“Sega ni tukuni rawa na marau au vakila niu veiqaravi ena vanua e vinakati kina na cakacaka!” Qori na ka e kaya o Joshua e tiko e Merika, a veiqaravi tu ena dua na gauna e Guyana. Na marau vata qori era vakila e levu na iVakadinadina i Jiova era veiqaravi ena vanua bulabula e Sauca Amerika. a Cava eda vulica vei ira na soli ira vakarawarawa va qori? Ena vukei iko vakacava ke o via veiqaravi ena dua na vanuatani?

 Ni bera ni toki e Guyana e dua na tacida tagane o Linel, e dau vunau ena yalava e sega ni cakacakataki vakalevu e Merika. E kaya: “Keitou le 20 na lesi ena lomanivanua e West Virginia. E veisautaka sara ga noqu bula na vunau kei na veimaliwai ena rua na macawa qori! Au via veiqaravi kina vei Jiova ena noqu vinaka kece.”

 Rau vakasamataka vakabibi e dua na veiwatini o Garth kei Erica me rau veiqaravi e vanuatani, rau mani gole e Guyana. Na vuna? E kaya o Erica: “Keirau kila e dua na veiwatini rau toki e kea. Nodrau gugumatua kei na nodrau taleitaka na ka rau cakava tiko, e uqeti keirau me keirau toki ena vanua qori.” Tolu na yabaki nodrau veiqaravi tu e kea o Erica kei Garth, dua na ka nodrau marautaka, rau kaya tale ga ni “ilesilesi talei dina.” E kaya o Garth: “Keirau vakatovolea na veiqaravi e vanuatani, e totoka dina.” Rau mani sara vuli vakaveiwatini e Kiliati, rau sa veiqaravi tiko qo e Bolivia.

 E uqeti keirau na ivakavuvuli vakaivolatabu me keirau bula rawarawa ga. (Iperiu 13:5) Eda uqeti tale ga meda dau vakasama vinaka ni bera nida vakatulewataka e dua na ka bibi. (Luke 14:26-33) E okati kina na vakatulewa meda toki ena dua na vanuatani! E vola o Garth: “Ni bera ni keirau toki e Guyana, keirau saga vakaveiwatini me keirau bula rawarawa ga. Keirau volitaka neirau bisinisi, vale, kei na ka kece keirau taukena e sega ni vakayagataki tu. E vakayabaki neirau cakava tiko qori. Ia keirau dei toka ga ena neirau lalawa ni veiqaravi e Guyana, ni sega ni veisau na neirau isausau keirau veisiko tale ga kina vakalevu.”

 Dua tale na ka me vakasamataki na ilavo. Eso vei ira na bolecakacaka ena vanua e vinakati kina cakacaka, era rawa tale ga ni cakacaka saumi ke vakatara na matanitu. Eso era cakacaka ga ena nodra kompiuta ena vanua era toki kina. Eso tale era dau lesu e nodra vanua mera lai cakacaka vakalailai, oti ra tomana tale nodra veiqaravi. Kena ivakaraitaki, rau na veiwatini o Paul kei Sinead, vakadua e veiyabaki rau na lesu e nodrau vanua i Ailadi me rau lai cakacaka. Qori e vukei rau me rau veiqaravi e Guyana me 18 na yabaki, wili kina na vitu na yabaki ni sucu oti na luvedrau yalewa.

 E kaya na Same 37:5: “Tataunaka na nomu sala vei Jiova, vakararavi vua, ena qai yavala ena vukumu o koya.” Rau dau masulaka vakaveiwatini o Christopher kei Lorissa e Merika, nodrau isausau me rau veiqaravi e vanuatani. Rau veivosakitaka tale ga ena nodrau Sokalou Vakavuvale na ka me rau cakava me vuavuaivinaka kina nodrau toki, rau vakavola na kena vinaka kei na kena ca. Ni rau sega ni via vulica e dua tale na vosa, rau digia me rau gole i Guyana na vanua e vosataki vakalevu kina na vosa vakavalagi.

 Oti rau muria na ivakavuvuli ena Vosa Vakaibalebale 15:22: “E seva na ka e nanumi ni sega na veivosaki, ia e vakavatukana na sasaga ni levu na daunivakasala.” Rau volavola sara ena valenivolavola ni tabana e qarava na cakacaka e Guyana, b rau vakamacalataka na ka e baleti rau. Rau taroga tale ga na veiqaravi vakavuniwai, na draki kei na ivakarau vakavanua. E sauma sara na valenivolavola ni tabana nodrau vakatataro, dusimaki rau tale ga vei ira na ilawalawa qase ena vanua rau na toki kina.

