O Sowbhagya e dua na marama ni Idia, e takali o watina ena 2005. Dua na ka nona qaravi Sowbhagya vinaka mai kei na luvedrau yalewa yabaki tolu, o Meghana. Ia qo e dredre sara ga vei Sowbhagya me vaqara na ka me rau bula kina vakaveitinani.

 E ca sara nira sega ni taleitaki Sowbhagya eso tale. O ira mada ga na wekana era okati rau vakaveitinani me rau daukerekere, ra qai dau kaya ni rau kuria tale na nodra leqa. Tekivu lai lotu sara o Sowbhagya ni via vakila na vakacegu, ia era raici koya na lewenilotu me lolovira baleta ni dravudravua. Oti e mani vaqara cakacaka sara me rawa ni qaravi rau vakailavo. Ia e dreve nona sasaga qai sega ni kunea rawa e dua na cakacaka.

 E kaya o Sowbhagya: “Au yalolailai sara ga, au mani nanuma meu vakamatei au. Ia au qai vakasamataka keu sa na yali, ena levu sara na dredre ena sotava o luvequ. Au mani nanuma meu vakamatei keirau ruarua.” Nona beci koya o Sowbhagya kei na nona sega ni kauaitaki, e mani gole me lai volia mai na wainimate poisoni.

 Ni vodo lesu tiko i vale ena sitimanivanua, e vosa sara vua o Elizabeth e dua na iVakadinadina i Jiova. E vakamacalataka sara o Sowbhagya ni sega tiko ni cakacaka. E mani kaya vua o Elizabeth ni na veivuke me vaqara e dua nona cakacaka, e kaya tale ga ni gole tiko me lai caka vuli iVolatabu. E kurabuitaka qori o Sowbhagya, baleta e levu na lotu e goleva e se bera vakadua ni rogoca me dua e vulica na iVolatabu. E mani sureti koya o Elizabeth i nona vale me rau lai veitalanoataka eso tale na ka baleta na vuli iVolatabu.

 Ni yaco i vale o Sowbhagya, e se vinakata tiko ga me vakamatei koya kei luvena. Ia e gole mai e dua na wekadrau qai kauti Meghana me ratou gade, e mani waraki luvena tiko me lesu mai me qai vakamatei rau.

 E mani gade sara tu o Sowbhagya vei Elizabeth. Dua na ka nona marau o Elizabeth, e vakaraitaka sara vua na ivola, Na Cava Mada e Kaya na iVolatabu? E via kila sara ga o Sowbhagya na ulutaga, “Era tu e Vei na Mate?” E tarai koya vakalevu na ulutaga qori ni se qai takali ga o watina. Ena siga tiko ga qori e vakadonuya me vulica na iVolatabu.

 E sureti Sowbhagya sara o Elizabeth ena soqo ni veiwasewase ena macawa e tarava. E gole kina qai uqeti koya sara ga na veika e rogoca ena porokaramu. E vinakata sara ga me sa iVakadinadina i Jiova. Oti na soqo, e soli sara vua e dua na cakacaka.

 E tomana tiko o Sowbhagya nona vulica na iVolatabu. Gauna qo sa sega ni qai via vakamatei koya, e kila tale ga ni tiko na inaki ni bula. E mani papitaiso sara, toso na gauna e papitaiso tale ga o Meghana. Nikua, rau sa painia tudei tiko vakaveitinani, e veivuke tale ga o Meghana ena dua na valenivolavola ni vakadewa tu yawa e Idia.

 E uqeti rau sara ga na veitinani nona vakaliuliu o Elizabeth ena loma ni sitimanivanua me vosa vei Sowbhagya, e vakaraitaka na kauai dina, e wasea tale ga vua na ka dina! Dua na ka nodrau vakavinavinakataki Jiova tale ga vakalevu. E kaya o Meghana: “Ke keirau sega ni kila na ka dina ena gauna ya, keirau sa mate makawa qo. Keirau marau vakalevu ena gauna qo. Au rai vakanamata tu kei Na na gauna keirau na sotavi Ta tale kina, vakavulici koya me baleti Jiova, meu tukuna tale ga vua na sala e vakabulai keirau kina o Jiova.”