“Sɛ asomdwee bɛba wiadze yi mu a, ɔsɛ dɛ obiara gye nyimpa biara to mu na ɔtse no ase.”​—UNESCO Declaration of Principles on Tolerance, 1995.

 Dza ɔnye iyi bɔ ebira no, sɛ nkorɔfo nngye nyimpa biara nnto mu anaa wɔnntse hɔn ase a, mpɛn pii no ɔma wobu hɔn enyimtsia na wɔtan hɔn mpo. Hɔn a wɔwɔ suban bi a ɔtse dɛm no tum kasa tsia nkorɔfo, wɔyɛ nyimpa mu nyiyimu, na otum mpo ma wɔdze hɔnho hyɛ basabasayɛ mu.

 Naaso, sɛ wɔka dɛ nkorɔfo ngye nyimpa biara nto mu na wɔntse hɔn ase a, ɔsor mbrɛ obiara si tse ase. Binom susu dɛ, sɛ wɔka dɛm a, dza ɔkyerɛ nye dɛ mbrɛ nkorɔfo besi abɔ hɔn bra nye suban biara a wɔbɛda no edzi no, ɔsɛ dɛ wɔgye to mu. Bible ma yehu dɛ obiara wɔ hokwan dɛ ɔkyerɛ dza ɔpɛ nye dza ɔgye dzi. Binom nye dza Bible no ka yi yɛ adwen. Na sɛ ɔkɛba no dɛ dɛm nkorɔfo yi nngye dza nyimpa binom yɛ no nnto mu mpo a, wɔnnkasa nntsia hɔn.

 Ehwɛ a, Bible no botum aboa nkorɔfo ma wɔatse nyimpa nyina ase na wɔagye hɔn ato mu wɔ dɛm wiadze yi mu anaa?

Bible no ma yehu dɛ ɔsɛ dɛ yɛtse obiara ase

 Bible boa hɛn ma yɛtse nyimpa biara ase. Ɔka dɛ: “Hom mma nyimpa nyina nhu dɛ hom tse asɛm ase.” (Philippifo 4:5, NWT) Bible no hyɛ hɛn nkuran dɛ yɛndwen nkorɔfo ho, yembu nyimpa, na yɛnye obiara ndzi no yie. Hɔn a wɔdze dɛm Bible mu asɛm yi yɛ edwuma no, bi a adze bi anaa ɔbra bi a nyimpa bi robɔ no, wɔrennye no nnyɛ adwen anaa wɔrennyɛ dza ɔreyɛ no bi, naaso wɔma no kwan ma nankasa bɔ ne bra dɛ mbrɛ ɔpɛ biara.

 Naaso, Bible no ma yehu kwan a Nyankopɔn pɛ dɛ yɛfa do bɔ hɛn bra. Ɔka dɛ: ‘Ao onyimpa, Nyankopɔn akyerɛ wo dza oye.’ (Micah 6:8) Ɔsan so ma yehu akwankyerɛ a Nyankopɔn dze ama nyimpa, na ɔma yehu dza ɔsɛ dɛ yɛyɛ na ama hɛn enyi agye.​—Isaiah 48:17, 18.

 Nyankopɔn mmaa hɛn tum dɛ yembu nkorɔfo atsɛn. Bible no ka dɛ: “Mbrahyɛfo nye tsɛmbuafo kortsee na ɔwɔ hɔ . . . Woana nye wo na ibu wo nyɛnko atsɛn?” (James 4:12) Nyankopɔn ma hɛn mu biara kwan dɛ yɛnyɛ dza yɛpɛ. Naaso ɔsɛ dɛ yɛkaa dɛ, dza obefi biribiara a yɛbɛyɛ mu aba no, ɔyɛ hɛnankasa hɛn asɛm.​—Deuteronomy 30:19.

Dza Bible no ka fa obu a yɛbɛda no edzi akyerɛ nkorɔfo no ho

 Bible no ka dɛ ɔsɛ dɛ “yebu nyimpa biara.” (1 Peter 2:17, New Jerusalem Bible) Dɛm ntsi, hɔn a wɔdze Bible mu asɛm yi yɛ edwuma no bu nyimpa nyina, ɔmmfa ho dza wɔgye dzi anaa ɔbra biara a wɔpɛ dɛ wɔbɔ no. (Luke 6:31) Naaso iyi nnkyerɛ dɛ hɔn a wɔdze dza Bible ka no bɔ hɔn bra no gye dza obiara gye dzi, adwen a wɔwɔ wɔ biribi ho anaa gyinae biara a wobesi no to mu. Naaso wɔbɔ mbɔdzen dɛ wobosuasua mbrɛ nna Jesus nye nkorɔfo dzi no, na wɔnnkasa nntsia hɔn.

