Ena ika6 ni Janueri 1974, a caka na nodra soqo ni veimatanitu a na iVakadinadina i Jiova ena Rand Stadium e Johannesburg e Sauca Aferika. E kena ulutaga “Divine Victory,” qai rauta ni le 33,408 na duikaikai era tiko kina. Qo sa ika50 ni yabaki na kena vakayacori na soqo qori.

Tekivu ena 1948, e sega ni vakadonuya na lawa e Sauca Aferika mera soqoni vata na duikaikai. Qori e vakavuna mera sega ni soqoni se soqo vata na tacida. O Brother Alfred Phatswana a yabaki tini ena 1974, gauna qo sa lewe ni Komiti ni Tabana e Sauca Aferika. E kaya: “Donuya na gauna qori e dredre meda raici ira na duikaikai mera veimaliwai.”

A vakayacori na soqo ni veimatanitu ena ika2 ina ika6 ni Janueri 1974. Ena vuku ni lawa ni veivakaduiduitaki, e dredre kina me vakayacori na soqo ena dua ga na vanua mera tiko kina na duikaikai. Na imatai ni va veimama na siga ni soqo era soqoni vata vakaiwasewase lalai na vulagi ena duidui vanua, qai vakatau ena vanua era cavutu mai kina kei na nodra vosa. Ia sa qai vakadonui mera soqo vata kece na vulagi ena iotioti ni siga ni soqo ena Sigatabu e Rand Stadium e Johannesburg. Qori ga na vanua e vakatarai mera sota kina na duikaikai.

Rauta na 12 na kaloko ena sigalevu era gole kece na vulagi e Rand Stadium. Eso era vodo basi, motoka kei na sitima. E tuvanaki na porokaramu ena vosa vakavalagi qai vakadewataki ena vosa vakaAferika, vakaPotukali vakaSesotho, kei na vosa vakaZulu.

Dua na ka na oso ni vanua ni soqo, e levu mada ga era sa duri tu ga me yacova ni oti na soqo. O Brother Keith Wiggill, a yabaki 23 tiko ena gauna a caka kina na soqo qori. Gauna qo sa lewe tiko ni Komiti ni Tabana e Sauca Aferika. E kaya: “Keimami sega ni namaka me keimami na mai sota vakalewe levu va qo, e saumi tale ga kina na neimami masu ni keimami vinakata tu me keimami sokalou vata. E tautauvata na neimami vakabauta, keimami muria e dua ga na ivakavuvuli, ia qo ena iotioti ni siga e sega ni tawasei keimami na lawa ni veivakaduiduitaki. Au vakila niu duavata sara ga kei ira na mataveitacini.”

Gauna a caka kina na soqo ni veimatanitu qo ena 1974, sa rauta tiko ni le 25,000 na dautukutuku e Sauca Aferika. Nikua, e voleka ni le 100,000 na mataveitacini era sokaloutaki Jiova ena duavata ena vanua qori. Tekivu mai na 1974, sa vakayacori e Sauca Aferika e levu na soqo ni veimatanitu, dua sa qai vakayacori oti ena 2019 e kena ulutaga, “E Sega Vakadua ni Seavu na Loloma!” Era qai tiko kina e voleka ni le 60,000 na duidui matatamata, era cavutu mai na duidui vanua.

Eda marautaka nida vakasamataka na veika totoka a yaco ena soqo qori ena 1974. E vakadinadinataka ni o Jiova e rawa ni vukei ira na nona dauveiqaravi mera vosota na ituvaki cava ga, ra qai duavata tiko. Eda marau nida duavata vakamataveitacini meda vakacaucautaka tiko ga na Kalou o Jiova e sega ni dauveivakaduiduitaki.​—⁠Cakacaka 10:​34, 35.