NOVEBA 6, 2023 | IROGO VOU: TISEBA 26, 2023
RUSIA

IROGO VOU—⁠VESU E TOLU NA TACIDA | Ratou Vesu ia Ratou Marau Tiko Ga

SARAVA/ROGOCA

Ena ika22 ni Tiseba 2023, e kaya na mataveilewai na Cheryomushkinskiy District Court of Moscow mai Rusia, ni cala o Brother Sean Pike, Brother Aleksandr Rumyantsev, kei Brother Eduard Sviridov. O Sean e vesu me vitu na yabaki, o Aleksandr e vesu me vitu na yabaki, ono na vula. O Eduard e vesu me ono na yabaki, ono na vula. Tekivu mai na vakatatabu ena 2017, qori e dua na itotogi balavu duadua. Ratou sa vesu qai wawa veilewai tiko ena gauna qo.

Kedratou iTukutuku

Sean Pike

Sucu: 1971 (Georgetown, Guyana)

Me baleti koya: Toki i Rusia me lai vuli ena univesiti. E cakacaka sara vakaidinia

E sotavi ira na iVakadinadina i Jiova ni vuli tiko ena univesiti. E qoroya na ivakasala vuku ena iVolatabu. Papitaiso me iVakadinadina i Jiova ena 1997

Rau vakamau kei Tatyana ena 2001. E rua na luvedrau yalewa

Ka e Tukuna na Watina o Tatyana a

Cava e vukei kemudrau vakaveiwatini mo drau vosota na tu veiyawaki ena rua na yabaki sa oti?

Ni se qai tekivu, e dredre sara ga vei keirau. Keirau vakila na rere, rarawa, oti keirau sa qai ciqoma na ituvaki. Dua na ka e vukei watiqu na nodra veitokoni na mataveitacini e veiyasa i vuravura. Keitou dau volavola tale ga vua vakaveitinani, qai vakadeitaka vua ni keitou lomani koya. O Jiova tale ga e kauaitaki koya vakalevu tekivu mai na gauna e vesu kina. Dua na ka e vakacegui au na noqu dau vakasamataka vakatitobu na ka e kaya na Same 18:16, 19: “E tatara sobu mai cake, e tauri au qai dreti au mai na wai titobu. E kauti au ina dua na vanua ni veitaqomaki, e vakabulai au, ni marautaki au.” Na vosa “wai titobu” au lai vakasamataka kina ni valeniveivesu e vakavuna neirau tu veiyawaki. Au sega ni rawa ni tiko e yasana meu vukei koya, ia o Jiova e rawa ni dodoka na ligana me taqomaki Sean.

Aleksandr Rumyantsev

Sucu: 1977 (Moscow, Yasayasa o Moscow)

Me baleti koya: E dau draivataka nodra motoka na vakaitutu (chauffeur). Ni bera ni vesu, e dau qaravi tinana e lokiloki

Vulica na iVolatabu kei ira na iVakadinadina i Jiova ni via kila na ka dina e tu kina. Papitaiso ena 2006

Ka e Tukuna

E tokoni iko vakacava o Jiova ena gauna o vesu tu kina?

E veivakacegui niu kila nira masulaki au tiko na mataveitacini e veiyasa i vuravura. Qo e dua na sala e vukei au kina o Jiova. E se qai vakadua qo meu vakila na totolo ni nona sauma o Jiova na noqu masu. Au vakila na lomavakacegu. Au lai nanuma kina na ka e tukuni ena 2 Korinica 1:5: “Ni levu dina na ka rarawa eda sotava ena noda vakabauti Karisito, eda vakacegui tale ga vakalevu ena vuku i Karisito.” Qori e vakamarautaki au vakalevu.

Eduard Sviridov

Sucu: 1964 (Dushanbe, Tajikistan)

Me baleti koya: E kena dau ena draivataki katavila

Rau vakamau kei Yelena ena 1997

E vakatulewataka me wilika taucoko na iVolatabu. Sega ni dede rau sotavi ira na iVakadinadina i Jiova, rau vulica sara na iVolatabu vakaveiwatini. Rau papitaiso ena 1999

Ka e Tukuna

Cava e vukei iko mo marau tiko ga ena gauna o vesu kina?

Noqu dau wili iVolatabu, masu kei na nodra veitokoni na tacida e veiyasa i vuravura e vukei au meu marau tiko ga. E bibi tale ga me donu tiko ga noqu rai. Na noda bula e vaka tiko na itaba, ena rairai vinaka ga na keda itaba nida matadredredre. Niu vakasamataka na kequ ituvaki, au vakavinavinakataki Jiova ni vakayagataka na sala qo me vakavulici au kina. Qori tale ga e dua na sala au rawa ni tauca kina e dua na vosa vua e beitaki koya tiko.—Vosa Vakaibalebale 27:11.

Na nodratou ivakaraitaki o Sean, Aleksandr, Eduard kei na nodratou vuvale, eda vakadeitaka kina ni “vinaka o Jiova, na idrodro ena siga ni rarawa. E kilai ira na qara ivakaruru vua.”—Neumi 1:7.

Veitaravi ni Gauna

Okosita 25, 2021

Caka na vaqaqara ena nodratou vale na tolu na tacida qo, ratou vesu tale ga
Okosita 27, 2021

Vesu qai wawa veilewai o Sean, Aleksandr, kei Eduard
Noveba 14, 2022

Tekivu veilewai

a E sega ni rawa ni vakatarogi o Brother Pike.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU