Era sega ni tu suka na tacida e Ukraine mera vukei ira eso tale na mataveitacini. Era vakaraitaka tiko ga na loloma, ra qai vakuai ira.

O Sister Olena e yabaki 81. Ena ika6 ni June, e kacabote na bomu ena yasa ni nona vale. E vakarusai kina nodratou vale na tiko tikivi koya, lai vakavuna e dua na qara e vitu na mita na kena titobu. Na kaukaua ni kacabote ni bomu e vakacacani tale ga kina nona vale o Sister Olena.

E kaya: “Au moce tu qai bale mai na lalaga ni vale volekata sara ga na uluqu. Dua na ka na levu ni kubou loaloa, e kakavorovoro na iloilo qai qeqera tu i ra kei na vatu. Ia au vakavinavinakataki Jiova niu bula.” Oti ga e vica na miniti era yaco yani na mataveitacini mera lai raici Sister Olena, kei na dua na tacida tagane e vakacacani tale ga vakalevu nona vale. E kaya o Sister Olena: “Era kurabui na tacida nira raica na ituvaki ni noqu vale. Ia e vakayaloqaqataki au na nodra yaco mai, au marau tale ga nira tokoni au.”

O Serhii e dua na qase ni ivavakoso, e dau sikovi Sister Olena kei ira na itabagone. E kaya: “Au lomaleqa niu rogoca na kacabote ni bomu ena yasa ni nona vale. Ia au lomavakacegu niu raica ni mavoa ga vakalailai. Dua na ka e tarai au vakalevu ni imatai ga ni ka e vinakata o koya, ya na nona ivola vakaivolatabu a soli vua ena vica na siga sa oti.”

E marautaki ni ratou sa kunea na wekana e dua na vale vou me tiko kina. Era vukei koya tiko ga na lewe ni ivavakoso, ra qai veitaratara tiko vua e veisiga na qase. Me vaka ni didivara, e mani soli vua na misini me rogoca vinaka kina na soqoni. E kaya: “Eso na gauna au dau yalolailai, ia e vakayaloqaqataki au na soqoni. Au marautaka tale ga nira dau qiriti au mai na mataveitacini.”

Rau talanoataka e dua na veiwatini na nodrau lai vakaruru ena dua na rumu ena tabavale e ra ni Vale ni Soqoni, kei ira e le 200 na mataveitacini. E vola o yalewa: “Au qoroya na nodra veikauaitaki na qase ni ivavakoso. Au lai vakasamataki Tevita, e voleka ni mate ena gauna e taqomaka kina na sipi mai na laione kei na bea. O ira tale ga na qase ni ivavakoso era bolemate mera kauta mai na kakana, wai kei na benisini me waqa kina na cina. Na ka era cakava qori keimami rawa kina ni soqoni, qai cakacaka vakavunau. Gauna mada ga e kacabote tiko kina e levu na bomu, era veisiko ena nodra vale na mataveitacini. Era kauta na kakana, ra qai vakayaloqaqataki ira. Au dokai ira dina na qase ni ivavakoso qo. I liu au dau raici ira tu ga mera dau veivakavulici, ra qai dau cakacaka vakavunau. Ia na ka era cakava qo, e vakaraitaka nira ivakatawa nuitaki. Au vakavinavinakataka na nodra ivakaraitaki ni yaloqaqa, yalololoma kei na veinanumi!”

Qo na ka era vola eso na dautukutuku ena dua na ivavakoso e Ukraine ena valenivolavola ni tabana me baleti ira na veivuke ena vakacoko: “Dua na ka na levu ni neimami vakavinavinaka. Keimami qoroya na sala e karoni keimami kina o Jiova ni vakayagataki ira na mataveitacini. Keimami vakadinadinataka na vosa i Jisu: ‘Na ka qo era na kila kece kina ni dou noqu tisaipeli, ke dou veilomani.’”—Joni 13:35.

Me yacova mai na ika21 ni June, 2022, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua o Ukraine, ena rawa ni toso i cake na iwiliwili.

• Mate e 42 na dautukutuku

• Mavoa e 83 na dautukutuku

• Tokitaki e 31,185 na dautukutuku

• Vakarusai e 495 na vale

• Vakacacani vakalevu e 557 na vale

• Vakacacani vakalailai e 1,429 na vale

• Vakarusai e 5 na Vale ni Soqoni

• Vakacacani vakalevu e 8 na Vale ni Soqoni

• Vakacacani vakalailai e 34 na Vale ni Soqoni

• Sa veivuke tiko e Ukraine e 27 na Komiti ni Vakacoko (DRC)

• Era veivuke tiko na DRC vei ira na 52,348 na dautukutuku ena vanua mera taqomaki kina

• Era dro e 23,433 na dautukutuku ena so tale na matanitu, ra qai vukei vei ira na tacida e kea