TSIR 35

Mibesi Dɛn Ayɛ Nyankopɔn Ne Nyɛnko?

Jeremy hyiaa ɔhaw bi wɔ n’asetsena mu, na iyi maa ohun hia a ohia dɛ ɔfa Nyankopɔn nyɛnko. Ɔkaa dɛ: “Me papa gyaa hɛn ebusua no hɔ kɔree aber a nna m’edzi mfe 12. Da kor anadwe bi, mobɔɔ Jehovah mpaa serɛɛ no dɛ ɔmma me papa nsan mbra fie.”

Jeremy dze awerɛhow kenkaan ne Bible. Asɛm a ɔwɔ Ndwom 10:14 kaa n’akoma paa. Hɔ ka Jehovah ho asɛm dɛ: “Ɔwoara ehu; na ɔwo na ehwɛ ɔhaw na awerɛhow, dɛ edze kitsa wo nsamu: Wo nsamu na ɔbrɛfo dze noho hyɛ; Ɔwo na ayɛ egyanka no boafo.” Jeremy kaa dɛ: “Metsee nka dɛ Jehovah nye me rekasa na ɔrema mehu dɛ ɔyɛ m’Egya, na ɔka moho. Egya biara nnyi a ɔkyɛn Jehovah!”

SƐ IRIHYIA ɔhaw tse dɛ Jeremy nedze no anaa ɔnntse dɛm no, Bible no ma yehu dɛ Jehovah pɛ dɛ ebɛyɛ ne nyɛnko. Nokwasɛm nye dɛ, Bible ka dɛ: “Hom ntwe mpin Nyankopɔn na ɔbɔtwe epin hom.” (James 4:8) Dwen asɛm yi ho hwɛ o. Irunntum mmfa w’enyi nnhu Jehovah Nyankopɔn na ɔnnyɛ wo tsipɛn wɔ kwan biara do, naaso ɔreka akyerɛ wo dɛ bɛyɛ ne nyɛnko!

Naaso, ibotum abɛyɛ Nyankopɔn ne nyɛnko a, obegyina wankasa wo do. Ma yɛnyɛ mfatoho bi. Sɛ idua nhyiren na epɛ dɛ onyin yie a, ɔwɔ dɛ ekɔ do gugu do nsu. Dɛmara so na yɛnye Nyankopɔn ntamu anyɛnkofa no tse. Ebɛnadze na ebɛyɛ ama dɛm anyɛnkofa no mu aayɛ dzen?

No Ho Hia Dɛ Isua Adze

Sɛ ibotum ahyɛ anyɛnkofa a enye obi wɔ no mu dzen a, ogyina ndzɛmba ebien bi do. Ɔnye dɛ enye no bɔbɔ nkɔmbɔ na aayɛ aso etsie no. Dɛmara na enye Nyankopɔn ntamu anyɛnkofa no so tse. Sɛ yɛkenkan Bible no na yɛdwendwen ho a, nna yeritsie Nyankopɔn.​—Ndwom 1:​2, 3.

Bi mpo a eyɛ obi a mmpɛ adzesua. Mbabun pii enyi gye ho dɛ wɔbɔhwɛ TV, wɔbɔbɔ game, anaa wɔnye hɔn anyɛnkofo bopue edzi agor sen dɛ wobosua adze. Naaso, sɛ epɛ dɛ eyɛ Nyankopɔn ne nyɛnko a, ɔwɔ dɛ idzi n’akwankyerɛ do. Ɔwɔ dɛ isua Bible no na itsie n’asɛm.

Mma mma iyi a ebɛyɛ no nnyɛ dadwen mma wo. Bible a ibosua no nnyɛ adzesoa. Sɛ eyɛ obi a w’enyi nngye adzesua ho mpo a, w’enyi botum abɛgye Bible no sua ho. Adze a odzi kan a ɔwɔ dɛ eyɛ nye dɛ ibeyi ber esi hɔ dze esua Bible no. Ababaa bi a wɔfrɛ no Lais kaa dɛ, “Mayɛ nhyehyɛɛ a medze sua Bible no. Mekenkan tsir kor anapa biara. Ɔno nye adze a midzi kan yɛ.” Maria so yɛ ababaa a oedzi mfe 15, na ɔno so wɔ nhyehyɛɛ fofor. Ɔkaa dɛ, “Mekenkan Bible no ne fa kakra anadwe biara ansaana mada.”

