Ena Okosita kei na Seviteba 2024, era vakaitavi na mataveitacini ena cakacaka vakavunau lavotaki ena veivanua e Kenada, qai vuavuaivinaka na veika e yaco kina.

E sivia e le 800 na tacida era vakaitavi ena cakacaka vakavunau lavotaki ena vualiku kei Kenada. Eso vei ira qori era gole e Iqaluit e Nunavut, e Yellowknife ena Vuaira, kei Whitehorse e Yukon. Nira yaco e kea, era biu vakaiwasewase ra qai vodo waqavuka ena 39 na tauni tu yawa kei na koro e sega ni lako kina na lori. Era bole na tacida era pailate e Kenada kei Merika mera kauti ira na tacida ena vanua qori. Na cava e rawati kina? E rauta ni le 275 era vinakata mera vulica na iVolatabu. E tuvanaki sara na sala me tomani kina nodra vuli iVolatabu ena talevoni kei na videoconference.

E veitalanoa e dua na tacida yalewa kei na dua na goneyalewa e cakacaka ena otela ratou tiko kina eso na tacida e Yellowknife. E tukuna sara na goneyalewa qori ni rarawataka na veika e yaco tu e vuravura. E mani vakamacalataka na tacida yalewa na inuinui totoka ena iVolatabu, kei na brochure Marau me Tawamudu! E vinakata sara ga o koya me kila eso tale na ka me baleta na yalayala qori. E mani tuvanaki me tomani na veivosaki ena videoconference.

E rauta ni le 600 na tacida era vunau ena va na vosa ena tolu na siti e Kenada. Eso vei ira qori era vunau ena vosa vakaArapea e Montreal, eso ena vosa vakaJaina (Mandarin) kei na vosa vakaPerisia e Vancouver, eso tale ena vosa vakaPunjabi e Brampton, volekati Toronto. E sivia na le 100 era vinakata mera vulica na iVolatabu.

Rau vunau tiko e Montreal e rua na tacida yalewa, rau sotava sara e dua na goneyalewa ni Arapea. E masulaka tiko vua na Kalou me vukei koya me kila na vuna e yaco tiko kina na veika dredre. Rau wilika sara na tacida na Vakatakila 21:4, qai vakamacalataka na yalayala ni Kalou ni na kauta laivi na mosi kei na rarawa. Dua na ka na nona luluvu. E soli vua na brochure, Marau me Tawamudu! E vinakata tale ga me vulica na iVolatabu.

Rau vodo basi tiko e Vancouver e rua na tacida yalewa rau qai sotava e dua na marama ni Irani. E marau ni rau kidavaki koya na tacida yalewa ena vosa vakaPerisia. E kaya ni sa wilika tiko na iVolatabu ena 15 na yabaki sa oti, ia e dredre me kila na kena ibalebale. Rau vakamacalataka sara vua na tacida na sala ena vukei koya kina na porokaramu ni vuli iVolatabu me kila eso tale na ka me baleta na Vosa ni Kalou. E vakadonuya sara me ratou sota ena siga tarava me tekivu kina nona vuli iVolatabu.

Eda marau nida rogoca na vuavuaivinaka ni cakacaka vakavunau qori. Eda nuidei tale ga ni o Jiova e marautaka na nodra vakuai ira na tacida era vakaitavi kina.—Same 110:3.