 Dɛ nhwɛdo no, da kor bi, Jesus hyiaa ɔbaa bi a nna ɔsor ɔsom a ɔwɔ mu. Nna ɔbaa no nye ɔbarimba bi a ɔnnyɛɛ noho adze tse, na abrabɔ a ɔtse dɛm so dze nna Jesus n’enyi nngye ho. Naaso ne nyina ekyir no, Jesus nye ɔbaa yi kasae wɔ obu mu.​—John 4:9, 17-24.

 Tse dɛ Jesus no, Christianfo ayɛ krado dɛ wɔbɛkyerɛkyerɛ hɔn gyedzi mu aber biara akyerɛ hɔn a wɔpɛ dɛ wohu, na sɛ wɔrekyerɛkyerɛ mu so a wɔyɛ no wɔ ‘ɔdwe mu,’ kyerɛ dɛ wɔtɔ hɔn bo ara. (1 Peter 3:15) Bible no tu Christianfo fo dɛ mma wɔmfa hɔn nsusui nnhyɛ nkorɔfo do. Ɔka dɛ sɛ obi dzi Christ n’ekyir a, ‘ɔnnsɛ dɛ ɔyɛ ntokwapɛfo, na mbom ɔsɛ dɛ ɔdwe ma nyimpa nyina’ a hɔn a ɔsor asɔr a wɔkɔ so ka ho.​—2 Timothy 2:24.

Dza Bible no ka fa dza ɔsɛ dɛ yekyir ho

 Bible no san so ka kyerɛ hɛn dɛ ‘yendzi asomdwee ekyir wɔ nyimpa nyina afamu.’ (Hebrewfo 12:14) Obi a ɔpɛ asomdwee no nntan nkorɔfo. Afei so, ɔbɔ mbɔdzen dɛ ɔnye nkorɔfo bɛtsena asomdwee mu, na ber a ɔreyɛ dɛm no, ɔhwɛ hu dɛ ɔrennyɛ biribiara a nankasa nyim dɛ ɔyɛ bɔn no. (Matthew 5:9) Mbrɛ ɔtse nye dɛ, Bible no san so hyɛ Christianfo nyina nkuran dɛ wɔndɔ hɔn atamfo, na wɔnye hɔn a wɔmmpɛ hɔn asɛm no mpo ndzi no yie.​—Matthew 5:44.

 Bible no ka dɛ Nyankopɔn “kyir” suban anaa ndzeyɛɛ ahorow bi a nkorɔfo da no edzi dze bu afofor enyimtsia anaa dze pira hɔn no. (Mbɛbusɛm 6:16-19) Kasafua “kyir” a wɔdze dzii dwuma wɔ dɛm kyerɛwsɛm yi mu no kyerɛ dɛ, obi n’enyi nngye suban bɔn bi ho anaa ɔmmpɛ koraa. Bible no ma yehu dɛ, hɔn a wɔpɛ dɛ wɔtwe hɔnho fi hɔn abrabɔ bɔn bi ho na wɔdze Nyankopɔn n’Asɛm bɔ hɔn bra no, Nyankopɔn ayɛ krado dɛ ɔdze hɔn bɔn bɛkyɛ hɔn na ɔaboa hɔn so.​—Isaiah 55:7.

Kyerɛwnsɛm ahorow a ɔma yehu siantsir a ɔsɛ dɛ yɛtse nkorɔfo ase na yebu hɔn

 Titus 3:2: ‘Wɔnyɛ nyimpa a wɔtse asɛm ase na wɔnkyerɛ ɔdwe nyina wɔ nyimpa nyina do.’

 Matthew 7:12: “Dɛm ntsi adze biara a hom pɛ dɛ nyimpa yɛ ma hom no, hom nyɛ dɛmara so mma hɔn.”

 Joshua 24:15: “Ndɛ da yi hom nsan mu nyi nyia hom bɔsom no.”

 Asomafo Ndwuma 10:34: “Nyankopɔn nnhwɛ nyimpa enyim.”

 Habakkuk 1:12, 13: “[Nyankopɔn] nntum nnhwɛ ɔbrakyew.”

 Romefo 12:19: “Hom mma ebufuw kwan: na wɔakyerɛw no dɛ, Awerdzi dzi wɔ me: emi na mubotua kaw, [Jehovah] a na ɔse.”

 Sɛ obi yɛ hɛn bɔn a, Jehovah Nyankopɔn mmpɛ dɛ yɛyɛ bi tua no kaw. Nsisi na atsɛnkyew a ɔrokɔ do nyina n’enyi tua, na wɔ nankasa ne ber a ɔsɛ mu no, obedzi ho dwuma. Sɛ epɛ dɛ ihu mbrɛ obesi ayɛ dɛm a, kenkan asɛm a wɔato dzin “Will the Cry for Justice Be Heard?”