E tuvaitutu o Mary M. Larimer ena imatai ni kalasi ena Watchtower Bible College of Gilead. a Ia e takali ena ika23 ni Noveba 2023, ni yabaki 103. E sucu ena ika4 ni June 1920 e Scenery e Pennsylvania, mai Merika. Ena 1935, a papitaiso ena dua na soqo ni veiwasewase e caka e Washington, D.C., mai Merika. Qori ni se qai yabaki 15. Oti e va na yabaki e painia tudei qai kilai ni dua na dauvunau gugumatua.

Ena Tiseba 1942, a sureti Mary o Brother Nathan Knorr a liutaka tiko na isoqosoqo ena gauna ya, me vakalewe fomu ni vuli e Kiliati. E vakamacalataki ena fomu qori ni “inaki ni vuli me vakarautaki ira na tacida tagane kei na yalewa ena cakacaka ni daukaulotu e veiyasa i vuravura.” E tukuni tale ga kina: “E lima na vula na vuli . . . Ena vinakati mera vulica vakatitobu na iVolatabu, gugumatua ra qai vakacavara na vuli ena dua na gauna lekaleka.” E totolo ga nona vakalewena o Mary na fomu qai vakauta lesu.

E tekivu na vuli ena imatai ni Feperueri 1943, qai 100 na lewenikalasi. E caka na vuli e South Lansing e Niu Yoka, e Merika. E levu sara na ka e vulica o Mary mai na iVolatabu ena lima na vula e caka tiko kina na vuli. E dua na gonevuli vinaka qai tuvaitutu ena ika23 ni June, 1943.

Oti e lesi sara o Mary me daukaulotu e Cuba. Eso na ituvaki e sotava ena nona ilesilesi vou, e kaya: “Levu e kea era dravudravua. Keimami dau taubale ena cakacaka vakavunau . . . E sega na lori.” Ia e qarava tiko ga o Mary nona ilesilesi me yacova na 1948, ni lesu i Pennsylvania me lai qaravi tinana e mavoa vakaca. Oti e vicasagavulu na yabaki, e marautaka tu nona bula vakadawai ni ogaoga tiko ga ena nona qaravi Jiova. A veiqaravi tiko ena ivavakoso e Glendale, Kalifonia e Merika ena gauna e takali kina.

Nikua, sa tiko na Koronivuli o Kiliati e Patterson e Niu Yoka, era vuli tiko kina na ika155 ni kalasi ena gauna qo. O Brother Mark Noumair e dua na qasenivuli e Kiliati. Ni rogoca nona sa takali o Mary, e kaya: “O Mary Larimer na goneyalewa mai na dua na tauni lailai, e yalorawarawa me lako ena vanua cava ga me tukuna na veika me baleti Jiova. E sega ni kila na vanua e lesi kina, se na lesu tale mai se sega. Me vakataki Mary, o ira tale ga na daukaulotu era lesi mai Kiliati era veivuke ena kena tauyavutaki na tubu ni cakacaka vakavunau e vuravura raraba.”​—Aisea 6:8.