Wɔwoo me wɔ Paddington. Ɔyɛ kurow a nyimpa dɔɔ sõ wɔ mu paa wɔ London, England. Nna menye me maame nye mo nuanom mbaa baasa a wɔkyɛn me panyin tse. Osiandɛ nna me papa taa bow nsã ntsi ɔannhyɛ da ara nye hɛn anntsena.

Meyɛ abofra no, me maame kãa kyerɛɛ me dɛ da biara mombɔ mpaa ansaana maada. Nna mowɔ Bible ketseketse bi a Ndwom nwoma no nkotsee na ɔwɔ mu. Ntsi nna medze no mu nsɛm no bi yɛ ndwom tow. Ber bi nna merekenkan nwoma bi, na muhun asɛm bi wɔ nwoma no mu dɛ: “Da bi bɛba a yerunnhu ɔkyena bio.” Asɛm yi kaa m’adwen mu ma ntsi nna munntum mpo nnda. Iyi maa modween me daakye ho paa. Mibisaa moho dɛ, ‘Ei ntsi mebaa wiadze bɛyɛɛ dɛn?’ Nna memmpɛ dɛ muwu!

M’enyi bɛgyee esumansɛm ho paa. Nna mepɛ dɛ menye ewufo kasa. Nna metaa nye m’anyɛnkofo kɔ esiei. Nna sene a ɔyɛ hũ nkotsee na yɛhwɛ dze gyegye hɛn enyi.

Ber a midzii mfe 10 no, mehyɛɛ ase dɛ morobɔ bra bɔn. Mehyɛɛ ase so dɛ moronom sigyarɛtse. Monomee ara ma ɔkaa mo hɔ. Ɔkɔr ekyir araa ma afei dze medze wii nom so kaa ho. Midzii mfe 11 no, medze nsãnom so kaa ho. Ɔwɔ mu dɛ nna nsã nnyɛ me dɛw dze, naaso sɛ mobow a nna m’enyi gye. Nna mepɛ ndwom na asaw so paa. Nna metaa kɔ disco so. Sɛ adze sã na sɛ medze me tsir fa mu a, gyedɛ ahanamakye ana maaba fie. Adze bɛkye no nna maberɛ, ntsi nna metaa bɔ kõ wɔ skuul. Sɛ nna mowɔ skuul mpo a monom nsã.

Nsɔhwɛ a mekyerɛwee dze wiee skuul no, menntum enntwa. Me maame dze, nna onnyim dɛ magye nsamu dɛm. Ntsi ber a ohun dza ɔrokɔ do no ɔhaaw no paa, na no bo fuwii so. Menye me maame nyaa akasakasa ntsi muguanee fii fie. Dɛm aber no nyina nna menye aberantsɛ bi a wɔfrɛ no Tony hyehyɛ hɔ. Nna Tony ayɛ rasta. Menye no kɛtsenae. Nna ɔyɛ ewi na ɔtɔn ndubɔn so. Wɔ hɛn mpotamu hɔ dze nna obiara nyim no dɛ ɔpɛ basabasayɛ. Annkyɛr koraa na minyinsenii. Mowoo me ba a odzi kan no nna medzi mfe 16 pɛ.

Midzii kan hyiaa Jehovah Adasefo ber a mutui kɛtsenaa fie bi mu no. Nna ɔyɛ fie a aban no dze ma hɔn a wɔawo na wɔnnwaree nye hɔn mba. Nna Jehovah Adasefo mbaa beenu bi nye binom sũa adze wɔ fie hɔ. Da kor bi dze mekɛtsenaa adzesua no mu bi. Nna m’adwen ara nye dɛ mebɛkyerɛ Adasefo no dɛ dza wɔrekã no nnyɛ nokwar. Naaso wonyaa abotar dze Bible no buaa me nsɛmbisa nyina. Muhun dɛ nna wɔyɛ nkorɔfo a wɔdwe paa, ntsi m’enyi gyee hɔnho, na memaa kwan dɛ wɔnye me nsũa Bible no.

