Hwɛ dza asɔfo mpanyimfo bi a wɔdeda nsɔr ahorow bi ano ayɛ afa ɔko a ɔrokɔ do wɔ Ukraine no ho:

•   “Sɔfopɔn Kirill a ɔda Russia Orthodox Asɔr no ano no nnkaa hwee mmfaa dza Russia reyɛ no ho . . . . Akɔhwisɛm ahorow a n’asɔr no da ho ara reka afa Ukraine ho no na Putin gyina do dze yiyi noho ano wɔ ɔko a ɔrokɔ do no ho.”​—EUobserver, March 7, 2022.

•   “Sɔfopɔn Kirill . . . gyina Russia n’ekyir dzendzenndzen dɛ, dza ne man Russia dze reyɛ Ukraine no ka kwan a wɔfa do ko tsia bɔn no ho.”​—AP News, March 8, 2022.

•   “Ɔpanyin a ɔda Ukrainian Orthodox Church asɔr no ano, Metropolitan Epiphanius I a ɔwɔ Kyiv, hyiraa ne mamfo no wɔ Dwowda no dɛ ‘wɔnko ntsia Russiafo a wɔato ahyɛ hɔn do no’ . . . [Ɔpanyin no] sanee dze kaa ho dɛ sɛ woku Russia nsordaafo a, ɔnnyɛ bɔn.”​—Jerusalem Post, March 16, 2022.

•   “Hɛn [Ukrainian Council of Churches and Religious Organizations (UCCRO)] dze, yɛtaa Ukraine nsordaafo nye hɔn a wɔroko agye ɔman no ekyir, yehyira mbɔdzen a wɔrobɔ dze ako agye Ukraine ɔman no efi atamfo nsamu no do, na yɛbɔ mpaa ma hɔn.”​—UCCRO a Statement, February 24, 2022.

 Edwen ho dɛn? Ana ɔsɛ dɛ asɔr ahorow a wɔka dɛ wodzi Jesus Christ n’ekyir no hyɛ hɔn asɔrmba nkuran ma wɔko? Ebɛn asɛm na Bible no ka?

Mbrɛ ɔsom ahorow dze hɔnho agyegye akodzi mu

 Abakɔsɛm ma yehu dɛ, ofi tsetse besi ndɛ nyina ɔsom ahorow hyɛ da ara yɛ dɛ gyama wɔpɛ asomdwee, naaso ɔnntse dɛm. Ebɔhwɛ mu paa no, nna ɔyɛ hɔn na wɔpen akodzi do, wɔsosɔw do, na ɔtɔ da mpo a, hɔnara na wɔkɛfa ɔko no ba. Mfe pii nye yi na Jehovah Adasefo ama obiara ehu dɛ ɔsom ahorow no nnka nokwar. Ɔwodze hwɛ nsɛm ahorow bi a yɛaka ho asɛm wɔ hɛn nwoma ahorow mu:

•   Asɛm a wɔato dzin “The Crusades​—A ‘Tragic Illusion’” ma yehu dɛ nyimpa a wɔkyerɛɛ dɛ wokunkum hɔn wɔ Nyankopɔn na Christ hɔn edzin mu nyina no, nna ɔyɛ Roman Catholic Asɔr no na ɔhyɛ ekyir.

•   Asɛm a wɔato dzin “The Catholic Church in Africa” ma yehu dɛ nna asɔr ahorow no mmpɛ dɛ ebusua ntamu ɔko na mpo nyimpa ekunkumekunkum no do twa.

•   Nsɛm a wɔato dzin “Is Religion to Blame?,” “Religion’s Role in Man’s Wars,” na “Religion Takes Sides” kyerɛɛ dɛ wɔ akodzi pii mu no, ebɔhwɛ no nna Catholic, Orthodox, na Protestant asɔfo taa ɔfa ebien a wɔroko no nyina ekyir.

Ana ɔsɛ dɛ asɔr ahorow a wɔkyerɛ dɛ wɔyɛ Christianfo no sosɔw akodzi do?

 Dza Jesus kae: “Dɔ wo nyɛnko dɛ wankasa woho.” (Matthew 22:39) ‘Hom nkɔ do ndɔ hom atamfo.’​—Matthew 5:44-47.

 Dza Jesus kae: “M’ahendzi mmfi wiadze yi mu: sɛ m’ahendzi fi wiadze yi mu a, nkyɛ m’asomfo bɔko, mma wɔaammfa me annhyɛ Jewfo nsa.” (John 18:36) “Hɔn a wɔfa nkrantsee nyina, nkrantsee anomu na wɔbɛhera.”​—Matthew 26:47-52.

 Susu ho hwɛ: Sɛ nna ɔnnsɛ dɛ Christianfo ko dze bɔ Jesus mpo ho ban a, ehwɛ a ɔsɛ dɛ Christianfo dzi ako dze bɔ adze fofor bi ho ban? Kenkan asɛm a wɔato dzin “Ana Ɔsɛ Dɛ Christianfo Kɔ Ɔko?” no, na ibohu mbrɛ Christianfo a wodzi kan no dzii dza Jesus yɛe nye ne nkyerɛkyerɛ ekyir.

Ebɛn asɛm bɔto ɔsom ahorow a wɔsosɔw akodzi do no?

 Bible no ma yehu dɛ Nyankopɔn mmpen ɔsom ahorow a wɔka dɛ wodzi Jesus ekyir, eso wɔmmfa ne nkyerɛkyerɛ nnyɛ edwuma no do.​—Matthew 7:21-23; Titus 1:16.

•   Bible mu nwoma a wɔfrɛ no Nyikyerɛ no ma yehu dɛ, wɔ Nyankopɔn n’enyiwa do no, dɛm ɔsom ahorow yi dzi “hɔn a woeku hɔn asaase do nyina” hɔn bɔgyaa ho fɔ. (Nyikyerɛ 18:21, 24) Sɛ epɛ dɛ ihu iyi ho nsɛm pii a, kenkan asɛm a wɔato dzin “What Is Babylon the Great?”

•   Jesus ama yeehu dɛ wɔbɛsɛɛ ɔsom ahorow a wɔyɛ ndzɛmba bɔn no osiandɛ Nyankopɔn mmpen do. Dɛ mbrɛ dua biara a ɔnnsow aba pa no “wotwa, na wɔtow kyen gya mu” no, dɛmara na wɔbɛsɛɛ ɔsom ahorow a wɔtse dɛm no so. (Matthew 7:15-20) Sɛ ekenkan asɛm a wɔato dzin “The End of False Religion Is Near!” a, ibohu mbrɛ Nyankopɔn besi asɛɛ hɔn.

Mfonyin ahorow no fibea, ofi bankum kɔ nyimfa: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images