E vakaraitaka e dua na vakailesilesi ni isoqosoqo na National Human Rights Commission of Korea (NHRCK), ni beca na dodonu ni lewenivanua na cakacaka era vakaitavi kina na sega ni via curu ina mataivalu e Sauca Korea.

Ena ika2 ni Tiseba 2021, e vola na iliuliu vou ni NHRCK a o Song Doo-hwan, ni dodonu me veisautaki. Ena ika6 ni Okotova 2020, e vakarautaka o Sauca Korea na cakacaka mera vakaitavi kina na sega ni via curu ina mataivalu.

E kaya o Song Doo-hwan: “Dina ni tekivutaki na cakacaka qo ni oti na kena tau na lewa ni mataveilewai levu ena 2018. Ia au vakabauta ni dodonu me veisautaki me kua ni beci kina na dodonu ni tamata yadua . . .”

Qori na ka e vola o Mr. Song ni oti nona bose kei ratou na tacida ena valenivolavola ni tabana e Sauca Korea, kei na Asia-Pacific Association of Jehovah’s Witnesses (APAJW) ena ika23 ni Noveba, 2021. Era vakarautaka ra qai solia na tacida vei Mr. Song e dua na ripote e kena ulutaga, “Alternative Civilian Service in South Korea—2021,” APAJW, (Cakacaka me Baleti Ira na Sega ni Curu ena Mataivalu e Sauca Korea—2021.)

E vakamacalataki ena ripote qori ni cakacaka e vakarautaka na matanitu o Sauca Korea me baleti ira na sega ni via curu ina mataivalu, e beci kina na dodonu ni tamata yadua. E 36 na vula na kena balavu, e vakaruataki kina na gauna ena veiqaravi kina e dua ena mataivalu. O ira na sega ni via curu ena mataivalu ena vuku ni nodra vakabauta, era na cakacaka tu e valeniveivesu. Ena imatai ni vula, ena sega ni vakatarai mera biuta na valeniveivesu. Era na biubiu ga ke vakadonui, ia era na lesu tale ni bera na veimama ni ciwa ena bogi.

E dikeva tiko ena gauna qo na NHRCK na kerekere me veisautaki na cakacaka qori. Dina ni sega ni tu vua na NHRCK na dodonu me veisautaka na lawa, ia e rawa ni vakatututaka qori vei ira na vakailesilesi ni matanitu.

E vakayaloqaqataki keda na nodra ivakaraitaki ni vakabauta, kei na yalodina na tacida e Sauca Korea. Eda kila ni na tokoni ira tiko ga o Jiova.—Same 55:22.