ADZESUA 53
Fa Ndzɛmba A Jehovah N’enyi Gye Ho Gyegye W’enyi
Jehovah yɛ enyigye Nyankopɔn. (1 Timothy 1:11) Ɔpɛ dɛ hɛn enyi gye wɔ asetsena mu. Ɔsɛ dɛ yɛyɛ edwuma susuampaara dze, naaso sɛ yeyi ber si hɔ dze gye hɛn ahom a, Jehovah n’enyi gye paa. Wɔ adzesua yi mu no, yɛbɔhwɛ mbrɛ yebotum dze ber a yɛdze gye hɛn ahom no ayɛ ndzɛmba a ɔbɛma hɛn ahom aka hɛnho, na ɔbɛma Jehovah so n’enyi agye.
1. Sɛ yɛrepɛ biribi a yɛdze bɛgyegye hɛn enyi a, ebɛnadze na ɔsɛ dɛ yesusu ho?
Sɛ eregye w’ahom a, ɔyɛ a ebɛnadze na eyɛ? Binom wɔ hɔ a hɔn enyi gye ho dɛ wɔbɛtsena fie akenkan buukuu, woetsie ndwom, wɔahwɛ film, anaa wɔakɔ intanɛt do. Binom so dze, hɔn enyi gye ho dɛ wɔnye hɔn anyɛnkofo bopue akɔhwɛ mbea ahorow a hɔ yɛ fɛw, woboguar nsu, anaadɛ wobedzi agor bi. Ɔmmfa ho adze biara a yɛdze bɛgyegye hɛn enyi no, ɔsɛ dɛ yɛhwɛ hu dɛ ɔyɛ “dza ɔsɔ Ewuradze enyi.” (Ephesusfo 5:10) Ebɛnadze ntsi na no ho hia dɛ yɛma dɛm asɛm yi tsena hɛn adwen mu? Dza ɔwɔ mu nye dɛ, ndɛ, ndzɛmba a nkorɔfo dze gyegye hɔn enyi no, no mu pii wɔ hɔ a ndzɛmba a Jehovah n’enyi nngye ho tse dɛ ewudzisɛm, ndwamansɛm, anaa esumansɛm nkotsee na wɔayɛ no ma twom. (Kenkan Ndwom 11:5.) Ntsi, ebɛnadze na obotum aboa hɛn ma yeehu ndzɛmba pa a yebotum dze agyegye hɛn enyi?
Sɛ yɛfa hɔn a wɔdɔ Jehovah no nyɛnko a, wobotum ahyɛ hɛn nkuran ma yɛdze ndzɛmba a ɔfata no aagyegye hɛn enyi. Dɛ mbrɛ yehunii wɔ Adzesua 48 mu no, sɛ ‘enye enyansafo nantsew a, ibohu nyansa.’ Naaso, sɛ da biara yɛnye hɔn a wɔmmfa Nyankopɔn ne mbra nnyɛ hwee no bɔ a, hɛnho ‘bɛhyehye hɛn,’ kyerɛ dɛ, obowie hɛn bɔn.—Mbɛbusɛm 13:20.
2. Ebɛnadze ntsi na ohia dɛ yɛhwɛ ber dodow a yɛdze gyegye hɛn enyi no yie?
Sɛ ndzɛmba a yɛdze gyegye hɛn enyi no mpo yɛ papa a, ɔsɛ dɛ yɛhwɛ yie paa na yaannsɛɛ ber pii wɔ ho. Annyɛ dɛm a, annhwɛ a yerinnya ber pii mmfa nnyɛ ndzɛmba a no ho hia paa no. Bible no tu hɛn fo dɛ yɛmfa ber a yenya no ndzi dwuma pa.—Kenkan Ephesusfo 5:15, 16.
PƐNSAPƐNSA MU KƆ EKYIR
Ma yɛnhwɛ ndzɛmba a ɔsɛ dɛ edze gyegye w’enyi nye ber dodow so a ɔsɛ dɛ edze gye w’enyi no ho nsɛm pii.
3. Mma mmfa ndzɛmba a ɔmmfata nngyegye w’enyi
Ebɛnadze ntsi na ɔsɛ dɛ yɛhwɛ ndzɛmba a ɔyɛ a yɛdze gyegye hɛn enyi no yie? Ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛn kwan do na ndzɛmba a nkorɔfo dze gyegye hɔn enyi ndɛ no tse dɛ agor a nna wodzi wɔ tsetse Rome no?
-
Wɔ video no mu no, ebɛnadze na Danny hunii faa ndzɛmba a yɛdze gyegye hɛn enyi no ho?
Ma yɛnkenkan Romefo 12:9, na yensusu asɛmbisa yi ho:
-
Sɛ erohwehwɛ biribi a edze bɛgyegye w’enyi a, kyerɛwsɛm yi besi dɛn aboa wo?
