Jesus nye Christianfo asafo no ne Tsir. (Ephesusfo 5:​23) Ɔwɔ mu dɛ Jesus wɔ sor dze, naaso ɔnam “akowaa nokwafo nye nyansafo” no do kyerɛ n’ekyirdzifo a wɔwɔ asaase do no kwan. (Kenkan Matthew 24:​45.) Jesus nankasa na oyii dɛm “akowaa” yi, na ɔama no tum dɛ onsisi gyinae ahorow bi. Naaso ɔda ho ara yɛ Christ n’akowaa, na ɔsom Christ no nuanom. Woana nye dɛm akowaa no? Ebɛnadze na ɔyɛ dze hwɛ hɛn?

1. Woana nye “akowaa nokwafo nye nyansafo” no?

Aber biara a Jehovah pɛ dɛ ɔdze akwankyerɛ ma no nkorɔfo no, ɔyɛ a ɔdze fa nyimpa kor anaa mbarimba kakraabi do. (Malachi 2:7; Hebrewfo 1:1) Wɔ Jesus no wu ekyir no, asomafo no nye mpanyimfo a nna wɔwɔ Jerusalem no na wɔdze akwankyerɛ maa Jesus n’ekyirdzifo no. (Asomafo Ndwuma 15:2) Ndɛ so, mpanyimfo kuw kakraabi na wodzi dɛm dwuma no. Wɔfrɛ hɔn Jehovah Adasefo Akwankyerɛ Kuw. Hɔn na wɔboa hɛn ma yɛnye Jehovah ntamu yɛ papa, na hɔnara so na wɔhwɛ asɛnka edwuma a yɛyɛ no do. Dɛm kuw yi nye “akowaa nokwafo nye nyansafo a [Jesus] dze no esi [n’asomfo] do” no. (Matthew 24:​45a) Hɔn a wɔwɔ Akwankyerɛ Kuw no mu no nyinara yɛ Christianfo a Nyankopɔn dze no sunsum krɔnkrɔn asera hɔn, na wɔwɔ enyidado dɛ wowu a, wɔbɔkɔ akɛka Christ ho na wɔnye no aabɔ mu edzi adze wɔ ɔsor Ahendzi no mu.

2. Ebɛnadze na akowaa nokwafo no yɛ dze boa hɛn ma yɛnye Jehovah ntamu yɛ papa?

Jesus kaa dɛ, akowaa nokwafo no ‘bɛma ne mfɛfo Christianfo edziban wɔ ber a ɔsɛ mu.’ (Matthew 24:​45b) Dɛ mbrɛ edziban boa ma yenya apɔwmudzen no, dɛmara so na nkyerɛkyerɛ a ofi Nyankopɔn n’Asɛm mu no boa hɛn ma yenya ahoɔdzen a yehia ama yeetum ayɛ dza Jehovah pɛ, na yeetum so ayɛ edwuma a Jesus dze ama hɛn no. (1 Timothy 4:6) Yenya dɛm nkyerɛkyerɛ yi bi wɔ asafo nhyiamu, ɔmansin nye ɔmantɔw ehyiadzi ahorow ase, nye Bible ho nwoma nye video ahorow mu. Iyinom nyina boa ma yetum hu dza Nyankopɔn pɛ, na ɔma yɛnye no ntamu so yɛ kamakama.

 PƐNSAPƐNSA MU KƆ EKYIR

3. Ɔsɛ dɛ Jehovah n’asomfo nya nhyehyɛɛ bi a wɔdze som no

Akwankyerɛ Kuw no na wɔyɛ Jehovah Adasefo hɔn dwumadzi ahorow nyina ho ntotoe dze, naaso Jesus na ɔkyerɛ hɔn kwan. Aber a Christiansom hyɛɛ ase no, nhyehyɛɛ a ɔtse dɛmara na Nyankopɔn n’asomfo dze yɛɛ edwuma. Ma yɛnhwɛ VIDEO yi.

Ma yɛnkenkan 1 Corinthfo 14:​33, 40, na yensusu asɛmbisa yi ho:

• Ebɛn kwan do na kyerɛwsɛm yi boa hɛn ma yehu dɛ Jehovah pɛ dɛ n’Adasefo nya nhyehyɛɛ papa bi dze som no?

