Afe a woetwa mu no, awerɛhosɛm bi sii wɔ Ukraine. Ɔno nye dɛ ɔko bi hyɛɛ ase wɔ hɔ. Na Fida, February 24, 2023 na ɔko yi enya afe. Amandzɛɛbɔ ahorow bi kyerɛ dɛ Ukraine na Russia asogyafo bɛyɛ 300,000 na woekunkum hɔn anaa woepirapira hɔn wɔ ɔko yi mu, na amamfo bɛyɛ 30,000 na wɔgye dzi dɛ woewuwu. Naaso, bi a nyimpa dodow a woekunkum hɔn anaa woepirapira wɔ ɔko no mu no dodow bor dɛm.

 Awerɛhosɛm mpo nye dɛ, biribiara nnyi hɔ a ɔkyerɛ dɛ ɔko no bɛba ewiei ndɛ na ɔkyena yi.

•   “Bɛyɛ afe nye yi na Russia asogyafo too hyɛɛ Ukraine do, naaso yennhun biribiara a ɔkyerɛ dɛ ɔko yi bɛba n’ewiei enyim enyim yi ara. Yerunntum nnkyerɛ ɔfa a oridzi konyim na ɔfa a oridzi ɔkogu, na afa ebien yi mu biara nnyɛɛ krado dɛ wobesiesie hɔn ntamu ma ɔko no aba n’ewiei.”​—NPR (National Public Radio), February 19, 2023.

 Ɔko a ɔrokɔ do wɔ Ukraine nye mbea ahorow no ama nkorɔfo pii ridzi awerɛhow osiandɛ dɛm akokoeko yi ama nyimpa pii a hɔnho nnyi asɛm reberɛ paa na woruhu amandze so. Ebɛn enyidado na Bible no dze ma hɛn? Aso akodzi tun botwa da bi?

 Bible no ka ɔko bi ho asɛm. Dɛm ɔko no bɛgye adasamba nkwa, Bible no frɛ no Har-Magedon, na ɔka dɛ ɔyɛ ‘Adze Nyina Do Tumfo Nyankopɔn ne da kɛse ko.’ (Nyikyerɛ 16:14, 16) Nyimpa tumdzi dzi ako na wɔsɛɛ ndzɛmba pii. Ntsi Nyankopɔn nam Har-Magedon do bɛsɛɛ nyimpa tumdzi ahorow nyina. Har-Magedon ko no bɛma asomdwee aba wiadze nyina. Sɛ epɛ dɛ ihu mbrɛ iyi besi ayɛ yie a, kenkan nsɛm a odzidzi do yi:

•   “Ebɛnadze Nye Har-Magedon Ko No?”

•   “Armageddon Is Good News!”