Ena rogoci ena Mataveilewai e Rostov ena ika11 ni Tiseba, 2014, na nodra kisi na le 16 na iVakadinadina i Jiova mai Taganrog, e Rusia. Era veilewaitaki nira dau tiko ena soqoni ni nodra lotu, ra tuvanaka tale ga na kena vakayacori.

Na ituvaki era sotava qori na iVakadinadina e tekivu ena 2011 ena gauna era vaqaqara kina na vakailesilesi ena nodra vale, ra katona lo tale ga na nodra soqoni ni lotu. Qori e vakavuna mera totogitaki kina. Oti e 15 na vula ni veilewai e qai tauca ena ika30 ni Julai, 2014 na Mataveilewai e Taganrog na kedratou itotogi e le vitu vei ratou na le 16 qori. Eratou totogitaki kece vakailavo na le vitu, e le va ratou bala e valeniveivesu me dua na gauna balavu. E totolo ga nona veisautaka o turaganilewa na lewa e tau. E mani bokoca na itotogi e tau vei ratou na le ciwa tale na iVakadinadina, ia e kaya ni ratou vakaitavi ena cakacaka e vakavuna na tiko yavavala. Era kerekere tale na le 16 qori me bokoci na kisi era veilewaitaki kina.

E kerekere tale ga na dauveibeitaki ena mataveilewai e Rostov me ratou vesu na le va na italatala ni iVakadinadina ni rogoci oti na kisi. E kerea tale ga me kua ni bokoci na kedratou itotogi na le ciwa tale na iVakadinadina ni ratou vakaitavi ena cakacaka e “vakavuna na tiko yavavala.”

E kaya o Vasiliy Kalin na mata mai na valenivolavola ni iVakadinadina i Jiova e Rusia: “Au nuitaka ni na raica na Mataveilewai e Rostov me tau vakadodonu na lewa vei ira na le 16 era vakararawataki voli ena ka e vauca na nodra vakabauta, mera vagalalataki tale ga mai na veibeitaki.”