Sɛ epɛ dɛ eyɛ nhyehyɛɛ dze sua adze a, ibotum ahwɛ  adakaba a ɔwɔ krataafa 292 no. Afei paw da nye ber a epɛ dɛ edze bɛyɛ minitsi 30 sua Nyankopɔn n’Asɛm, na kyerɛw ahyɛ ase ha.

․․․․․

Ber a ibeyi esi hɔ no yɛ n’ahyɛse kɛkɛ. Sɛ ehyɛ ase dɛ irusua Bible no a, ibohu dɛ saana ɔnnyɛ ber nyina na ne yɛ da famu. Bi a enye banyimba bi a oedzi mfe 11 a wɔfrɛ no Jezreel no bɛyɛ adwen. Ɔkaa no pen dɛ, “Bible no ne fa bi wɔ hɔ a, ɔyɛ dzen dɛ ebɛtse ase na ne kenkan so yɛ enyihaw.” Sɛ dɛm na etse nka a, mma mmpa abaw. Mbom, fa hyɛ w’adwen mu dɛ, aber biara a ebɛkenkan Bible no, nna eregye ber etsie wo nyɛnko Jehovah Nyankopɔn. Ewiei koraa no, ibohu dɛ nsi na ahokeka a edze bosua Bible no, ɔno na ɔbɛma enya mfaso efi mu na w’enyi so aagye!

Mpaabɔ Ho Hia

Mpaabɔ yɛ kwan a yɛfa do nye Nyankopɔn kasa. Dwen hokwan kɛse a ɔtse dɛm ho hwɛ! Ibotum nye Jehovah Nyankopɔn akasa ber biara na ɔayɛ krado dɛ obetsie wo. Dza ɔkyɛn iyi no, ɔpɛ dɛ otsie dza ewɔ ka kyerɛ no. Iyi ntsi na Bible no tu hɛn fo dɛ: “Adze nyina mu hom mfa asɔr nye nkotoserɛ nye ndaase mma hom ebisadze ndu Nyame asowa mu.”​—Philippifo 4:6.

Kyerɛwsɛm yi kyerɛ dɛ ndzɛmba pii wɔ hɔ a ibotum aka ho asɛm akyerɛ Jehovah wɔ mpaabɔ mu. No mu bi nye ɔhaw ahorow a irihyia nye dadwen a ahyɛ wo do no. Bi so nye dɛ, ibotum ada Jehovah ase wɔ ndzɛmba pa a wo nsa aka no ho. Aso iyi nnyɛ adze a eyɛ no daa wɔ wo da biara da asetsena mu anaa? Ibotum ada Jehovah ase osiandɛ ɔayɛ bi ama wo sen nyɛnko biara.​—Ndwom 106:1.

Ndzɛmba bi a epɛ dɛ eda Jehovah ase wɔ ho no, ibotum akyerɛw ahyɛ ha.

․․․․․

Ɔda edzi dɛ, ɔtɔ da a ndzɛmba bi ma ebɔ hu na dadwen tum hyɛ wo do. Ndwom 55:22 ka dɛ: “Tow w’adzesoa kyen Ewuradze do, na obosuo wo mu: Ɔremma kwan ma ɔtseneneenyi mmfi n’ananmu da.”

Ndzɛmba a epɛ dɛ eka ho asɛm kyerɛ Nyankopɔn wɔ wo mpaabɔ mu no, ibotum akyerɛw ahyɛ ase ha.

․․․․․

W’asetsena Mu Asɛm

Ɔdze fa Nyankopɔn a ebɛyɛ ne nyɛnko ho no, adze fofor bi so wɔ hɔ a ɔwɔ dɛ ihu. Ɔdwontofo David kaa dɛ: “Ao, hom nsɔ nhwɛ na hom nhu dɛ Ewuradze ye.” (Ndwom 34:8) David toow Ndwom 34 aber a ɔkɔr tsebea bi a ɔyɛ hu mu no. Nna oruguan efi Ɔhen Saul wudzinyi no enyim. Nna ɔyɛ tsebea a ɔyɛ atseetsee paa. Nna onnyi beebiara kɔ gyedɛ Philistiafo a wɔyɛ n’atamfo no nkyɛn. Nna onyim dɛ oewu ewie, ntsi ɔyɛɛ noho dɛ ɔbɔdamfo ama oeetum eguan efi hɔn nsamu.​—1 Samuel 21:10-​15.

