12 SEVITEBA, 2019
ANGOLA
Vakayacori na Soqo ni Tabacakacaka ena Keba ni iSenivalu
Ena ika25 ina ika26 ni Me, 2019 e caka na soqo ni tabacakacaka e kena usutu, “Mo Kaukaua!”ena keba ni isenivalu e Lóvua. E rauta ni 1,022 na kilomita na kena yawa mai na koroturaga o Luanda, e Angola. E vakayacori na porokaramu ena vosa vakaLingala kei na vosa vakaTshiluba. Era le 177 na dautukutuku, kei na nodra vuvale era tiko ena keba qori. Ia e rauta na le 380 era tiko ena porokaramu vosa vakaLingala, e le 3 tale ga ratou papitaiso. Era le 630 era tiko ena vosa vakaTshiluba, qai le 6 ratou papitaiso.
Levu na mataveitacini era dro i Lóvua ena vuku ni itovo voravora ena Democratic Republic of the Congo. Eso tale na tacida era sega ni tiko ena soqoni ena so tale na siti ni vakatabui mera veilakoyaki. E tuvanaka kina na valenivolavola ni tabana me caka na soqo ni tabacakacaka ena keba, e tara tale ga e rua na Vale ni Soqoni e rawarawa ga. Na Vale ni Soqoni qori era soqoni kina e tolu na ivavakoso vosa vakaTshiluba, kei na dua na ivavakoso vosa vakaLingala.
Ena ika24 ni Me, 2019, rau gole ena keba ni isenivalu na ivakatawa ni tabacakacaka, kei na mata ena valenivolavola ni tabana me rau lai vakarautaka na gusunivosa kei na buturara. Dua na ka na dredre era sotava na tacida isenivalu, ia era cautaka rawa na tavuleni, kau, dali, vako, kei na so tale na iyaya.
Oti na porokaramu, e kaya o Honoré Lontongo e dua na isenivalu e tiko ena ivavakoso vosa vakaTshiluba: “Dua na ka na ituvaki dredre keimami sotava, ia ni vakayacori na soqo ni tabacakacaka ena keba ni isenivalu qo, keimami vakadinadinataka nona lomani keimami kece o Jiova, qai kauaitaki keimami yadudua. Au marautaka dina qo!”
Eda na nanumi ira tiko ga ena masu na mataveitacini era sa biuta nodra itikotiko ena vuku ni itovo voravora ena nodra vanua. Se mani vanua cava era tu kina na tacida, eda kila o Jiova ena vakarautaka na kedra kakana vakayalo qai tokoni ira tiko ga.—Roma 8:38, 39.
Era tara na tacida na buturara, ra vakarautaka tale ga na gusunivosa
Duri tu e le ono na vakarau papitaiso me ratou sauma na taro ni papitaiso ena vosa vakaTshiluba
Era taubaletaka na tacida e rauta na 2 na kilomita mera lai sarava na papitaiso
Brother Johannes De Jager, e lewe ni Komiti ni Tabana e Angola, kei ira na mataveitacini era vosa vakaLingala
Rawa ni o Wilika Tale ga
ITUKUTUKU VOU
iTukutuku Butakatakata e Venezuela: Toso Tiko ga na Cakacaka Vakayalo ni Sotavi na iTuvaki Dredre
Era sotava na tacida e Venezuela na ituvaki dredre qori, ia era gumatua tiko ga na cakacaka vakavunau.
ITUKUTUKU VOU
Era Dro na Tacida mai na Vuaicake kei Congo ena Vuku ni Tiko Yavavala
O ira na iVakadinadina i Jiova era tokitaki nira dro mai era sa soqoni vata tiko mera sokalou, ra gumatua tale ga na tukuna nodra inuinui ena iVolatabu vei ira eso tale.