Na iLawalawa Dauvakatulewa e dua na ilawalawa lailai, ratou lewena na lotu vaKarisito matua qai tuvanaki ira na iVakadinadina i Jiova e vuravura raraba. E rua na ka e okati ena nodratou cakacaka:

•   Ratou qarava na kena vakarautaki na veidusimaki e yavutaki vakaivolatabu ena noda ivola, na soqoni, kei na koronivuli vakalou.​—Luke 12:42.

•   Ratou liutaka na nodra cakacaka na iVakadinadina i Jiova e veiyasa i vuravura ena kena tuvanaki na cakacaka vakaitalatala, kei na qaravi ni ka e cautaki yani.

 Ratou muria na iLawalawa Dauvakatulewa na nodratou ivakaraitaki ‘na yapositolo, kei na qase mai Jerusalemi’ ena imatai ni senitiuri. Ratou vakayacora eso na vakatulewa bibi ena vukudra na ivavakoso lotu vaKarisito lumuti. (Cakacaka 15:2) Me vakataki ratou ga na tagane yalodina qori, o ratou na lewe ni iLawalawa Dauvakatulewa ratou sega ni vakacolasau vei ira na mataveitacini. Ia ratou vakararavi ena veidusimaki ni iVolatabu, qai kila ni lesi Jisu Karisito na Kalou o Jiova me ulu ni ivavakoso.​—1 Korinica 11:3; Efeso 5:​23.

 Ratou lewe ni iLawalawa Dauvakatulewa o Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, kei Jeffrey Winder. Ratou veiqaravi tiko ena itikotiko liu e Warwick e Niu Yoka, mai Merika.

 E tauyavutaka na iLawalawa Dauvakatulewa e ono na komiti me qarava na noda cakacaka. Ratou veiqaravi tiko na lewe ni iLawalawa Dauvakatulewa ena dua se vica na komiti qori.

•   Komiti ni Kodineita: Qarava na veika vakalawa, kei na cakacaka ni vakacoko ni yaco na leqa tubukoso. E raica tale ga nodra vukei na iVakadinadina i Jiova ena gauna era tusaqati kina ena vuku ni nodra vakabauta, kei na so tale na ka e vinakati me qaravi totolo me baleti ira.

•   Komiti ni Lewe i Peceli: Qarava na veika me baleta na vuvale e Peceli.

•   Komiti ni Tabaivola: Tuvanaka na vakarautaki kei na vakau ni ivola vakaivolatabu, na taravaki ni vanua ni soqoni, ofisi ni vakadewa, kei na valenivolavola ni tabana.

•   Komiti ni Cakacaka: Tuvanaka na kena vunautaki na “itukutuku vinaka ni Matanitu ni Kalou.”​—Maciu 24:14.

•   Komiti ni Veivakavulici: Tuvanaka na vakarautaki ni veidusimaki vakayalo ena soqoni, koronivuli vakalou, katokatoni, kei na vidio.

•   Komiti ni Volavola: Tuvanaka na vakarautaki ni veidusimaki vakayalo ena kena e tabaki, kei na kena e biu ena noda website. E tuvanaka tale ga na cakacaka ni vakadewa

 Me ikuri ni cakacaka e qarava na ono na komiti, ratou dau bose vata na iLawalawa Dauvakatulewa ena veimacawa me ratou veivosakitaka na veika e gadreva na isoqosoqo. Ratou dau veivosakitaka tale ga ena bose qori na ka e kaya na iVolatabu, ratou qai vakalaiva me dusimaki ratou na yalo tabu me ratou rawa ni vakatulewa ena duavata.​—Cakacaka 15:25.

 Qo o ira na lotu vaKarisito nuitaki era dau veivuke ina iLawalawa Dauvakatulewa. (1 Korinica 4:2) E tu vei ira na vuku kei na kila mera qarava rawa kina na cakacaka era lesi kina, era dau bose vata tale ga ena veimacawa. Dina ni sega ni nodra itavi mera vakatulewa, ia e dau yaga vakalevu na nodra ivakasala kei na itukutuku era vakarautaka. Qori e vakayacori vinaka kina na ka e vakatulewataka na komiti, kilai vinaka kina na toso ni cakacaka, kei na ka e sa rawati. Era dau lesi tale ga mai vua na iLawalawa Dauvakatulewa mera sikovi ira na tacida e veiyasa i vuravura, mera vunau ena bose vakayabaki, se tuvaitutu e Kiliati.