FEPERUERI 1, 2023
UKRAINE
IROGO #16 | Laurai na Veilomani Vakaveitacini ni Yaco Tiko na Leqa e Ukraine
Tekivu Tale na Koronivuli ni Cakacaka Vakapainia
Me tekivu ena ika26 ni Tiseba, 2022, era sa rawa ni tiko na painia tudei kei na painia lavotaki e Ukraine ena Koronivuli ni Cakacaka Vakapainia ke sega ni ririkotaki na nodra bula. Era na rawa ni tiko ena vanua e caka kina na vuli se sema ena zoom, me vakatau ena kedra ituvaki. Levu na tacida era saga mera tiko ena vuli dina ga nira sotava e levu na ituvaki dredre, me vaka na vakalutugasaukuro, boko ni livaliva, dredre vakailavo kei na leqa ni internet. Era sa qai volekati Jiova ga, qai qaqaco na nodra vakabauta.
Ratou sema ena Zoom na tacida yalewa ena gauna ni vuli ni painia. E boko na livaliva, ratou vakayagataka e vica ga na iyaya vakalivaliva me kua ni kania vakalevu na batiri
E kaya o Natalia e tiko ena siti o Kryvyi Rih: “E yaga sara ga vakalevu vei au na vuli qo. E vukei au me donu na noqu rai, qai kua ni nuiqawaqawa vakalevu.” E va tale ga qori na ka e kaya o Anastasia mai na siti o Chernivtsi: “Au vakadinadinataka sara ga ni lomani au vakalevu o Jiova. E levu na ituvaki dredre au sotava ena yabaki qo, e yaco donu sara ga mai na vuli. Au na saga me vakalougatataki au tiko ga o Jiova.”
O Svitlana e dua na painia ena siti o Kitsman. E lomaleqa ena gauna e taura kina na nona ivola ni veisureti. E kaya: “Au talaucaka vei Jiova na veika au lomaleqataka. E okati kina na veika vakailavo. Au sega ni veivutunitaka na noqu nuitaki koya. Au vakila ni lomani au o Jiova qai kauaitaki au.” E sega ni tiko ena dina o watina, ia e uqeti koya sara ga na nona sasaga o Svitlana. Ena gauna qo, sa dau tomani koya tale ga ena soqoni.
E leqa na intenet, mani gole o Victoria ina ikelekele ni sitima me rawa ni sema ina vuli ni painia
E vakarua na kena yaco na ivakaro ni vakalutugasaukuro ena siti o Zhytomyr, era mani dro na tacida ena tabavale e ra. E vakayagataki na sitovu buka me vakatakatai kina na rumu, ra qai tomana sara nodra vuli. E sotava na ituvaki dredre qo Valentyna, qai toki ina siti o Zhytomyr, e kaya: “Au na sega vakadua ni guilecava na vuli qo. Au vakila niu taqomaki ena ruku ni taba i Jiova.”
Era marautaka tale ga na painia e Ukraine, ni sa vakalailaitaki na aua e lavaki vei ira. Ni oti nona rogoca qori o Yulia, e kaya: “Au sa qai lomani Jiova ga vakalevu. Ena mataka nikua au masulaka vagumatua vei Jiova meu kua ni biuta na veiqaravi vakapainia. Au sega ni kila na sala ena sauma kina o Jiova na noqu masu. Ia au vakadeitaka ni na sauma. Niu rogoca ni sa vakalailaitaki na aua ni cakacaka, dua na ka noqu vakavinavinakataka na ka e cakava o Jiova. Qori e dua dina na itukutuku marautaki keimami rogoca ni oti na vuli.”
Me yacova mai na ika24 ni Janueri 2023, qo na itukutuku e tauri rawa mai Ukraine. Na iwiliwili qo e tauri rawa mai vei ira na mataveitacini. Me vaka ni dredre tiko na veitaratara ena vanua kece o Ukraine, ena rawa ni toso i cake na iwiliwili.
Kedra iTuvaki na Tacida
Mate e le 47 na dautukutuku
Mavoa e le 97 na dautukutuku
Tokitaki e le 8,953 na dautukutuku
Vakarusai e 590 na vale
Vakacacani vakalevu e 645 na vale
Vakacacani vakalailai e 1,722 na vale
Vakarusai e 8 na Vale ni Soqoni
Vakacacani vakalevu e 17 na Vale ni Soqoni
Vakacacani vakalailai e 76 na Vale ni Soqoni
Cakacaka ni Vakacoko
Sa veivuke tiko e Ukraine e 26 na Komiti ni Vakacoko (DRC)
E vakavinakataki e 46 na vale
E vakavinakataki e 5 na Vale ni Soqoni
E veivuke na Komiti ni Vakacoko vei ira na le 54,445 ena vanua mera taqomaki kina
Era dro na le 27,655 na dautukutuku ena so tale na matanitu ra qai vukei vei ira na tacida e kea
Raica Tale Ga
YADRA TIKO!
iSenivalu e Ukraine—Cava e Kaya na iVolatabu?
E vakamacalataka na iVolatabu na vuna e yaco kina, kei na kena iwali.
YADRA TIKO!
Valuti Ukraine o Rusia—Sa Yaco Tiko qo na ka e Parofisaitaka na iVolatabu?
Saga mo kila na ibalebale ni ka e yaco qori.
TARO E TAROGI WASOMA
Era Dau Veivuke na iVakadinadina i Jiova ena Leqa Tubukoso?
Wilika na neimami vukei ira keimami vakabauta kei ira eso tale ena gauna ni leqa tubukoso.