qo, o na nuidei tale ga ena veigauna se bera mai.
ESO TALE NA ULUTAGA
Nodra Vakacegui na Lolosi
Ni mate e dua eda dau lomana, de dua eda nanuma ni sega ni dua e kila na mosi eda vakila. Ia e kila vinaka tu qori na Kalou, e vinakata tale ga me vukei iko.
NA VALE NI VAKATAWA
Ni Dredre Sara ga na Bula
E rawa ni marautaki na bula ke sotavi mada ga na ituvaki dredre.
ESSENTIAL BIBLE TEACHINGS
Na cava e Vakatara Tiko Kina na Kalou na Rarawa?
Levu era vakataroga na cava sa rui levu kina na veicati kei na rarawa. E tiko ena iVolatabu na kena isau veivakacegui.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.