4. Akowaa nokwafo no na ɔyɛ hɛn asɛnka edwuma no ho ntotoe

Nna asɛnka edwuma no nye edwuma a no ho hia Christianfo a wodzi kan no. Ma yɛnkenkan Asomafo Ndwuma 8:​14, 25, na yensusu nsɛmbisa yi ho:

• Aber a Christiansom hyɛɛ ase no, woananom na wɔdze kwan a ɔsɛ dɛ wɔfa do yɛ asɛnka edwuma no ho akwankyerɛ mae?

• Peter na John yɛɛ hɔn adze dɛn aber a hɔn mfɛfo asomafo no dze akwankyerɛ maa hɔn no?

Edwuma a no ho hia paa a Akwankyerɛ Kuw no dze ho akwankyerɛ ma nye asɛnka edwuma no. Ma yɛnhwɛ VIDEO yi.

 Jesus ama yeehu siantsir a asɛnka edwuma no ho hia. Ma yɛnkenkan Mark 13:​10, na yensusu nsɛmbisa yi ho:

• Ebɛnadze ntsi na asɛnka edwuma no ho hia Akwankyerɛ Kuw no paa dɛm?

• Ebɛnadze ntsi na yehia “akowaa nokwafo nye nyansafo” no n’akwankyerɛ ama yeetum aka asɛmpa no wɔ wiadze nyina?

5. Akowaa nokwafo no ma hɛn akwankyerɛ

Akwankyerɛ Kuw no na wɔdze akwankyerɛ ma Christianfo a wɔwɔ wiadze nyina. Wosi dɛn hu akwankyerɛ pɔtsee a ɔsɛ dɛ wɔdze ma? Aber a Christiansom hyɛɛ ase no, hwɛ kwan a akwankyerɛ kuw a nna ɔwɔ hɔ dɛm aber no faa do dze akwankyerɛ mae. Ma yɛnkenkan Asomafo Ndwuma 15:​1, 2, na yensusu nsɛmbisa yi ho:

• Ebɛn asɛm na ɔkɛfaa akasakasa bi baa tsetse Christianfo no mu bi ntamu?

• Henfa na Paul, Barnabas, na afofor kɛgyee akwankyerɛ?

Ma yɛnkenkan Asomafo Ndwuma 15:​12-18, 23-29, na yensusu asɛmbisa yi ho:

• Ansaana akwankyerɛ kuw a nna ɔwɔ hɔ dɛm aber no risi gyinae no, ebɛnadze na wɔyɛe dze hun Nyankopɔn n’adwen wɔ asɛm no ho?—Hwɛ nyiyimu 12, 15, na 28.

Ma yɛnkenkan Asomafo Ndwuma 15:​30, 31 na 16:​4, 5, na yensusu nsɛmbisa yi ho:

• Aber a tsetse Christianfo no nsa kaa akwankyerɛ a ofi akwankyerɛ kuw no hɔ no, wɔyɛɛ hɔn adze dɛn?

• Ebɛn nhyira na ofii setsie a wɔyɛe no mu bae?

Ma yɛnkenkan 2 Timothy 3:​16 na James 1:​5, na yensusu asɛmbisa yi ho:

• Ndɛ, sɛ Akwankyerɛ Kuw no risi gyinae bi a, henfa na wɔhwehwɛ akwankyerɛ?

 DZA ESUA

Akwankyerɛ Kuw no nye “akowaa nokwafo nye nyansafo” a Christ eyi no esi hɔ no. Ɔdze akwankyerɛ na Bible nkyerɛkyerɛ ma Christianfo a wɔwɔ wiadze nyina.

Mbobɔdo

• Woana na oyii “akowaa nokwafo nye nyansafo” no sii hɔ?

• Ebɛnadze na Akwankyerɛ Kuw no yɛ dze hwɛ hɛn do?

• Ana egye dzi dɛ Akwankyerɛ Kuw no nye “akowaa nokwafo nye nyansafo” no?