JULAI 26, 2022 | IROGO VOU: TISEBA 6, 2023
RUSIA

IROGO VOU—BEITAKI NIRA CALA ESO NA TACIDA | Era Vosota Tiko ga ena Marau

SARAVA/ROGOCA

Ena ika5 ni Tiseba 2023, e kaya na mataveilewai na Surgut City Court of the Khanty-Mansi Autonomous Area—Yugra mai Rusia, nira cala e le 17 na tacida. E okati kina o Brother Vasiliy Burenesku, Brother Viktor Fefilov, Brother Igor Kobotov, Brother Igor Petrov, Brother Leonid Rysikov, Brother Igor Trifonov, Brother Pavel Romashov kei na watina o Sister Viola Shepel. a Era vakatatabutaki na le 17 na tacida mai na ono ina vitu na yabaki, tolu na vula. O Sister Shepel e vakatatabutaki me tolu na yabaki, tolu na vula. Era na sega ni biu e valeniveivesu ena gauna qo.

Veitaravi ni Gauna

Feperueri 15, 2019

Era vaqaqara na ovisa ena levu nodra vale na tacida e Surgut, kei na so na siti voleka. Ratou mokulaki e vitu na tacida ena gauna ratou vakatarogi kina. Ratou vesu e tolu na tacida tagane, e qai vakaroti e dua tale na tacida tagane me curu ena valenibula ni mate ni vakasama
Okotova 3, 2019

Okati ena lisi ni lewenivanua era vakavuna na tikoyavavala o Brother Viktor, Brother Igor Kobotov, Brother Igor Petrov, Brother Leonid, Brother Igor Trifonov, Brother Pavel kei Sister Viola
Okotova 10, 2019

Okati o Vasiliy ena lisi ni lewenivanua era vakavuna na tikoyavavala
Julai 23, 2020

Caka tale na vaqaqara ena vale nei Brother Igor Petrov, ratou qai kauta na ovisa e levu na ka e taukena
Okotova 29, 2021

Tekivu veilewaitaki

Kedratou iTukutuku

Igor Kobotov

Sucu: 1973 (Apsheronsk, Yasayasa o Krasnodar)

Me baleti koya: Tauri ivola ena koronivuli ni ivakatagi. E rua na yabaki nona lewena tu na mataivalu. Oti e cakacaka ena kabani ni waiwai, kei na kasi

E kila ni vakainaki na bula ni vulica na iVolatabu ni yabaki 23. Papitaiso ena 1996. Rau vakamau kei Yuliya ena 2005, qai dua na luvedrau tagane

Ka e Tukuna

Cava e vukei iko me donu tiko ga nomu rai ena ituvaki o sotava?

Au vakasamataka nona ivakaraitaki o Taniela, kei na vuna e biu kina ena qara ni laione . . . Gauna ya e sega na nona loya, e sega na mataveilewai me rawa ni kerea me veisau na lewa e tau, e sega tale ga na mataveitacini e veiyasa i vuravura mera tokoni koya, se mera volavola vua. Noqu dau vakasamataka vakatitobu na itukutuku vakaivolatabu, qori e vukei au meu kila ni na sega tu ga ni tau vakadodonu na lewa ena vuravura qo. E bibi gona meda dau raica na sala e vukei keda kina o Jiova ena ituvaki eda sotava tiko.

Pavel Romashov

Sucu: 1974 (Tomsk, Yasayasa o Tomsk)

Me baleti koya: Susugi koya o tinana. E cakacaka ena dua na kabani ni waiwai, kei na kasi. Rau vakamau kei Viola ena 2003, qai dua na luvedrau yalewa

Rau vulica vakaveiwatini na iVolatabu. E vakila o Pavel na yaga ni kena muri na ivakavuvuli vakaivolatabu ena nona vuvale. E uqeti koya na nodra veilomani, kei na nodra veikauaitaki na mataveitacini ena ivavakoso. Rau papitaiso vakaveiwatini ena 2004

Ka e Tukuna

Cava e vukei iko mo lomavakacegu ni caka e nomu vale na vaqaqara?

Ni bera niu mai iVakadinadina i Jiova, au dau yadra (guard) tu ena dua na tabana ni matanitu me lima na yabaki. Au kila vinaka gona na kena dau caka na vaqaqara, veivaqaqai kei na kisi ni basulawa.

Ia se mani vacava na levu ni ka au kila au rawa ni cakava ena ituvaki qori, na gauna au sotava kina dua na ka noqu domobula. Gauna vata qori, . . . Au masulaka meu kua ni rere, qai lomani ira tiko ga na kequ meca. O ira na ovisa era na cakava ga na nodra itavi, ra qai sega ni kila na dina ni ka kece e yaco

Viola Shepel b

Sucu: 1976 (Stepnogorsk, Kazakhstan)

Me baleti koya: E nasi ena nodra valenibula na gone. Rau vakamau kei Pavel ena 2003, qai dua na luvedrau yalewa

Rau vulica vakaveiwatini na iVolatabu. E taleitaka o Viola na isau vakaivolatabu ni taro e dau vaqaqa tu me baleta na Kalou, na inaki ni bula, kei na sala meda veiyaloni kina kei ira eso tale. Rau papitaiso vakaveiwatini ena 2004

Ka e Tukuna

E tokoni iko vakacava o Jiova?

Vica vata na yabaki noqu lomabibi tu. Gauna au dau vakila kina qori na imatai ni ka au cakava au na masu vei Jiova, niu kila au na sega ni rawa ni walia ga vakai au na ituvaki qori. Oti au na qiriti ira eso na tacida yalewa meu taroga se ra vakacava tiko. Era sotava tale tu ga na ituvaki dredre, eso na gauna era na vinakata noqu veivuke, se me keimami veitalanoa tu ga. Au dau vakila na vakacegu niu vosa vei ira. Au vakadeitaka kina niu sega ni tu taudua, au lewena tale ga e dua na vuvale levu.

Eda nuidei se mani vacava na ‘rarawa, na veika dredre, veivakacacani se veika rerevaki’ era sotava na tacida, o Jiova ena lomani ira qai tokoni ira tiko ga. Era na “qaqa ga.”—Roma 8:35, 37.

a b E sega ni veisau na yaca e dau vakayagataka ni bera ni vakawati.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU