Ena Janueri 2024 sa ika100 ni yabaki na kena tabaki na Vale ni Vakatawa ena vosa vakaUkraine. Tekivu sara mai na 1891, sa vunautaki na itukutuku vinaka e Ukraine qai levu era vakarorogo. Ena vica na yabaki e tarava, e levu tale era taleitaka na ka dina ena iVolatabu. Ia oti na veiyabaki ni 1900, e yaco na tikoyavavala vakapolitiki e levu gona era sa toki ena so tale na vanua, me vakai Kenada kei Merika.

Ena 1923, a gole o Brother J. F. Rutherford i Kenada, e mani sureti Brother Emil Zarysky me veivuke ena vakadewataki ni Vale ni Vakatawa ena vosa vakaUkraine, rau a biubiu mai Ukraine na nona itubutubu. E se qai tekivu painia ga o Emil, e veiqaravi tale ga me ivakatawa dauveilakoyaki. E lima na luvedrau kei na watina o Mariya. Ia e vakadonuya na veisureti nei Brother Rutherford, e tabaki tale ga ena Janueri 1924 na imatai ni itabataba ni Vale ni Vakatawa ena vosa vakaUkraine. E 40 na yabaki nona vakadewa voli mai o Emil. E kaya na luvena o Rose: “Au se nanuma vinaka ni dau voqa tu e lomanivale na rorogo ni nona taipa o Ta ena misini ni taipa.”

Ena 1964, rau vakavulici vei Emil o Brother Maurice Saranchuk kei na watina o Anne me rau vakadewataka na Vale ni Vakatawa ena vosa vakaUkraine. Dua na ka nodrau gumatuataka na veiwatini qori na nodrau ilesilesi. Erau cakacaka saumi, ia eso na gauna rau na vakadewa e loma ni nodrau lori ni rau vakacegu vakalailai. Oti e mani vakarautaki e dua na ofisi lailai ena Vale ni Soqoni me rau vakadewa kina. Ena 1977, rau sureti sara me rau gole ena Peceli e Kenada. Toso na gauna, era vakavulici eso tale na tacida ena valenivolavola ni tabana era vosa vakaUkraine mera vakadewataka na Vale ni Vakatawa, kei na so tale na ivola vakaivolatabu.

Ena veiyabaki ni 1940, donuya nodra vakatatabutaki na iVakadinadina i Jiova vei ira na Soviet Union, era saga na tacida e levu na sala me vakau vei ira na Vale ni Vakatawa kei na so tale na ivola vakaivolatabu ena vosa vakaUkraine. Nira taura na tacida na ivola era na tabaka tale qai veisoliyaka, qori na sala e rawa ni vakarautaki kina vakalevu vei ira na tacida na kakana vakayalo. Ena 1991, ni cava na veiliutaki ni Soviet Union, era sokalou tale ena galala na tacida e Ukraine. Oti ga vakalailai e tuvanaki e dua na timi ni vakadewa vosa vakaUkraine ena valenivolavola ni tabana e Jamani. Toso na gauna, e toki na timi ni vakadewa i Poladi ni a vakavinakataki na valenivolavola ni tabana e Ukraine, qai mai vakacavari ena 2001. E kaya e dua na tacida yalewa e veivuke ena vakadewa ena vosa vakaUkraine ena 30 na yabaki sa oti: “O ira na tacida era tauyavutaka na vakadewataki, tabaki kei na veisoliyaki ni Vale ni Vakatawa ena gauna ya, era veivuke vakalevu ena tubu ni isoqosoqo i Jiova nikua. Niu vakadewa tiko, au dau vakasamataka na nodra gugumatua. Qori e uqeti au meu tomana tiko ga noqu veiqaravi.”

Nikua, sa yaga vakalevu vei ira na vosa vakaUkraine e veiyasa i vuravura na Vale ni Vakatawa ena nodra vosa ga. Gauna qo, e 67 na iwasewase lalai vosa vakaUkraine, qai 541 na ivavakoso ena vanua o Ukraine. E tiko tale ga na iwasewase lalai kei na ivavakoso vosa vakaUkraine e Austria, Belgium, Peritania, Kenada, Croatia, Czech Republic, Varanise, Jamani, Ailadi, Itali, Poladi, Slovakia, Sipeni, Suwiteni kei Merika.

Eda vakavinavinakataki Jiova ni vakarautaka na Vale ni Vakatawa ena vosa vakaUkraine me rawa nira vukei kina eso tale mera “vakanuinui vua.”.—Same 78:7.