Dua na ka na nodra tusaqati na tacida vei ira na vakailesilesi e Rusia, e caka tale ga qori e Crimea. E sega wale ga ni saga na matanitu me vakatabuya nodra vakadonui vakalawa na tacida e Rusia. Ia e saga tale ga me vakawabokotaka na nodra sokalou. Tekivu mai na vakatatabu ena Epereli 2017, era curuma vakaukaua na vakailesilesi na vanua era soqoni tiko kina na tacida ra qai vesu e levu. Na veitusaqati qori e caka tale ga vei ira na tacida e Crimea.

Ena ika15 ni Noveba 2018, era curuma vakaukaua e rauta ni le 200 na ovisa e walu nodratou vale na tacida ena tauni o Dzhankoy, e Crimea. Na veivale qori era dau soqoni kina na tacida mera wilika, qai veivosakitaka na iVolatabu. E voleka ni le 35 na ovisa era curuma vakaukaua nona vale o Sergey Filatov, era vakaiyaragi qai vakamatavulo. Ratou soqoni tiko kina e le ono na tacida, dua na ka nodratou rere. Era vakaravica ena lalaga na ovisa e dua na turaga yabaki 78, ra qai vakasaurarataki koya me davo, ra vesuki koya tale ga. Na levu ni nodra mokulaki koya, e mani cicivaki kina e valenibula. Rau lai domobula kina e rua na itabaqase, rau qai cicivaki kina e valenibula ni tubu sivia na nodrau dra. A curumi tale ga vakaukaua na nona vale e dua na yalewa e bukete tu, vakavuna me vakasucu dole.

Ni curumi oti vakaukaua nona vale o Sergey, e beitaki ni beca na Lawa ni Rusia ena Article 282.2(1), ni tokona na cakacaka ni “isoqosoqo e uqeta na tikoyavavala.” Ena ika5 ni Maji 2020, e kaya na mataveilewai ni tikina o Crimea, ni dina na ka e beitaki kina o Brother Sergey Filatov. Ni tau ga na kena itotogi, e kau sara e valeniveivesu me vesu me ono na yabaki.

Oti e vica na yabaki na kena caka na vaqaqara e Dzhankoy, era se curuma tiko ga vakaukaua na vakailesilesi na nodra vale na tacida era kasamitaki nira vakavuna na tikoyavavala. Wale tiko ga qo e caka na vaqaqara ena ika22 ni Me, 2023. Ena veimama ni ono ena mataka era curuma vakaukaua e sivia ni tini na vakailesilesi e dua na vale e Feodosia. E le lima vei ratou qori ratou tauri iyaragi tu. Era vakaroti ira na tacida mera davo ina fuloa ra qai vaqaqara e loma ni vale me sivia e tolu na aua. E mani vesu e dua na tacida tagane qai kau me lai vakatarogi i Sevastopol.

Na curumi vakaukaua ni nodra vale na tacida, era beitaki qai totogitaki. Eratou biu kina e valeniveivesu e le 12 na tacida tagane me ono veimama na yabaki. Ratou beitaki ni ratou tokona tiko na cakacaka ni isoqosoqo e vakavuna na tikoyavavala.

1. Noveba 18, 2024

   Vesu tiko qo e le 12 na tacida e Crimea.

2. Me 22, 2023

   Curuma vakaukaua na vakailesilesi nona vale e dua na tacida e Feodosia. E tauri vakaukaua na iyaya vakalivaliva, qai kau e dua na tacida.

3. Okosita 5, 2021

   Caka na vaqaqara ena walu nodratou vale na tacida, rau qai vesu o Aleksandr Dubovenko kei Aleksandr Litvinyuk.

4. Okotova 1, 2020

   Curumi vakaukaua e ciwa na vale e Sevastopol. E mani vesu vakawawa o Igor Shmidt.

5. June 4, 2019

   Era curuma vakaukaua na ovisa e tini na vale e Sevastopol. E beitaki o Stashevskiy ni tuvanaka tiko na cakacaka ni isoqosoqo e vakavuna na tikoyavavala.

6. Maji 20, 2019

   Era curuma vakaukaua na ovisa e walu na vale ena siti o Alupka kei Yalta. E mani vaqaqai o Artem, qai beitaki ni tuvanaka tiko na cakacaka e vakavuna na tiko yavavala.

7. Noveba 15, 2018

   Era curuma vakaukaua e sivia e 200 na ovisa e walu na vale ena tauni o Dzhankoy, wili kina na nona vale o Filatov.