 O Linel, e cavuti taumada sa ivakatawa dauveilakoyaki tiko ena gauna qo e Guyana. Ni bera ni toki e kea, e muria tale ga na ivakavuvuli ena Vosa Vakaibalebale 15:22. E kaya: “Ni bera niu vakumuni sede, au dau veitalanoa kei ira na veiqaravi oti e vanuatani. Au veivosaki tale ga kei ratou e vale, ira na qase ni ivavakoso, kei na ivakatawa dauveilakoyaki. Au wilika na itukutuku kece era tu ena noda ivola me baleta na veiqaravi e vanuatani.”

 Levu era via veiqaravi e vanuatani era vakatulewataka vakayalomatua mera sikova e liu na vanua. Rau kaya e dua na veiwatini o Joseph kei Christina: “Keirau lai vula tolu ena imatai ni gauna keirau gole kina e Guyana. E talavo vei keirau na gauna ni keirau kila vinaka kina na ivakarau ni vanua. Oti keirau lesu i vale, tuvanaka na veika e gadrevi, keirau sa qai toki.”

 Me vuavuaivinaka nodra ilesilesi na veiqaravi ena vanua e vinakati kina na cakacaka, e dodonu mera vakuai ira, tu vakarau tale ga ni vakamatauni ira ena draki kei na itovo ni vanua era na toki kina. Kena ivakaraitaki, o ira na toki mai na vanua batabata ina vanua katakata era dau raica na veimataqali manumanu qasi lalai e nodra vale. E kaya o Joshua sa tukuni oti mai: “Sega ni matau vei au niu raica e levu na manumanu qasi lalai. Ia na kena era tu qo e Guyana, e sega ni tukuni rawa na kedra ka lelevu! Lakolako ga au sa matau kina. Ia ena lailai na kedra wiliwili ke savasava tiko ga na vale. Okati kina na sava ni iyaya duka, kau laivi na benu, samaki wasoma tale ga na vale.”

 Nomu saga mo vakamatauni iko ena ivakarau ni bula ena dua tale na vanua, e okati tale ga kina nomu vakamatauni iko ena kakana ni vanua qori, kei na kena isaqasaqa. E nanuma lesu o Joshua: “Keirau kerea kei na noqu itokani keirau rumuvata vei ira na mataveitacini, mera vakavulici keirau ena saqa ni kedra kakana. Ni keirau vakasaqara oti, keirau na sureti ira e vica na lewe ni vavakoso me keimami vakayagataka vata. Qori e gauna marautaki me keirau kilai ira kina na tacida, me keimami veitokani tale ga.”

 Rau kaya o Paul kei Kathleen me baleta na itovo ni vanua rau veiqaravi kina: “E vou vei keirau na itovo ni vanua kei na isulusulu e tokari ena vanua tunumaka qo. Ena vinakati na yalomalumalumu me keirau cakava tale ga na veiveisau e vinakati, ia me muri tiko ga na ivakavuvuli vakaivolatabu. Neirau vakamatauni keirau ena itovo vakavanua keirau volekati ira kina na lewe ni ivavakoso, yaga tale ga ena neirau cakacaka vakaitalatala.”

 E levu era duavata ena ka rau kaya o Joseph kei Christina: “E levu na veivakalougatataki ni vakatauvatani ena leqa kei na veika dredre e sotavi. Na ka vou keirau cakava qo kei na ituvaki dredre e sotavi kina, e vukei keirau me keirau veisautaka na ka keirau vakaliuca. Keirau sa sega ni kauaitaka vakalevu na veika keirau dau vakabibitaka e liu. Qori e uqeti keirau me keirau qaravi Jiova ena neirau vinaka kece. Keirau vakila kina na marau kei na lomavakacegu.”

 Tukuna o Erica e vakamacalataki taumada: “Neirau veiqaravi vakaveiwatini ena vanua e vinakati kina na cakacaka, e vakavulici keirau me keirau dau nuitaki Jiova. Keirau vakila na liga i Jiova ena nona veivuke ena levu na sala keirau sega ni se bau raica e liu. E vaqaqacotaka tale ga neirau ivau ni vakawati na veika vovou keirau sotava eke.”