David ennya adwen dɛ ne nyansaa dodow ntsi na otumii guanee fii hɔn nsamu. Mbom, ɔkaa dɛ Jehovah na ɔboaa no. Sɛ ehwɛ ndwom a ɔtowee a yɛaka ho asɛm wɔ sor hɔ no a, ɔkae wɔ mu dɛ: “Mohwehwɛɛ Ewuradze, na obuaa me, na oyii me fii mo suro nyinara mu.” (Ndwom 34:4) Sɛ ehwɛ ɔhaw na atseetsee a David faa mu na Jehovah yii no fii mu no a, nna obotum ahyɛ afofor nkuran dɛ, “hom nsɔ nhwɛ na hom nhu dɛ Ewuradze ye.” *

Aso ehyia tsebea bi wɔ w’asetsena mu a ihun dɛ Jehovah ne nsa wɔ wo do? Sɛ dɛm a, ibotum akyerɛw ahyɛ ase hɔ. Apɔ bi nye yi: Onnyi dɛ ɔyɛ asɛm kyenkyen biara. Obotum ayɛ mboa nketsenketse a yenya no wɔ hɛn daa daa asetsena mu. No mu binom wɔ hɔ a yebu no dɛ ɔnnyɛ hwee.

․․․․․

Bi a w’awofo dze Bible no akyerɛkyerɛ wo. Sɛ dɛm a, nhyira no bi ara nye no. Naaso, ɔwɔ dɛ ekɔ do dɛ enye Nyankopɔn bɛfa nyɛnko. Sɛ ennyɛɛ dɛm a, nsɛm a ɔwɔ dɛm tsir yi mu no botum aboa wo ma aayɛ dɛm. Jehovah behyira mbɔdzen a ebɔbɔ no do. Bible ka dɛ: “Hom mbisa na wɔbɛma hom; hom nhwehwɛ na hom bohu; hom mbɔ mu na wobobue hom.”​—Matthew 7:7.

KENKAN IYI HO NSƐM PII WƆ TSIR 38 NA 39 WƆ ƆFA 1

TSIR A ODZI HƆ MU NO

Aso ɔyɛ dzen ma wo dɛ ebɛka Nyankopɔn ho asɛm akyerɛ nkorɔfo? Sua mbrɛ ibesi aka wo gyedzi ho asɛm akyerɛ nkorɔfo.

[Ase Hɔ Asɛm]

KYERƐWSƐM TSITSIR

“Nhyira aka sunsum mu ehiafo.”​—Matthew 5:3.

NYANSAHYƐ

Sɛ ekenkan Bible no ne nkrataafa anan da biara a, ondu afe no, nna akenkan Bible mu no nyina ewie.

ANA INYIM . . . ?

Nokwasɛm nye dɛ, buukuu yi a erekenkan na edze no mu asɛm a ofi Bible no mu reyɛ edwuma no kyerɛ dɛ Jehovah rotwe wo abɛn no.—John 6:44.

DZA ƆSƐ DƐ MEYƐ!

Sɛ mubotum enya pii efi Bible a murusua no mu a, ɔsɛ dɛ ․․․․․

Sɛ mepɛ dɛ mokɔ do bɔ mpaa daa a, ɔsɛ dɛ ․․․․․

Dza mebɛpɛ mibisa m’awofo wɔ asɛm yi ho nye ․․․․․

EDWEN HO DƐN?

● Mibesi dɛ ama m’ankorankor adzesua aakɔ do ayɛ enyigye?

● Nyimpa a mfom wɔ hɛnho no, ebɛnadze ntsi na Jehovah pɛ dɛ otsie hɛn mpaabɔ?

● Mibesi dɛn ama me mpaabɔ eetu mpon?

