1-3. Ebɛn adaduadan na wɔdze hɛn nyina ato mu? Ebɛn kwan do na Jehovah bɛgye hɛn nyina efi dɛm tsebea yi mu?

FA NO dɛ woebu wo atsɛn wɔ bɔn bi a ɔnnyɛ ɔwo na eyɛe ho ma wɔdze wo rokɔto efiadze wo nkwa nda nyina. Innyi enyidado biara dɛ wobeyi wo efi efiadze hɔ. Enyidado nyina asã na hwee nnyi hɔ a ibotum ayɛ wɔ tsebea no ho. Naaso, aber a w’enyidado nyina asã no, obi a ɔwɔ tum a obotum agye wo bɔɔ wo anohoba dɛ ɔbɔboa wo! Ebɛtse nkã dɛn?

² Wɔdze hɛn nyina ato owu adaduadan mu. Ɔmmfa ho dza yɛbɛyɛ biara no, yennkotum agye hɛnho. Naaso, Jehovah wɔ tum a obotum dze agye hɛn efi owu mu. Ɔabɔ anohoba dɛ, “ɔtamfo a odzi ekyir a ɔbɛma ɔayɛ kwa, nye owu.”​—1 Corinthfo 15:26.

³ Susu enyigye a ibenya ber a owu nnyi hɔ bio no ho hwɛ! Naaso, nnyɛ owu nko na Jehovah beyi efi hɔ. Mbom no, obenyan hɔn a woewuwu dadaw no so aba nkwa mu bio. Susu mfaso a iyi bɛma enya no ho hwɛ. Jehovah abɔ anohoba dɛ, asaase bɛsan eyi “n’ewufo egu.” (Isaiah 26:19) Iyi na Bible no frɛ no owusoɛr no.

4. (a) Ebɛnadze na obotum ama hɛn awerɛkyekyer ber a obusuanyi bi anaa nyɛnko berɛbo bi ewu no? (b) Nna woananom nye Jesus n’anyɛnkofo pa no bi?

⁴ Sɛ hɛn busuanyi bi anaa hɛn nyɛnko berɛbo bi wu a, ɔma yedzi awerɛhow paa. Yɛtse nkã dɛ yerunntum nngyina ano. Biribiara nnyi hɔ a yebotum  ayɛ dze no aba nkwa mu bio. Naaso, Bible no ma hɛn awerɛkyekyer a odzi mu. (Kenkan 2 Corinthfo 1:3, 4.) Jehovah na Jesus wɔ ɔpɛ dɛ wobenyan hɛn adɔfo aba nkwa mu bio. Ma yensusu nhwɛdo kor a ɔma yehu dɛm no ho. Ber a nna Jesus wɔ asaase do no, nna ɔtaa kɛsera Lazarus nye no nuanom mbaa, Mary na Martha. Nna hɔn baasa nyina yɛ Jesus n’anyɛnkofo pa. Bible no kã dɛ: “Jesus dɔɔ Martha nye no nuabaa nye Lazarus.” Naaso, da kor bi, Lazarus wui.​—John 11:3-5.

5, 6. (a) Aber a Jesus hun Lazarus n’ebusuafo nye n’anyɛnkofo dɛ worusũ no, ebɛnadze na ɔyɛe? (b) Ebɛnadze ntsi na ɔyɛ awerɛkyekyer dɛ yebohu mbrɛ Jesus tsee nkã wɔ owu ho?

⁵ Jesus kɔree kɛkyekyeer Martha na Mary werɛ. Ber a Martha tsee dɛ Jesus reba no, ɔkɔree kehyiaa no. N’enyi gyee dɛ ohun Jesus, naaso ɔsee Jesus dɛ: “Sɛ ewɔ ha a, nkyɛ mo nuabanyin ennwu.” Martha susui dɛ Jesus kyɛree ana ɔreba. Iyi ekyir no, Jesus hun Martha no nua Mary dɛ ɔno so rusũ. Awerɛhow a nna woridzi a Jesus hunii no maa ɔtsee yaw nkã na osũi. (John 11:21, 33, 35) Ɔtsee yaw kɛse a yedzi aber a hɛn dɔfo bi ewu no nkã.

