Ena ika13 ni Me ina ika2 ni June 2024 e vica vata na udolu na iVakadinadina i Jiova mai Japani era vakaitavi ena dua na vunau lavotaki ena kena vakayagataki na qiqi ena siti o Osaka kei Tokyo. Rauta ni 350 na mataveitacini era sureti mai Ositerelia, Kenada, Varanise, Jamani, Niu Siladi, Sauca Korea kei Merika nira mai tokona na vunau lavotaki.

E sivia ni 15 na milioni na lewenivanua era vakaitikotiko e Tokyo kei Osaka. Era cakacaka vata na dautukutuku kei ira na vulagi era sureti mai ena duidui walewale ni cakacaka vakavunau e matanalevu. Levu sara na tataleitaki e kune kina qai tauyavutaki tale ga e levu na vuli ivolatabu.

Ni duri tiko ena qiqi e dua na tacida yalewa a masulaka me sotava e dua e taleitaka me vulica na ivolatabu. Ni oti ga vakalailai e gole mai e dua na turaga e via vulica sara ga na ivolatabu. Me vaka ni vosa vakaJaina na turaga qori sa qai tuvanaki me sikovi koya e dua na tacida vosa vakaJaina. Ni oti ga e rua na siga sa tekivu tikova na soqoni na turaga qori.

Ni vunau tiko e veivale e dua na tacida yalewa, a sotava sara e dua na marama a taleitaka me sarava na vidio Vuna mo Vulica Kina na iVolatabu? Ni sarava oti na vidio a kaya sara na marama qo,“Au dau vaqaqa sara tu ga na taro kece e tiko ena vidio qo!” A mani ciqoma me vulica na ivolatabu qai tikova sara na soqoni.

Dua na ka nodra marautaka na mataveitacini na nodra veimaliwai kei na nodra veivakayaloqaqataki ena cakacaka vakavunau lavotaki qo. E kaya o Aika e dua na goneyalewa yabaki 20 mai Tatsuno, Japani: “Qo e dua na gauna guiguilecavi dredre dina. Au vakavinavinakataki Jiova niu rawa ni mai vakaitavi ena vunau lavotaki qo.” E kaya o Akihiro e dua na qase ni ivavakoso: “Keimami vakayaloqaqataki sara ga ni keimami cakacaka vata kei ira na mataveitacini mai na veimatanitu. Keimami sa qai marautaka ga vakalevu na cakacaka vakavunau.

Eda vakavinavinakataki ira na mataveitacini ena nodra ‘soli ira vakarawarawa’ mera vakaitavi ena vunau lavotaki qo. Era qai kaila ena “domodra kece nira vakacaucautaki Jiova.”​—Same 110:3; Esera 3:11.