E tauvi Maria Lúcia mai Brazil, e dua na mate ni kawa na Usher’s syndrome. E dau vakavuna na didivara, e vakaleqa tale ga na rai. E galu ena gauna e sucu kina, qai vulica na vosa vagalu. Ni voleka ni yabaki 30, e tekivu leqa na nona rai. Dina ga ni sotava na ituvaki dredre ia e sega ni vakayawaki koya vei ira eso tale.

 Ena 1977, e sotavi ira na iVakadinadina i Jiova, ni bera ni mataboko. E kaya: “Au sotava e dua keirau vuli vata o Adriano. E se qai papitaiso ga me iVakadinadina i Jiova. E vakamacalataka vei au na yalayala ni Kalou me baleta na vuravura parataisi, ni sa na sega kina na tauvimate. Au marautaka vakalevu, qai vakadonuya meu vulica na iVolatabu. Au tekivu tiko sara ena soqoni ena dua na ivavakoso e Rio de Janeiro, e dau caka kina na vakadewa ina vosa vagalu. E vukei au o Jiova meu toso vakayalo qai papitaiso ena Julai 1978.”

 E mani toki o Maria Lúcia ina dua na ivavakoso, e sega ni kilai kina na vosa vagalu. E sega ni rawarawa vua ni sega ni kila na veika e vakamacalataki ena soqoni. Rau mani vukei koya e rua na tacida. Rau dau dabe vata kei koya ena soqoni, qai vola na veika e vakamacalataki. E kaya o Maria Lúcia, “ Niu dau yaco e vale, au dau wilika vakavicavata na veika rau vola, me matata kina vei au. Oti qori, rau vulica na vosa vagalu na tacida yalewa. Rau qai dau vakadewa vei au ena gauna ni soqoni.”

 Ni toso na gauna, e buawa vakalevu na matana qai sega ni raica rawa na nodrau vakadewa na tacida yalewa. E mani vulica na iwalewale e vakatokai na tactile sign language. Cava qori? E kaya: “Au na taura na ligai koya e vakadewa tiko ina vosa vagalu. Au na kila kina na veika e matanataka tiko.”

 E vakavinavinakataka o Maria Lúcia na nodrau veivuke na tacida. E kaya, “Rau iloloma talei mai vei Jiova. Ena nodrau veivuke, e yaga kina vei au na soqoni, soqo ni tabacakacaka kei na soqo ni veiwasewase.”

 E dau vakaitavi vakalevu ena cakacaka vakaitalatala o Maria Lúcia. E dau vakayagataka na tactile sign language, me vunau kina vei ira na galu. Era dau qoroya nona sasaga me vunautaka na itukutuku vinaka. Ena gauna ni matedewa na COVID-19, e vukei koya o ganena o José Antônio me volavola vei ira na galu. E galu qai mataboko tale ga. a

 E cakava vakacava qori? E kaya, “Au dau vakayagataka na ruler palasitika, e vaka na ibulibuli ni matuavosa na L. E yaga vakalevu qori, me kua ni veve na ka au vola, meu vola tale ga vakaparakaravu. E dau nanuma vinaka na ka o José Antônio. E dau vakatututaka gona na ulutaga kei na tikinivolatabu meu vola. Au dau saga me matata vei ira na galu na veika au vola, ni so vei ira era sega ni kila vinaka na ka e volai.”

 Dina ga ni sa mataboko o Maria Lúcia, ia e se gugumatua tiko ga. E kaya o Karoline, e dua e dau vakadewa vua: “E dau cakava kece na cakacaka ni vale o Maria Lúcia qai maqosa. E dau taleitaka na vakasaqa qai sureti ira nona itokani mera vakayagataka vata.”

 E kaya o Jefferson, e dua na qase ena ivavakoso e lewena o Maria Lúcia: “E lomani Jiova vakalevu o Maria Lúcia. E dauloloma tale ga. E dau vakuai koya qai vinakata me vukei ira eso tale.”—Filipai 2:4.