⁶ Sɛ yehu dɛ mbrɛ yɛtse nkã wɔ owu ho no, dɛmara so na Jesus tse nkã wɔ ho a, ɔma yenya awerɛkyekyer. Jesus tse dɛ n’Egya ara pɛr. (John 14:9) Jehovah wɔ tum dɛ oyi owu fi hɔ na ɔnnkɛkyɛr koraa ma ɔaayɛ dɛm.

7, 8. Ebɛnadze ntsi na Martha ammpɛ dɛ woyi ɔbo no fi ɔbodan no ano, naaso ebɛnadze na Jesus yɛe?

⁷ Aber a Jesus dur ɔbodan a wɔdze Lazarus no fun ato mu ho no, nna wɔdze ɔbo kɛse ehin ano. Jesus see  dɛ: “Hom nyi ɔbo no.” Naaso, nna Martha mmpɛ dɛ wɔbɛyɛ dɛm, osiandɛ nna Lazarus no fun edzi “ndaanan” wɔ ɔbodan no mu dadaw. (John 11:39) Nna Martha innyim dza Jesus rebɛyɛ dze aboa no nuabanyin no.

⁸ Jesus see Lazarus dɛ: “Fir bra!” Dza nna odzi hɔ a Martha na Mary hunii no yɛ nwanwa. “Nyia owui no firii bae: nda mu atam kyekyer ne nan nye ne nsa.” (John 11:43, 44) Woenyan Lazarus aba nkwa mu bio! Ɔasan abɛkã n’ebusuafo nye n’anyɛnkofo ho bio. Wobotum esuo no mu, ayɛ no etuu na wɔnye no abɔ nkɔmbɔ. Jesus enyan Lazarus efi owu mu. Anwanwadze bɛn ara nye yi!

9, 10. (a) Woana na ɔmaa Jesus tum a ɔdze nyaan nkorɔfo fii owu mu no? (b) Ebɛnadze ntsi na owusoɛr ho kyerɛwtohɔ ahorow no som bo ma hɛn?

⁹ Aso Jesus nankasa no tum na ɔdze nyaan nkorɔfo? Oho. Ansaana Jesus ribenyan Lazarus no, ɔbɔɔ Jehovah mpaa na Jehovah maa no tum a ɔdze nyaan Lazarus no. (Kenkan John 11:41, 42.) Nnyɛ Lazarus nkotsee nye obi a wonyaan no fii ewufo mu. Bible no kã ɔbabaa bi a oedzi mfe 12 ho asɛm kyerɛ hɛn. Nna ɔbabaa yi yar paa. Nna n’egya, Jairus, n’abaw mu ebu ma ntsi, ɔserɛɛ Jesus dɛ ɔnsa ne babaa no yar. Nna ababaa no yɛ ne ba kortsee. Aber a ɔnye Jesus rekasa no, mbarimba bi bae bɛsee dɛ: “Wo babaa no ewu: eda ho haw Kyerɛkyerɛfo no ayɛ dɛn?” Naaso, Jesus see Jairus dɛ: “Mma nnsuro, na gye dzi ara, na obenya nkwa.” Afei, ɔnye Jairus bɔɔ mu kɔr ne fie. Aber a wodur fie hɔ no, Jesus hunii na ɔtsee nkorɔfo a nna worusũ no.  Jesus see hɔn dɛ: “Mma hom nnsũ: onnwui, na ɔada.” Ibia abofra no n’egya nye ne nã hɔn adwen mu yɛɛ hɔn naa wɔ dza nna Jesus repɛ akyerɛ no ho. Jesus yii obiara edzi fii hɔ na ɔfaa abofraba no n’egya nye ne nã na ɔnye hɔn kɔr ɔdan a abofraba no da mu no mu. Jesus suoo abofraba no ne nsamu bɔkɔɔ na ɔsee no dɛ: “Akataasia, mese wo dɛ, Nyan.” Hwɛ enyigye ara a n’awofo nyae ber a hɔn ba no soɛɛr ntsɛmara na ɔnantsewee no! Jesus enyan hɔn babaa no efi owu mu. (Mark 5:22-24, 35-42; Luke 8:49-56) Ofi dɛm ber no rokɔ no, sɛ wohu hɔn babaa no a, wɔbɛkãa dza Jehovah nam Jesus do ayɛ ama hɔn no. *

