E tekivu ena icavacava ni ika19 ni senitiuri na neimami isoqosoqo. Ena gauna ya, era tekivu vulica vinaka na iVolatabu e dua na ilawalawa lailai era tiko mai Pittsburgh, Pennsylvania, e Merika. Era vakatauvatana na ka era vakavulica na veilotu kei na ka e vakavulica na iVolatabu. Mani tabaki na ka era vulica ena ivola, niusipepa, kei na mekesini sa kilai nikua me Vale ni Vakatawa—Kacivaka na Matanitu ni Kalou.

 E dua vei ira na lewe ni ilawalawa qori o Charles Taze Russell. E dina ni liutaka o Russell na cakacaka ni vuli vakaivolatabu qai imatai tale ga ni edita ni Vale ni Vakatawa, ia e sega ni tauyavutaka e dua na lotu vou. E nona inaki o Russell kei ira na Gonevuli ni iVolatabu, na yaca era kilai kina ena gauna ya, mera vakabibitaka na ivakavuvuli i Jisu Karisito ra qai muria nodra ivakarau ni sokalou na lotu vaKarisito ena imatai ni senitiuri. Me vaka ni tauyavutaka o Jisu na lotu vaKarisito, keimami raici koya me iliuliu ni neimami isoqosoqo.—Kolosa 1:18-20.