Ena 25 na yabaki sa oti e laurai na tubu ni iwiliwili ni Vale ni Soqoni e tara ena yalava e qarava na valenivolavola ni tabana ena Tokalau kei Aferika, e okati kina o Kenya, Ceva kei Sudan, Tanzania kei Sudan.

Ena 1999, e vakadonuya na iLawalawa Dauvakatulewa na porokaramu Lands with Limited Resources (LWLR) a me vakatotolotaka na tara Vale ni Soqoni ena 88 na vanua era se vakatorocaketaki tiko. Era veivuke vakailavo ena ituvatuva qori na valenivolavola ni tabana ena so tale vanua. (2 Korinica 8:​13-15) Era gole tale ga yani na tacida mai na veiyasa i vuravura e tiko vei ira na kila ni tarataravaki, mera lai vakavulici ira na mataveitacini e kea. O ira na tacida era vakavulici qori era qai tomana na cakacaka ni tarataravaki. E yaga vakalevu qori ni toso tiko ga na tara ni Vale ni Soqoni ena yalava e qarava na valenivolavola ni tabana ena Tokalau kei Aferika.

Ena 1999, e sivia e 23,000 na dautukutuku ena Tokalau kei Aferika, ia e 51 ga na Vale ni Soqoni. Levu na ivavakoso era soqoni i tuba, vale vakaitaukei kei na so tale na vanua. Ni bera ni tekivu na porokaramu ni tara Vale ni Soqoni, era vakayagataka na tacida na ka ga sa tu me vaka na kau, na qele, kava kei na denibulumakau e waki vata kei na dravusa. Dua na tacida yalewa o Nancy Ruitha e lewena na ivavakoso o Kingspost e Embu, e Kenya. E kaya: “E tara na neimami Vale ni Soqoni ena kava. Ni katakata na draki e vaka ga keimami tu e loma ni ovani. Ni tau bi na uca keimami sega ni rogoci koya e vunau tiko. Ia qo keimami marautaka na Vale ni Soqoni vou e caka ena lalaga vatu, sa rawa ni keimami vuli qai vakarorogo vinaka kina. Qo e dua na ivakadinadina totoka vei ira na tiko ena yalava.”

O ira na tacida ena Tokalau kei Aferika era tara na imatai ni Vale ni Soqoni e Nairobi e Kenya nira muri na porokaramu na LWLR. Sa oti qo e 25 na yabaki qai vakasakiti na tubu ni iwiliwili ni Vale ni Soqoni, mai na 51 ina rauta na 1000.

E vinakati me tara e levu tale na Vale ni Soqoni ni levu era sa vulica na itukutuku vinaka ni Matanitu ni Kalou ena veivanua ena Tokalau kei Aferika. O Brother Timothy Stephens, e ivukevuke ni ovasia ena Tarataravaki e Qarava na Valenivolavola ni Tabana ena Tokalau kei Aferika. E kaya: “Ena 2024, e vinakati me tara e 126 na Vale ni Soqoni vou kei na sivia na 200 me vakavinakataki. E vinakati me tara e levu tale na Vale ni Soqoni ena lima na yabaki mai qo.”

Eda vakavinavinakataka na nodra cakacaka vakaukaua, kei na nodra vakuai ira na tacida mera veivuke vei ira na tacida ena Tokalau e Aferika kei na veiyasa i vuravura. Ni tara e levu tale na Vale ni Soqoni eda nuidei ni o Jiova ena vakalougatataka na noda sasaga me tokoni na sokalou savasava, rokovi qai vakalagilagi kina na yacana.​—Aisea 2:3.