Io. Na iVolatabu ena vukei keda meda kua ni rarawataka vakasivia noda cala. (Same 32:1-5) Nida veivutunitaka noda cala ena vosoti keda na Kalou qai vukei keda. (Same 86:5) E kaya na iVolatabu ni vinaka tale ga meda rarawataka noda cala. Qori ena vukei keda meda vakadodonutaka noda sala, qai kua ni vakaruataka noda cala. (Same 51:17; Vosa Vakaibalebale 14:9) Ia e vakasalataki keda na iVolatabu me kua ni sivia noda rarawataka noda cala, eda na nanuma kina nida tawayaga qai sega ni ganiti keda na loloma ni Kalou. Kuria oya, eda na rawa ni lai “soro koso ena levu ni noda rarawa.”—2 Korinica 2:7, Contemporary English Version.

•  Cava eda rarawataka kina noda cala?

•  Cava au rawa ni cakava?

•  Tikinivolatabu nida rarawataka noda cala kei na veivosoti

 E vica na vuna eda dau rarawataka kina noda cala. Eda rairai vakararawataka e dua eda lomana, se da sega ni rawata na veika dodonu meda cakava. Eso na gauna, eda rarawataka eso na cala eda sega ni cakava. Kena ivakaraitaki, ke sivia na ka eda namaka meda rawata eda lai rarawataka kina na veika kece eda lekata. E uqeti keda gona na iVolatabu me kua ni sivia na ka eda namaka me baleti keda.​—Dauvunau 7:16.

 Kua ni rarawataka vakasivia nomu cala, ia mo cakava eso na ka mo vakavinakataka kina na kemu ituvaki. Cava o rawa ni cakava?

•   Vakatusa nomu cala. Kerea vei Jiova ena masu a me vosoti iko. (Same 38:18; Luke 11:4) O na vakadeitaka ni rogoci iko ke o veivutunitaka dina nomu cala, qai saga vakaukaua mo kua ni cakava tale. (2 Veigauna 33:13; Same 34:18) E kila vinaka na Kalou na ka e tu lomada, era sega ni raica rawa qori na tamata. Ke raica nida saga meda veisautaka noda ivakarau ni bula, ena vosota noda ivalavala ca “ni yalodina o koya, e yalododonu tale ga.”—1 Joni 1:9; Vosa Vakaibalebale 28:13.

   Ke o vakararawataka e dua, ena vinakati mo tukuna vakadodonu ni o cala qai kere veivosoti. E sega ni rawarawa, ena vinakati kina mo yaloqaqa qai yalomalumalumu. Ia e rua na ka ena yaco ke o kere veivosoti mai vu ni lomamu. Ena taluva kina e dua na icolacola bibi, o na uqeta tale ga na veiyaloni.—Maciu 3:8; 5:23, 24.

•   Vakasamataka na tikinivolatabu me baleta nona yalololoma na Kalou. Kena ivakaraitaki, e kaya na 1 Joni 3:19, 20 ni rawa ni “beitaki keda vakasivia na lomada”—ya noda namaka vakasivia na ka meda cakava, qai nanuma ni sega ni ganiti keda nona loloma na Kalou. Ia e tukuni tale ga ena tikinivolatabu qori ni “uasivia na lomada na Kalou.” Ena sala cava? E kila na ka kece me baleti keda, e kila vinaka na ivakarau ni lomada kei na veika eda malumalumu kina. E kila nida sucu ivalavala ca, e rawarawa nida cala. b (Same 51:5) Ena ciqomi ira gona na veivutunitaka dina na nodra cala.—Same 32:5.

•   Kua ni vakasamataka tiko ga na veika sa oti. E tu ena iVolatabu na kedra italanoa na tagane kei na yalewa era valavala ca, ia era veisautaka nodra ivakarau ni bula. Kena ivakaraitaki, o Saula mai Tarisu e qai kilai me yapositolo o Paula. Me vaka ni dua na Farisi, e dau tusaqati ira vakaukaua na imuri i Jisu. (Cakacaka 8:3; 9:1, 2, 11) Ia na gauna e kila kina ni tusaqata tiko na Kalou kei na Mesaia, e veivutuni qai veisautaka na ivakarau ni nona bula. E mai dua tale ga na lotu vaKarisito ivakaraitaki vinaka. E rarawataka vakalevu o Paula nona ivalavala e liu, ia e guilecava na veika sa oti. Ni kila nona yalololoma vua na Kalou, e dua kina na daukaulotu gugumatua qai nuitaka na inuinui ni bula tawamudu.—Filipai 3:13, 14.

 Jeremaia 31:34: “Niu na vosota na nodra cala, au na sega tale ni nanuma na nodra ivalavala ca.”

 Kena ibalebale: Ni vosoti keda na Kalou, ena guilecava na noda cala. E uasivi na nona yalololoma