Ena imatai ina ika4 ni Seviteba 2022, era sureti na tacida ena dua na soqo e vakayacori e São Paulo, e Brazil. E vakatokai na 2022 International Trade Fair on Rehabilitation, Inclusion and Accessibility Technologies (Reatech). Qo e dua na soqo levu duadua ena yasayasa vakaLatina, qai vakaraitaki kina na sala e rawa ni vakayagataki kina na iyaya vakalivaliva. Era tiko kina e sivia ni le 46,000.

E vakarautaki e dua na vanua mera vakaraitaka kina na tacida na website na jw.org, na app na JW Library, kei na JW Library Sign Language. E tu tale ga kina na iyaya vakalivaliva mera vakayagataka na vulagi. Era vakaraitaka kina na tacida era mataboko na sala e rawa ni vakayagataki kina noda website, kei na noda porokaramu.

E kaya e dua na kenadau e dau qaravi ira e sega ni vinaka na ituvaki ni yagodra: “Au qoroya na sasaga e cakava na nomuni isoqosoqo lotu moni vukei ira kina e vakaleqai na ituvaki ni yagodra.” E kaya e dua tale na vulagi: “Qo e dua na sala oni vakaraitaka nira kauaitaki tale ga!”

E tiko tale ga ena soqo qori na mata mai na isoqosoqo ni mataboko e Brazil, na National Organization of the Blind in Brazil (ONCB). E kacivaki na soqo ena retio, era vakatarogi tale ga na tacida ena imatai, kei na iotioti ni siga ni soqo. Era vakamacalataka kina ni o keda na iVakadinadina i Jiova eda sega ni vukei ira ga na mataboko, didivara, se o ira na vakaleqai nodra rai e Brazil. Ia eda cakava tiko qori e veiyasa i vuravura. E kaya na mata ni ONCB ni taleitaka vakalevu na ivukevuke era tu ena jw.org me baleti ira na galu, e sega ni se raica ena dua tale na website.

Tekivu mai na gauna makawa me yacova mai qo, e vakaraitaka tu ga o Jiova ni kauaitaki ira vakayalololoma na vakaleqai na ituvaki ni yagodra. (Vunau ni Soro 19:14) Eda nuidei ni marautaka nida vakatotomuria tiko na nona loloma. Eda rai vakanamata ena gauna ‘ena rai kina na matadra na mataboko, ena rogo tale ga na daligadra na didivara.’—Aisea 35:5.