¹⁰ Hɔn a Jesus nyaan hɔn fii owu mu no, ekyir yi wɔsanee wuwui. Naaso, hɔn ho nsɛm a yɛkenkan wɔ Bible no mu no yɛ dza ɔsom bo, osiandɛ ɔma yenya enyidado a ɔyɛ paara. Jehovah pɛ dɛ onyan nkorɔfo fi owu mu, na ɔbɛyɛ so.

11. Ebɛnadze na Ɔsɛnkafo 9:5 ma yehu fa Lazarus ho?

¹¹ Bible no kã ma no mu da hɔ kofee dɛ, “ewufo dze, wonnyim biribiara.” Nna iyi yɛ nokwar wɔ Lazarus n’afamu. (Ɔsɛnkafo 9:5) Dɛ mbrɛ Jesus kãe no, nna ɔtse dɛ mbrɛ Lazarus ada. (John 11:11) Aber a nna Lazarus wɔ nda no mu no, nna ‘onnyim biribiara.’

12. Yesi dɛn hu dɛ, Lazarus no wusoɛr no sii ankasa?

 ¹² Aber a Jesus nyaan Lazarus no, nyimpa pii hunii. Nna Jesus n’atamfo mpo nyim dɛ ɔayɛ dɛm anwanwadze yi. Nna Lazarus enya nkwa efi owu mu na iyi dzii dase dɛ no wusoɛr no sii ankasa. (John 11:47) Bio so, nyimpa pii kɔree kɛseraa Lazarus. Dza ofii mu bae nye dɛ, nyimpa pii gyee dzii dɛ Nyankopɔn na ɔsomaa Jesus. Jesus n’atamfo enyi anngye asɛm yi ho, ntsi wɔfaa apam dɛ woboku Jesus na Lazarus nyina.​—John 11:53; 12:9-11.

13. Ebɛnadze ntsi na yebotum agye edzi dɛ Jehovah benyan ewufo?

¹³ Jesus kãa dɛ, wobenyan “hɔn a wɔwɔ nda mu nyina” efi owu mu. (John 5:28) Ntsi, hɔn a Jehovah kaa hɔn no nyina bɔsoɛr efi owu mu aba nkwa mu bio. Naaso, sɛ Jehovah benyan obi efi owu mu a, ɔsɛ dɛ ɔkaa biribiara a ɔfa dɛm nyimpa no ho. Ana obotum akaa biribiara? Susu ho hwɛ o, nworaba ɔpepepem pii na wɔwɔ hɔ; na Bible no kã dɛ, Jehovah nyim nworaba biara ne dzin. (Kenkan Isaiah 40:26.) Ntsi sɛ ɔkaa nworaba biara ne dzin a, nna ɔnodze, ɔbɛyɛ mberɛw koraa dɛ ɔbɛkaa biribiara a ɔfa hɔn a obenyan hɔn efi owu mu aba nkwa mu bio no ho. Dza ɔsen biara no, Jehovah na ɔbɔɔ adze nyina, ntsi yenyim dɛ ɔwɔ tum a ɔdze benyan nkorɔfo aba nkwa mu bio.

14, 15. Ebɛnadze na Job n’asɛm no ma yehu fa owusoɛr no ho?

¹⁴ Nna ɔnokwafo Job gye owusoɛr no dzi. Obisaa dɛ: “Sɛ nyimpa wu a, ana ɔbɛtsena ase bio?” Afei, ɔsee Jehovah dɛ: “Ɔwo ebɛfrɛ, na emi so magye wo do: Ibenya akɔndɔ wɔ wo nsaano edwuma ho.” Ampaara, nna Job nyim dɛ Jehovah n’enyi gyina dɛ obenyan ewufo aba nkwa mu bio.​—Job 14:13-15.

