Ena Sigatabu na ika29 ni Okotova 2023, e kacabote e vica na bomu ena vanua e vakayacori kina na soqo ni veiwasewase e Kerala, Idia. Ni takali oti e tolu na tacida, ratou mate tale e dua na tacida tagane kei na rua na tacida yalewa. E dua vei ira na mate e liu na goneyalewa yabaki 12. Ni toso na gauna, e qai mai takali o tinana kei ganena. Era curu tiko e valenibula e 11 na tacida.

Me rawa nira vakayaloqaqataki, e vakadonui na vale ni ivolavola ni tabana e Idia me tuvanaka e dua na soqoni lavotaki me vakayacori ena ika4 ni Noveba 2023. Na soqo ni veiwasewase e kacabote kina bomu, era tiko kina na tacida mai na 21 na ivavakoso. Era qai sureti tale ga ina soqoni lavotaki. E vakayacori na soqo ena dua na vale ni soqoni, ra qai tiko kina e voleka ni le 200. Era qai sema yani ena iyaya vakalivaliva na le 1,300. E vakarautaki tale ga na kena katokatoni vei ratou na curu tiko e valenibula. E vunau e dua na qase ni ivavakoso mai na valenivolavola ni tabana qai vakamacalataka na Same 23:1 qai vakabibitaka na loloma i Jiova. E kaya: “E sega ni vola na daunisame, e iVakatawa o Jiova, se me iVakatawa vinaka. E kaya ni o Jiova e ‘nona ivakatawa.’ E veivakacegui nida kila ni kauaitaki keda yadudua o Jiova!”

E kaya e dua na tacida tagane e donuya na kacabote ni bomu ni dau dredre ni moce. Ia e tu vakarau ni vukei ira na curu tu e valenibula. E kaya: “Niu raica na dei ni nodra vakabauta qai donu tiko ga na nodra rai, e vukei au sara ga meu kua ni lomaleqa. Era mavoa qai vakila na mosi ia era lagata na noda sere ni soqoni ena marau.” E kaya e dua tale na tacida tagane: “Ena taura na gauna me vinaka tale na kedra ituvaki. Ia au vakadeitaka nira na vakila tiko ga na loloma vakaveitacini. Au nuidei ni o Jiova e tokoni ira tiko. Qori e vakayaloqaqataki au sara ga!”

Nida duavata vakamataveitacini, eda lomavakacegu qai nuidei ni o Jiova ena ‘vakabulai ira na ramusu na lomadra qai vauca na nodra mavoa’ na tacida e Idia.​—Same 147:3.