Ena ika8 ni Janueri 2025, e tauca na itotogi na Mataveilewai ni Yasana o Mary e Turkmenistan, me vakacakacakataki vakaukaua o Brother Arslan Vepayev, e yabaki 21. Na vuna? Ni sega ni via curu ena mataivalu ena vuku ni nona vakabauta. Dina ni sa sere mai e valeniveivesu, ia ena solia ina matanitu e 20 na pasede ni nona veisaumi ena loma ni rua na yabaki.

Ena itekitekivu ni 2024, a digitaki o Arslan me lewena na mataivalu, ia e vakamacalataka ena veidokai ina valenivolavola ni matanitu na nona tawaveitovaki. E tu vakarau tale ga me qarava eso na cakacaka ni veiqaravi raraba. Ia oti ga vakalailai era tekivu vaqaqai koya na vakailesilesi. Ena Noveba 2024, e kau qai lai vesu tu vakawawa. Ena Tiseba 2024, e tauca na itotogi na mataveilewai na City Court of Bayramaly, me vesu me rua na yabaki ni sega ni via curu ena mataivalu ena vuku ni nona vakabauta. E mani kerea o Arslan me rogoci tale nona kisi, sa qai veisautaka kina na mataveilewai ni yasana na kena itotogi me vakacakacakataki vakaukaua me rua na yabaki.

Ena loma ni va na yabaki, qo se qai imatai ni gauna me totogitaki kina e dua na tacida ena vuku ni nona vakabauta ena matanitu o Turkmenistan. Ena Me 2021, e vakayacora na matanitu e dua na veivosoti raraba, qai sereki ira kece na mataveitacini era vesu ena vuku ni nodra vakabauta. Tekivu mai gauna ya, e levu na tacida e Turkmenistan era sega ni totogitaki ke ra sega ni via vakaitavi ena ivalu. Ia e yaco vakasauri na veisau e cakava qo na matanitu ena nona kisi o Arslan. Kuria ya, era vakarogoya na vakailesilesi vei ira e vica vata tale na tacida ni sa vakau na itukutuku ni nodra tawaveitovaki ina nodra ofisi na dauveibeitaki.

Meda masulaki Arslan tiko kei ira kece na tacida cauravou yalodina e Turkmenistan. Eda nuidei ni o Jiova ena “sega ni biuti ira na nona tamata yalodina.”—Same 37:28.