Ena ika5 ni Tiseba 2023, e kaya na mataveilewai na Surgut City Court of the Khanty-Mansi Autonomous Area—Yugra mai Rusia, nira cala e le 17 na tacida. E okati kina o Brother Yevgeniy Fedin, Brother Artur Severinchik, kei Brother Timofey Zhukov. Era vakatatabutaki na le 17 na tacida mai na ono ina vitu na yabaki qai tolu na vula. Na tacida yalewa e vakatatabutaki me tolu na yabaki, tolu na vula. Era na sega ni biu e valeniveivesu ena gauna qo.

1. Feperueri 15, 2019

   Era vaqaqara na ovisa ena levu nodra vale na tacida e Surgut, kei na so na siti voleka. Ratou mokulaki e vitu na tacida ena gauna ratou vakatarogi kina. Ratou qai vesu me ratou wawa veilewai e tolu na tacida tagane, wili kina o Yevgeniy Fedin kei Artur Severinchik

2. Maji 7, 2019

   Vakataulewataka na mataveilewai me sere o Artur ni oti e 21 na siga nona vesu tu

3. Epereli 11, 2019

   Sere o Yevgeniy ni oti e voleka ni rua na vula nona vesu tu. E vakatabui me gole ena dua tale na vanua, veitaratara kei ira eso tale, se vakayagataka na internet

4. Janueri 16, 2020

   Vakataulewataka na turaganilewa me lai dikevi ena valenibula ni mate ni vakasama o Brother Timofey Zhukov. E kaya na dauveivaqaqai me caka qori ni sega ni via sauma na nodratou taro. Qori e dua na dodonu e volai ena lawa na Article 51 of the Constitution of the Russian Federation. E qai kerea o Brother Timofey me veisautaki na lewa qori

5. Feperueri 5, 2020

   Oti na veilewai era vesuki Brother Timofey na ovisa. E se bera ni tauca na mataveilewai na macala ni nona kerekere, ia era kauti koya na ovisa ena dua na valenibula ni mate ni vakasama e Yekaterina. E rauta ni 1,200 na kilomita na kena yawa, e qai lai curu tu me 14 na siga

6. Maji 5, 2020

   Kaya na mataveilewai ni cala nona vesu tu o Brother Timofey ena valenibula qori

7. Okotova 19, 2021

   Kaya na mataveilewai me saumi o Brother Timofey ena nona vesu vakatawadodonu

8. Noveba 12, 2021

   Ni rogoci na nona kisi, era vakayagataka na loya na ivakadinadina ni veika tawadodonu era cakava vua na vakailesilesi. Ya na nona mokulaki, beitaki vakailasu, kei na nodra ivakamacala na kenadau era veitovaki. E kerea na loya me kau lesu tale na nona kisi vei ratou na dauveibeitaki

9. Noveba 15, 2021

   Kaya na turaganilewa ni sega ni muri na lawa ena nona vaqaqai, ia e sega ni vakadonuya me kau lesu nona kisi vei ratou na dauveibeitaki

Eda nuidei ni o Jiova ena tokoni ratou tiko o Yevgeniy, o Artur, o Timofey, kei ira kece na mataveitacini era raica tiko “na ka e sega ni rairai” nira vosota na veivakacacani.—2 Korinica 4:17, 18.