ADZESUA 14
Ebɛnadze Na Ɔwɔ Dɛ Yɛyɛ Ama Nyankopɔn Aagye Hɛn Som Ato Mu?
Dɛ mbrɛ yehunii wɔ adzesua a odzi iyi enyim mu no, nnyɛ ɔsom nyina na Nyankopɔn gye to mu. Naaso, yebotum asom hɛn Bɔfo no wɔ kwan bi do a ɔbɛma ɔagye hɛn som ato mu. Ebɛn “nyamesom” na Nyankopɔn gye to mu? (James 1:27) Ɔwodze, ma yɛnhwɛ dza Bible no ka.
1. Ɔwɔ dɛ yɛdze hɛn som gyina ebɛnadze do?
Ɔwɔ dɛ yɛdze hɛn som gyina Bible no do. Jesus kaa kyerɛɛ Nyankopɔn dɛ: “W’asɛm yɛ nokwar.” (John 17:17) Ɔsom ahorow bi mmfa nokwar a ɔwɔ Nyankopɔn n’Asɛm Bible mu no nnyɛ edwuma. Wɔdze nyimpa nkyerɛkyerɛ nye atsetsesɛm ahyɛ nokwar a ɔwɔ Bible mu no ananmu. Hɔn a ‘wɔpow Nyankopɔn ne mbra no,’ Jehovah n’enyi nngye hɔnho. (Kenkan Mark 7:9.) Naaso, sɛ yetsie Nyankopɔn n’asɛm, na yedzi dza Bible no ka no ekyir pɛpɛɛpɛ a, yɛma n’enyiwa gye.
2. Ebɛn kwan na ɔwɔ dɛ yɛfa do som Jehovah?
Jehovah nye hɛn Bɔfo, ntsi ɔno nkotsee na ɔfata dɛ yɛsom no. (Nyikyerɛ 4:11) Iyi kyerɛ dɛ ɔno nkotsee na ɔwɔ dɛ yɛdɔ no na yɛsom no, na sɛ yɛrosom no so a, onnyi dɛ yɛfa ohonyi anaa mfonyin biara do som no.—Kenkan Isaiah 42:8.
Ɔwɔ dɛ hɛn som yɛ ‘krɔnkrɔn na ɔsɔ Jehovah n’enyi.’ (Romefo 12:1) Iyi kyerɛ dɛ ɔwɔ dɛ yedzi ne mbra do. Dɛ mfatoho no, hɔn a wɔdɔ Jehovah no gye ne mbra a ɔfa awar ho no to mu, na wodzi do. Afei so wɔnnom towa anaa tobacco, wɔnnom ndubɔn, na wɔmmbow nsa. Wɔtwe hɔnho fi ndzeyɛbɔn a ɔtsetse dɛm ho. a
3. Ebɛnadze ntsi na ɔwɔ dɛ yɛnye hɛn mfɛfo agyedzifo bɔ mu som Jehovah?
Nhyiamu a yɛkɔ no dapɛn biara no ma yenya ho kwan dze ‘yi Jehovah ayɛw wɔ asafo no mu.’ (Ndwom 111:1, 2) Kwan kor a yɛfa do yɛ iyi nye dɛ yɛbɔtow ayɛyindwom ama Nyankopɔn. (Kenkan Ndwom 104:33.) Jehovah dɔ hɛn, ntsi na ɔse yenhyia mu daa no, na onyim so dɛ dɛm a yɛbɛyɛ no na ɔbɛma yenya enyigye daa. Wɔ nhyiamu ahorow no ase no, yɛhyɛ afofor nkuran, na hɔn so wɔhyɛ hɛn nkuran.
PƐNSAPƐNSA MU KƆ EKYIR
Ma yɛnhwɛ siantsir a Jehovah nngye ehonyi a wɔdze dzi dwuma wɔ ɔsom mu no nnto mu. Afei so yebohu kwan pa a yebotum afa do eyi Nyankopɔn ayɛw.
4. Onnyi dɛ yɛdze ehonyi dzi dwuma wɔ hɛn som mu
Yesi dɛn hu dɛ Nyankopɔn mmpɛ dɛ yɛfa ehonyi do som no? Ma yɛnhwɛ VIDEO yi, na yensusu asɛmbisa a odzi do no ho.
-
Wɔ Bible mber mu no, aber a Nyankopɔn no nkorɔfo binom yɛɛ dɛ wɔbɛfa ohonyi bi do asom no no, ebɛn asɛm na osii?
