Me rawa ni vunautaki na itukutuku vinaka ena yalava e tarai vakavudua e Gabon. E tuvanaka kina na valenivolavola ni tabana e Cameroon, na cakacaka vakavunau lavotaki ena imatai ni June ina ika31 ni Okosita, 2019. E kena inaki me vunautaki na itukutuku vinaka vei ira na tiko ena siti o: Franceville, Koulamoutou, Lambaréné, Libreville, Makokou, Moanda, Mouila, Oyem, Port-Gentil, kei Tchibanga. Era sureti kina e levu mai na veivanua ena cakacaka lavotaki qori. E okati kina na le 400 na bolecakacaka mai Belgium, Kenada, Varanise, kei Merika.

E sivia na rua na milioni na lewenivanua e Gabon. E tukuni ni 80 na pasede era vakayagataka na vosa ni vanua qori, oya na vosa vakaVaranise. E 30 tale ga na pasede era vosataka nodra vosanisucu, na vosa vakaFang. E vakayagataki gona na vosa ruarua qori ena cakacaka lavotaki qo.

E vakaitikotiko e dua e vosa vakaFang e Bissegue, e Libreville. E taleitaka na veitalanoa vakaivolatabu, e kaya: “Se qai imatai ni gauna meu rogoca kina na itukutuku ni Kalou ena noqu vosa ga!”

Tukuna e dua na tacida yalewa e vakaitavi kina: “Na cakacaka lavotaki qo e ivakaraitaki sara ga ni nodra dau veilomani qai duavata na isoqosoqo i Jiova. O ira na mataveitacini era dauloloma, veiciqomi, yalovinaka, veikauaitaki ra qai dau lomasoli. Au nanuma lesu kina na ka e kaya o Paula me baleta na ivavakoso e Filipai—eda dau ‘duavata ena vakasama, ena loloma, ena lomavata, tautauvata tale ga na noda nanuma.’—Filipai 2:2.