E vakaitikotiko mai Jamani o Irma, sa voleka ni yabaki 90. Sa sega ni rawa ni vunau e veivale me vaka eliu, ni laucoqa oti vakarua qai sele tale ga vakalevu. Ia se wasea tiko ga nona vakabauta ni volaivola vei ira na wekana, se itokani. E taleitaki vakalevu na nona ivola ni dau veivakayaloqaqataki, se uqeti ira e takali na wekadra. Era dau qiriti koya ena so na gauna nira via kila se gauna cava ena volavola tale yani kina. E levu era volavola lesu vua mera vakavinavinakataki koya, era kerea tale ga ke rawa ni volavola tiko ga yani. E kaya o Irma, “E vakamarautaki au dina qori, qai vukei meu toso tiko ga vakayalo.”

 E dauvolavola tale ga o Irma vei ira na vakaitikotiko ena nodra vale na malumalumu. E kaya: “Qiriti au mai e dua na buinigone, e kaya ni uqeti koya sara ga na noqu ivola ni se qai takali ga o watina. E dau maroroya toka ena loma ni nona iVolatabu, qai dau vakawilika ena yakavi. Dua tale na marama se qai mate tale ga na watina, e kaya ni uqeti koya vakalevu na noqu ivola ni vakatauvatani ina nona ivunau na italatala. E levu tale tu na nona taro, qai vinakata me sikovi au mai.”

 A toki e dua na nona itokani o Irma e sega ni iVakadinadina i Jiova, qai kerei Irma me dau volavola yani vua. E kaya: “E maroroya kece tu na noqu ivola na marama qori. Gauna e mate kina, e qiriti au mai na luvena yalewa. E kaya ni sa wilika taucoko na noqu ivola, qai kerea ke rawa niu volavola tale ga yani vua, me vaka ga noqu cakava vei tinana.”

 E marautaka vakalevu o Irma nona cakacaka vakaitalatala. E kaya: “Au dau masuti Jiova me solia tiko ga vei au na kaukaua meu qaravi koya kina. Au sega ni rawa ni lako e veivale, ia au sa vakayacora ga na ka au rawa ni cakava.”