Nyimpa binom tse nka dɛ sɛ wɔfa ehonyi anaa mfonyin bi do som Nyankopɔn a, nna ɔbɛma wɔabɛn no. Naaso sɛ wɔyɛ dɛm a, aso ɔno mbom remma Nyankopɔn nntwe noho mmfi hɔnho? Ma yɛnkenkan Exodus 20:4-6 na Ndwom 106:35, 36, na yensusu nsɛmbisa yi ho:
-
Ebɛn ndzɛmba anaa mfonyin na ehu dɛ nkorɔfo dze dzi dwuma wɔ hɔn som mu?
-
Jehovah tse nka dɛn wɔ ehonyi na mfonyin a wɔdze dzi dwuma wɔ ɔsom mu no ho?
-
Ehwɛ a ɔyɛ papa dɛ yɛdze ehonyi anaa mfonyin dzi dwuma wɔ hɛn som mu a? Ebɛnadze ntsi na ereka dɛm?
5. Sɛ yɛsom Jehovah nkotsee a, ɔma yɛdze hɛnho fi nsusui a ɔnnyɛ nokwar ho
Sɛ yɛsom Jehovah wɔ kwan a ɔfata do a, ɔbɛma yɛadze hɛnho efi nsusui a ɔnnyɛ nokwar ho. Ma yɛnhwɛ VIDEO yi, na yebohu iyi ho asɛm.
Ma yɛnkenkan Ndwom 91:14, na yensusu asɛmbisa yi ho:
-
Sɛ yɛsom Jehovah nkotsee dze kyerɛ dɛ yɛdɔ no a, ɔahyɛ bɔ dɛ ɔbɛyɛ ebɛnadze ama hɛn?
6. Yɛsom Nyankopɔn wɔ asafo nhyiamu ase
Sɛ yɛtow ndwom na yɛma mbuae wɔ asafo nhyiamu ase a, yeyi Jehovah ayɛw na yɛhyɛ afofor so nkuran. Ma yɛnkenkan Ndwom 22:22, na yensusu nsɛmbisa yi ho:
-
Sɛ ekɔ asafo nhyiamu ase a, nkyɛ inya mfaso fi mbuae a wɔma no mu, anaa ɔnntse dɛm?
-
Aso ebɛpɛ dɛ isua mbuae bi na ema?
7. Sɛ yɛka dza yesua no bi kyerɛ afofor a, ɔma Jehovah n’enyiwa gye
Yebotum afa akwan pii do aka nokwasɛm a ɔwɔ Bible mu no bi akyerɛ afofor. Ma yɛnkenkan Ndwom 9:1 na 34:1, na yensusu asɛmbisa yi ho:
-
Ebɛnadze na esua wɔ Bible no mu a ebɛpɛ dɛ eka ho asɛm kyerɛ obi fofor?
BINOM KA DƐ: “Nyamesom dze ɔwɔ akoma mu, ntsi kwan biara a ebɛfa do asom Nyankopɔn no ɔgye to mu.”
-
Edwen ho dɛn?
DZA ESUA
Sɛ yɛbɔsɔ hɛn Bɔfo no enyi a, ɔwɔ dɛ yɛsom ɔno nkotsee, yeyi no ayɛw wɔ asafo nhyiamu ase, na yɛka dza yeesua no bi kyerɛ afofor.
Mbobɔdo
-
Ebɛnadze na ɔwɔ dɛ yɛdze hɛn som gyina do? Ebɛnadze ntsi a?
-
Ebɛnadze ntsi na ɔwɔ dɛ yɛsom Jehovah nkotsee?
-
Ebɛnadze ntsi na ɔwɔ dɛ yɛnye hɔn a wɔpɛ dɛ wɔsɔ Nyankopɔn enyi no bɔ mu som?
HWEHWƐ PII KA HO
Sɛ ekenkan asɛm a wɔato dzin “Mennda Ho Nnsom Abosom Bio” no a, ibohu mbrɛ ɔyɛe a maame bi gyaa abosonsɔr.
Hwɛ adze a ɔbɔboa wo ma eetum ama mbuae wɔ asafo nhyiamu ase.
Nna ɔyɛ dzen ma aberantsɛ bi dɛ ɔbɔkɔ asafo nhyiamu, naaso ɔbɔɔ mbɔdzen kɔree na onyaa do mfaso. Hwɛ dza ɔboaa no.
Nyimpa pii gye dzi dɛ mbeamudua no gyina hɔ ma Christiansom. Naaso, ana ɔsɛ dɛ yɛdze mbeamudua dzi dwuma wɔ hɛn som mu?
a Yebohu dɛm ndzeyɛɛ yi ho nsɛm pii ekyir yi.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