 ¹⁵ Owusoɛr ho enyidado no ma etse nkã dɛn? Ibia ibebisa woho dɛ, ‘M’ebusuafo na m’anyɛnkofo so ɛ, ana wobenyan hɔn so efi owu mu aba nkwa mu bio?’ Ɔyɛ awerɛkyekyer dɛ yebohu dɛ Jehovah n’enyi gyina dɛ, obenyan ewufo aba nkwa mu bio. Ma yɛnhwɛ dza Bible no kã fa hɔn a wobenyan hɔn nye beebi a wɔbɛtsena no ho.

16. Ebɛn asetsena na hɔn a wobenyan hɔn efi owu mu no benya wɔ asaase yi do?

¹⁶ Hɔn a wonyaan hɔn fii owu mu wɔ tsetseber mu no sanee bɛkãa hɔn ebusuafo nye hɔn anyɛnkofo ho bio wɔ asaase yi do. Iyi bɛsan esi bio daakye, naaso ɔbɛyɛ dza odzi mu sen iyi koraa. Ebɛnadze ntsi a? Osiandɛ hɔn a wobenyan hɔn aba nkwa mu bio wɔ asaase yi do no benya hokwan atsena ase daa na worunnwu bio. Wɔbɛtsena wiadze a ɔyɛ soronko koraa fi wiadze a yɛtse mu ndɛ no ho. Ɔyɛ wiadze a owu, emumuyɛ nye yarba nnyi mu.

17. Woananom na wobenyan hɔn efi owu mu?

¹⁷ Woananom na wobenyan hɔn efi owu mu? Jesus kãa dɛ, “hɔn a wɔwɔ nda mu nyina bɛtse me ndze, na woefir edzi.” (John 5:28, 29) Ampaara, nyimpa ɔpepepem pii a woewuwu no bɛsan atsena ase bio. Bio so, ɔsomafo Paul kãa dɛ, wobenyan “hɔn a wɔtsen nye hɔn a wɔnntsen” efi owu mu. (Kenkan Ndwuma 24:15.) Iyi kyerɛ dɛn?

18. Woananom nye “hɔn a wɔtsen” a wobenyan hɔn efi owu mu no?

¹⁸ Jehovah n’asomfo anokwafo a wɔtsenaa asaase do ansaana Jesus reba no kã “hɔn a wɔtsen” no ho.  Wobenyan nyimpa bi tse dɛ Noah, Abraham, Sarah, Moses, Ruth nye Esther efi owu mu ma wɔaabɛtsena asaase do. Ibotum akenkan nsɛm a ɔfa dɛm mbarimba na mbaa yi mu bi ho wɔ Hebrewfo tsir 11 no mu. Na Jehovah n’asomfo anokwafo a wowuwu wɔ hɛn mber yi mu no so ɛ? Hɔn so “wɔtsen,” ntsi wobenyan hɔn efi owu mu.

19. Woananom nye “hɔn a wɔnntsen” no? Ebɛn hokwan na Jehovah dze bɛma hɔn?

 ¹⁹ Nyimpa ɔpepepem pii a woennya hokwan ennsũa Jehovah ho adze no kã “hɔn a wɔnntsen” no ho. Kaansa woewuwu mpo a, Jehovah no werɛ mmfiir hɔn. Obenyan hɔn aba nkwa mu bio na wobenya hokwan esũa no ho adze na wɔaasom no.

20. Ebɛnadze ntsi na ɔnnyɛ obiara na wobenyan no aba nkwa mu bio?

²⁰ Aso iyi kyerɛ dɛ wobenyan obiara a oewu aba nkwa mu bio? Oho. Jesus kãa dɛ nyimpa binom rinnya owusoɛr. (Luke 12:5) Woana na ɔbɛkyerɛ dɛ wobenyan osimesi anaa ɔbentsen? Jehovah na ɔyɛ Ɔtsɛmbuafo kɛse no, naaso ɔama Jesus tum dɛ ɔnyɛ “atseasefo nye ewufo ɔtsɛmbuafo.” (Ndwuma 10:42) Obiara a woebu no atsɛn dɛ ɔyɛ omumuyɛfo a ɔannsesã n’akwan no rinnya owusoɛr.​—Hwɛ Nsɛm bi a Wɔakyerɛ Mu 19.

