RA TAROGA NA ITABAGONE
Meu Papitaiso?—Wase 3: Cava e Tarova Meu Kua ni Papitaiso?
O leqataka nomu yalataki iko vei Jiova kei na nomu papitaiso? E rawa ni vukei iko na ulutaga qo.
Ena ulutaga qo
Vakacava keu cala bibi ni oti noqu papitaiso?
Cava e va kina qori nomu rai?: De dua o kila e dua a cala bibi, sa biu tani tale ga mai na ivavakoso. (1 Korinica 5:11-13) O na rairai lomaleqataka de na yaco tale ga qori vei iko.
“Au rere niu vakasamataka na papitaiso, niu leqataka deu na cala bibi. Au vakasamataka tu ga na levu ni madua ena tarai rau noqu itubutubu.”—Rebekah.
Tikinivolatabu bibi: “Me biuta mada na nona itovo na tamata ca. . . Me lesu vei Jiova ni na lomani koya, vua na noda Kalou, ni na veivosoti vakalevu o koya.”—Aisea 55:7.
Vakasamataka vinaka: Dina nira biu tani mai na ivavakoso o ira na sega ni veivutunitaka na nodra cala. Ia o Jiova e tu vakarau me vosoti ira na yalomalumalumu mera veivutuni, ra qai ciqoma na nona veivakadodonutaki.—Same 103:13, 14; 2 Korinica 7:11.
Nanuma tiko o sega ni uasivi, ia o rawa ni vorata na veitemaki ena veivuke ni Kalou. (1 Korinica 10:13) Me kua ni dua e vakasaurarataki iko ena ka mo cakava. Qori e nomu vakatulewa sara ga.
“Au leqataka deu na cala bibi ni oti noqu papitaiso. Ia au qai vakasamataka ni cala keu sega ni papitaiso. Meu kua gona ni vakalaiva na noqu lomaleqataka na veika e se bera ni yaco, me tarova noqu vakatulewa nikua.”—Karen.
Bibi me nanumi: Me vakataki ira ga e levu na dauveiqaravi i Jiova, o rawa ni vorata na ivalavala ca bibi ke o vakatulewataka mo papitaiso.—Filipai 2:12.
Via kila eso tale na ka — Raica na ulutaga, “Au na Vorata Vakacava na Veitemaki?”
“Au leqataka na itavi au na lesi kina”
Cava e va kina qori nomu rai?: Rairai o kila eso na itabagone era toki vakayawa mai vei ira nodra vuvale kei na itokani, mera vakarabailevutaka nodra qaravi Jiova. De dua o na leqataka nodra nanuma eso tale mo cakava tale ga qori.
“Levu na itavi vakayalo ena qarava o koya e papitaiso. Ia eso era se sega ni makutu mera cakava qori, se de dua e sega ni vakatara na kedra ituvaki.”—Marie.
Tikinivolatabu bibi: “Me dikeva na tamata yadua na nona cakacaka, ena qai marau ga kina vakalevu, ena sega ni vakatauvatani koya kei na dua tale.”—Kalatia 6:4.
Vakasamataka vinaka: Kua ni vakatauvatani iko kei ira eso tale. Mo muria ga na ka e kaya na Marika 12:30: “Mo lomani Jiova na nomu Kalou ena lomamu taucoko.”
E dodonu gona mo qaravi Jiova ena lomamu taucoko. Ia mo kua ga ni cakava qori mo vakalomavinakataka kina e dua tale. Ni o lomani Jiova dina, o na solia nomu vinaka taucoko mo qaravi koya.
“E vakatulewa bibi na papitaiso, mo kua ga ni raica me vaka e dua na icolacola levu. Ke o digia vinaka nomu itokani, era na tokoni iko. Ena rawa ni vakamarautaki iko tale ga nomu sauva eso na isausau lalai. Ia o na sotava na leqa ke o sega ni papitaiso.”—Julia.
Bibi me nanumi: Mo dau vakavinavinakataka na nona lomani iko o Jiova. Qori ena uqeti iko mo solia vua na nomu vinaka kece.—1 Joni 4:19.
Via kila eso tale na ka — Raica na ulutaga, “Au Dau Nuitaki?”
“E sega ni ganiti au meu qaravi Jiova”
Cava e va kina qori nomu rai?: Eda ka somidi ni vakatauvatani kei Jiova na Turaga Cecere ni lomalagi kei vuravura! De dua o nanuma ni na sega ni kilai iko.
“Au leqataka niu mai veitokani ga kei Jiova ena vukudrau na noqu itubutubu rau iVakadinadina i Jiova. E sega ni vagolei au mai o Jiova.”—Natalie.
Tikinivolatabu bibi: “Ena sega ni lako mai vei au e dua ke sega ni vagolei koya mai o Tamaqu e talai au mai.”—Joni 6:44.
Vakasamataka vinaka: Na nomu via papitaiso, e vakaraitaka ni vagolei iko mai o Jiova mo drau veitokani voleka. Ciqoma na nona veisureti!
Mo nanuma tiko o Jiova ga e vakarautaka na ivakatagedegede vei ira era via veitokani voleka kei koya. E vakadeitaka nona Vosa ke o “toro voleka vua na Kalou. . .ena qai toro voleka mai vei iko o koya.”—Jemesa 4:8.
“Nomu kilai Jiova kei na nomu toro voleka vua, e vakaraitaka nona lomani iko. O Jiova e vakacala ke o nanuma ni sega ni ganiti iko mo qaravi koya, ena dau donu tu ga o koya.”—Selina.
Bibi me nanumi: Ke o sa rawata na ivakatagedegede mo papitaiso, kena ibalebale o sa rawa ni qaravi Jiova. Ni dodonu ga mo qaravi koya.—Vakatakila 4:11.
Via kila eso tale na ka — Raica na ulutaga, “Na Cava e Bibi Kina na Masu?”
Rawa ni o Wilika Tale ga
RA TAROGA NA ITABAGONE
Meu Papitaiso?—Na iBalebale ni Papitaiso
Ke o vakasamataka tiko mo papitaiso e dodonu mo kila mada i liu na kena ibalebale.
RA TAROGA NA ITABAGONE
Meu Papitaiso?—Wase 2: Meu Vakarautaki au Vakacava?
Dikeva na taro mo kila kina ke o sa rawa ni papitaiso.
SAUMI NA TARO VAKAIVOLATABU
Na Cava na Papitaiso?
Sala cava kei na gauna cava e dodonu me papitaiso kina e dua? Vakacava e kauta laivi na ivalavala ca na papitaiso? Na cava na kedrau duidui na papitaiso kei na nodra papitaisotaki na gone dramidrami?