Ndzɛmba a Jehovah kyir no, bi nye dɛn? Ma yɛnkenkan Mbɛbusɛm 6:16, 17 na Galatiafo 5:19-21. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:
-
Ndzɛmba a wɔkaa ho asɛm wɔ kyerɛwnsɛm yi mu no, no mu hendze na etaa hu dɛ nkorɔfo dze gyegye hɔn enyi ndɛ?
Nsɛmbisa a obotum aboa wo ma eesi ndzɛmba a edze bɛgyegye w’enyi ho gyinae pa
Bisa woho dɛ:
-
Aso biribi wɔ mu a Jehovah kyir?
-
Aso ɔma ɔyɛ dzen ma me dɛ mibenya ber dze ayɛ ndzɛmba a no ho hia paa no?
-
Aso ɔma metaa nye hɔn a wɔnndɔ Jehovah no bɔ fɛkuw?
Sɛ ihu biribi a obotum dze wo akɔto esian mu a, ɔbɛyɛ papa dɛ etwe woho fi ho koraa. Dɛmara so na sɛ ihu dɛ adze bi a ɔyɛ a edze gyegye w’enyi no botum asɛɛ ɔwo na Jehovah ntamu a, ɔsɛ dɛ etwe woho fi ho
4. Fa wo ber dzi dwuma yie
Ma yɛnhwɛ VIDEO yi, na yensusu asɛmbisa a odzi do no ho.
-
Ɔwɔ mu dɛ nna asɛm biara nnyi ndzɛmba a nna onua a ɔwɔ video no mu no hwɛ no ho dze, naaso nna ebɛnadze na ɔyɛ ne haw?
Ma yɛnkenkan Philippifo 1:10, na yensusu asɛmbisa yi ho:
-
Ebɛn kwan do na kyerɛwsɛm yi botum aboa hɛn ma yeehu ber dodow a ɔsɛ dɛ yɛdze gye hɛn enyi?
5. Fa ndzɛmba a ɔfata gyegye w’enyi
Ɔwɔ mu dɛ ndzɛmba a nkorɔfo dze gyegye hɔn enyi no bi wɔ hɔ a Jehovah n’enyi nngye ho dze, naaso yɛwɔ beberee so wɔ hɔ a, ɔnodze, asɛm biara nnyi ho. Ma yɛnkenkan Ɔsɛnkafo 8:15 na Philippifo 4:8, na yensusu asɛmbisa yi ho:
-
Ndzɛmba pa a ɔyɛ a edze gyegye w’enyi no, bi nye dɛn?
Ibotum dze ndzɛmba a ɔfata agyegye w’enyi
BINOM KA DƐ: “Sɛ medze ndzɛmba a ewudzisɛm, ndwamansɛm, anaa esumansɛm wɔ mu no gyegye m’enyi a, ɔnnyɛ hwee. Dza ohia ara nye dɛ merennyɛ dɛm ndzɛmba no bi.”
-
Sɛ obi ka dɛm a, ebɛn asɛm na ebɛka akyerɛ no?
DZA ESUA
Jehovah pɛ dɛ yɛdze ndzɛmba a ɔfata gyegye hɛn enyi.
Mbobɔdo
-
Ebɛn ndzɛmba na ɔnnsɛ dɛ Christianfo dze gyegye hɔn enyi?
-
Ndzɛmba a yɛdze gyegye hɛn enyi no, ebɛnadze ntsi na ɔsɛ dɛ yɛyɛ ahwɛyie paa na yaannsɛɛ ber pii wɔ ho?
-
Ebɛnadze ntsi na epɛ dɛ edze ndzɛmba a Jehovah n’enyi gye ho no gyegye w’enyiwa?
HWEHWƐ PII KA HO
Woana na ɔsɛ dɛ ɔkyerɛ hɛn ndzɛmba a ɔsɛ dɛ yɛdze gyegye hɛn enyi?
“Aso Jehovah Adasefo Bra Sene, Mbuukuu Anaa Ndwom Ahorow Bi?” (Asɛm bi a ɔwɔ wɛbsaet do)
Hwɛ mbrɛ ibotum ehu ndzɛmba pa a ɔsɛ dɛ edze gyegye w’enyi aber a eregye w’ahom no.
“Aso Mfaso Wɔ Ndzɛmba A Edze Gyegye W’enyi No Do?” (Ɔweɔn-Aban, October 15, 2011)
Kenkan asɛm a wɔato dzin “Miyii Ɔtan Hun Fii Mo Mu” no, na hwɛ siantsir a owura bi sesaa ndzɛmba a nna ɔdze gyegye n’enyi no.
“Bible No Sesa Nyimpa N’abrabɔ” (Ɔweɔn-Aban, February 1, 2010)
Hwɛ video video yi, na ibohu dza ɔbaatan bi yɛe aber a esumansɛm puei wɔ sene bi a nna ɔrohwɛ mu no.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