21, 22. (a) Ebɛn kwan do na wonyan obi kɔ sor? (b) Woana na odzi kan a wonyaan no kɔr sor?

²¹ Bible no san kyerɛkyerɛ hɛn dɛ, nyimpa binom bɛtsena sor. Sɛ wonyan obi kɔ sor a, nnyɛ honam nyimpadua na ɔdze soɛr fi owu mu. Mbom no, wonyan no kɔ sor dɛ sunsum abɔdze.

²² Jesus nye obi a odzi kan a onyaa owusoɛr a ɔtse dɛm. (John 3:13) Aber a wokum Jesus no, ndaansa ekyir no Jehovah nyaan no fii ewufo mu. (Ndwom 16:10; Ndwuma 13:34, 35) Woennyan Jesus dɛ honam abɔdze. Ɔsomafo Peter kã Jesus ho asɛm dɛ, “wokum no honam mu, na wɔmaa onyaa nkwa wɔ sunsum mu.” (1 Peter 3:18) Wonyaan Jesus baa nkwa mu  dɛ sunsum abɔdze a ɔwɔ tum! (1 Corinthfo 15:3-6) Naaso, Bible no ma yehu dɛ wobenyan binom so dɛ esunsum abɔdze.

23, 24. Woananom nye “oguankuw ketseaba” a Jesus kãa hɔn ho asɛm no, na hɔn dodow yɛ ahen?

²³ Ber tsiaa bi mu ana Jesus rubowu no, ɔkãa kyerɛɛ n’esuafo anokwafo no dɛ: “Morokɔ ekesiesie beebi mama hom.” (John 14:2) Iyi kyerɛ dɛ, wobenyan n’ekyidzifo no mu binom ma wɔaakɛkã no ho wɔ sor. Hɔn mu dodow ahen? Jesus kyerɛɛ dɛ ɔbɛyɛ hɔn mu nyimpa kakraabi, iyinom na ɔfrɛɛ hɔn “oguankuw ketseaba” no. (Luke 12:32) Ɔsomafo John kyerɛɛ hɔn dodow pɔtsee ber a ohun dɛ Jesus “gyina [ɔsor] Zion bepɔw do, na mpemɔhaeduanananan [144,000] ka no ho” no.​—Nyikyerɛ 14:1.

²⁴ Ebɛn aber na wobenyan Christianfo a hɔn dodow si 144,000 no akɔ sor? Bible no ma yehu dɛ ɔbɛyɛ ber a Christ ahyɛ ase ridzi tum wɔ sor no. (1 Corinthfo 15:23) Yɛtse dɛm ber no mu ndɛ, na woenyan 144,000 no mu dodowara kɔ sor dadaw. Hɔn a wɔaka a wɔda ho wɔ asaase do a wobowu wɔ hɛn aber do no, wobenyan hɔn amonmu akɔ sor. Naaso, nyimpa dodow no ara na daakye wobenyan hɔn ma wɔaabɛtsena Paradise wɔ asaase do.

25. Ebɛnadze na yebosũa wɔ tsir a odzi hɔ no mu?

²⁵ Ɔnnkɛkyɛr koraa, Jehovah bɛgye nyimpa nyina efi owu mu. Iyi ekyir no, owu befi hɔ koraa! (Kenkan Isaiah 25:8.) Naaso hɔn a wɔbɔkɔ sor no, ebɛnadze na wɔbɔkɔ akɛyɛ wɔ hɔ? Bible no kyerɛ mu dɛ, wɔnye Jesus bɔbɔ mu edzi tum wɔ Ahendzi tumdzi bi mu. Yebosũa dɛm ahendzi no ho nsɛm pii wɔ tsir a odzi hɔ no mu.