Era tuvanaka na tacida ena yasana o San Luis e Argentina, na soqoni e veimacawa kei na vuli iVolatabu nira sema ena Internet vei ira na kaivesu era cala bibi. Qo se qai imatai ni gauna me caka kina na vunau ena Internet ena valeniveivesu e Argentina.

Sa vakayabaki nodra gole tiko na tacida e San Luis mera lai soqoni qai caka vuli iVolatabu vei ira na kaivesu. Ia e mai vakatabui tu qori ena Maji 2020, ena gauna e tekivu kina na vakatatabu ni matedewa. Era qai vakadonuya na vakailesilesi ni valeniveivesu mera tomana tale nodra vunau na tacida nira vakayagataka na Internet.

E marautaka vakalevu na dairekita ni valeniveivesu na kena yaga na ituvatuva era cakava na tacida vei ira na kaivesu. Nikua rau sa dau tiko tale ga ena soqoni vakaveiwatini. Qo na ka e kaya: “Ni sega ni dua e mai sikovi ira tiko na kaivesu, ena yaga vakalevu vei ira na soqoni mera toro voleka kina vua na Kalou, ra qai mamarau tale ga. Keitou qoroya tale ga vakalevu na kena yaga na soqoni ena nodra veimaliwai vinaka na kaivesu, era sa sega kina ni veivala. Dua na ka na neimami vinakata mera veisau na kaivesu, mera qai lai yaga ena gauna era sere kina. E veivuke sara ga kina vakalevu na veika era vulica ena iVolatabu.”

Qo na ka e vola e dua na kaivesu vei ira na tacida era tuvanaka na cakacaka vakavunau e valeniveivesu. E kaya: “Na veigauna kece au dau tiko kina ena soqoni . . . e dau seavu na oca, noqu lomaleqa, rarawa, vakabibi niu vesu tu. Au dau marautaka dina. Vinaka vakalevu.”

Ni veitauvi tiko qo na matedewa, e vakayaloqaqataki keda nida kila nira saga tiko ga na tacida mera vukei ira eso tale mera vakila na yaga ni kena muri na ka e tukuna na iVolatabu.—Aisea 48:17, 18.