[Mfonyin]

Aber a meyɛ ɔbabun no, nna asɛm kor noara na dabaa meka ho asɛm wɔ me mpaabɔ mu. Dɛm ntsi, mobɔɔ mbɔdzen dɛ da biara, mebɛka dza ɔkɔr yie nye dza annkɔ yie wɔ da no mu ho asɛm wɔ me mpaabɔ mu. Nda nyina nnyɛ pɛ, ntsi iyi boaa me ma me mpaabɔ annyɛ asɛm kor noara.’’—Eve

[Adakaba/Mfonyin]

 Hwehwɛ Bible No Mu Kɔ Ekyir

1. Paw Bible mu asɛm bi a epɛ dɛ ekenkan. Bɔ mpaa hwehwɛ nyansa ama eetum atse ase.

2. Kenkan asɛm no yie. Sie abotar na kenkan. Twa dza erekenkan no ho mfonyin wɔ w’adwen mu. Fa w’adwen nyina si dza erekenkan no do: Bɔ mbɔdzen hu dza ɔrokɔ do, nsɛm a nyimpa a wɔwɔ mu no reka, tsebea a nyimpa a wɔwɔ hɔ no wɔ mu, edziban a woridzi, nye dza ɔkeka ho. Fa w’adwen yɛ dza erekenkan no ho mfonyin!

3. Dwendwen dza akenkan no ho. Bisa woho nsɛm bi tse dɛ:

● Ebɛnadze ntsi na Jehovah maa wɔkyerɛɛw dɛm asɛm yi wɔ Bible no mu?

● Nyimpa a Bible no reka hɔnho asɛm no, hɔn mu woana na ibotum esuasua no, ebɛn asɛm na ɔwɔ mu a ɔyɛ kɔkɔbɔ ma wo?

● Ebɛn esuadze na ɔwɔ mu a mubotum dze abɔ me bra?

● Ebɛnadze na asɛm yi ma muhu fa Jehovah nye mbrɛ osi yɛ n’adze ho?

4. Bɔ Jehovah mpaa ber a ewie no. Ka dza esua nye mbrɛ epɛ dɛ edze dza esua no bɔ wo bra no ho asɛm kyerɛ Jehovah wɔ mpaabɔ mu. Da Jehovah ase aber nyina wɔ n’Asɛm, Nwoma Krɔnkrɔn Bible no a ɔdze ama wo dɛ akyɛdze no ho!

[Mfonyin]

“W’asɛm yɛ kandzea ma m’anan, na kan ma mo kwan.”—Ndwom 119:105.

[Adakaba/Mfonyin]

Fa Ndzɛmba A Ohia No Dzi Kan

Aso innya adagyer mmbɔ mpaa? Aso innya adagyer innsua Bible no? Mpɛn pii no, iyi fi mbrɛ yesi toto ndzɛmba wɔ hɛn asetsena mu.

Sɔ iyi hwɛ: Fa bokitsi na fa mbobaa akɛse kakra gu mu. Afei, fa dɛtse gu mu ma ɔnyɛ ma. Seseiara, enya bokitsi a mbobaa na dɛtse gu mu ma.

Hue mbobaa no na dɛtse no fi bokitsi no mu, naaso mma nntow nngu. Afei, san fa gu mu bio. Dɛm aber yi dze, dzi kan fa dɛtse no gu bokitsi no mu, ɔno ekyir no ana mbobaa no aba. Aso mbobaa no benya kwan wɔ mu? Minngye ndzi. Siantsir nye dɛ idzii kan dze dɛtse no guu bokitsi no mu ana mbobaa no reba.

Ebɛnadze na yesua fi mu? Bible no ka dɛ yɛnhwehwɛ ndzɛmba a no ho hia paa no. (Philippifo 1:10) Sɛ edze ndzɛmba nketsenketse bi tse dɛ enyigyedze dzi kan wɔ w’asetsena mu a, irinnya adagyer mma ndzɛmba a no ho tse dɛ ndzɛmba a ɔfa Nyankopɔn no som ho. Naaso sɛ edze afotu a Bible no dze ma no dzi dwuma a, ibenya adagyer ama ndzɛmba a ɔfa Nyankopɔn n’Ahendzi ho. Afei so, ibenya adagyer kakra so agye wo w’enyi. Ne nyina gyina ndzɛmba a ibedzi kan dze egu bokitsi no mu no do!

[Mfonyin]

Sɛ idua nhyiren na epɛ dɛ onyin yie a, ɔwɔ dɛ ekɔ do gugu do nsu. Dɛmara so na yɛnye Nyankopɔn ntamu anyɛnkofa no tse