Annkyɛr koraa na dza musũae no sesaa m’abrabɔ. Ofi aber a nna musuar nyina nna musuro dɛ mubowu. Naaso Bible no aboa me ma meehu Jesus ne nkyerɛkyerɛ a ɔfa owusoɛr no ho no! (John 5:​28, 29) Nkyii so, meehu dɛ Nyankopɔn dwen moho ankasa. (1 Peter 5:7) Asɛm a ɔwɔ Jeremiah 29:11 no yɛ me dɛw paa, ɔkã dɛ: “Na minyim adwen a modwen wɔ hom ho, Ewuradze na ɔse, asomdwee adwen a, na nnyɛ mbusu adwen bi a, dɛ mebɛma hom enyidado wɔ hom ewiei.” Megyee too mu dɛ mubotum atsena ase daa wɔ Paradise wɔ asaase yi do.​—Ndwom 37:29.

Jehovah Adasefo daa ɔdɔ mapa edzi kyerɛɛ me. Da a odzi kan a mokɔr hɔn nhyiamu ase no, m’enyi gyee paa. Obiara tseew n’enyim maa me! (John 13:34, 35) Asɔr a nna mokɔ no dze, nna obiara n’asɛm mmfa obiara ho. Adasefo no annhwɛ mbrɛ nna metse, wɔgyee me kama. Wɔkyerɛɛ dɛ wɔdwen nyimpa ho. Wonyaa adagyer maa me, na wɔboaa me paa. Mubohun dɛ maaba ebusua kɛse bi mu. Wɔdaa no edzi dɛ wɔdɔ me paa.

Bible a musũae no boaa me ma muhun dɛ, sɛ mubotum asɔ Nyankopɔn enyi a, gyedɛ mesesa m’abrabɔ. Me berɛe paa ana mirigyaa sigyarɛtse nom. Mubohun dɛ ndwom a ɔyɛ a mitsie no, nna no mu bi wɔ hɔ a ɔma mo kɔn dɔ dɛ mobɔnom wii. Ntsi migyaa dɛm ndwom no nyina tsie. Muhun so dɛ, sɛ migyaa disco kɔ a, ɔrennyɛ dzen dɛ mibegyaa nsã bow. Mesanee hwehwɛɛ anyɛnkofo apapa a wobotum aboa me ma maasom Jehovah.​—Mbɛbusɛm 13:20.

Tony so nye Jehovah Adasefo hyɛɛ ase sũaa Bible no. Ɔno so bisaa nsɛm pii, na Adasefo no yii ne nyinara ano. Obohun dɛ dza orusũa no yɛ nokwar, ntsi ɔno so sesaa n’abrabɔ. Ɔtwee noho fii anyɛnko bɔn ho. Ogyaa ewi na wii nom so. Menye Tony bohun dɛ, sɛ yebotum asom Jehovah yie a, gyedɛ yɛsesa hɛn abrabɔ, na yɛgyen hɛn enyi hwɛ hɛn ba no yie. Afe 1982 mu no yɛwaree.

Nna metaa hwehwɛ Ɔweɔn-Aban na Awake! * mu kenkan hɔn a woetum asesa hɔn nkan abrabɔ ho asɛm. Iyi hyɛɛ me nkuran paa. Hɔn nhwɛdo no maa muhun dɛ ɔnnsɛ dɛ mema m’abaw mu bu. Sɛ mobɔ mbɔdzen a, mara so mubotum asesa. Ntsi dabiara nna mobɔ Jehovah mpaa dɛ ɔmboa me. Wonumaa emi nye Tony wɔ July 1982 mu. Sesei yɛyɛ Jehovah Adasefo.

Jehovah Nyankopɔn a mefaa no nyɛnko no agye me nkwa. Menye mo kun Tony afa ɔhaw pii mu naaso Jehovah etwitwa agye hɛn wɔ ne nyinara mu. Dza yɛafa mu no ama yeehu dɛ, ɔsɛ dɛ yɛdze hɛnho to Nyankopɔn do. Na Nyankopɔn so aboa hɛn ebusua no ankasa.​—Ndwom 55:22.

Yɛwɔ mba beenu, ɔbaa na ɔbarimba. M’enyi agye paa dɛ maaboa hɔn beenu no ma woehu Jehovah. Sesei ɔyɛ me enyigye dɛ me nananom no so rinya enyigye wɔ Nyankopɔn no som mu.

Daakye na owu ho suro nngya me adwendwen bio. Menye Tony nnyi adagyer koraa. Dapɛn biara, yɛkɔ Jehovah Adasefo asafo ahorow mu kɛhyɛ hɔn dzen.Yɛnye hɔn bɔ mu kyerɛkyerɛ nkorɔfo ma wohu dɛ, hɔn so, sɛ wɔkyerɛ Jesus no mu gyedzi a wobenya onnyiewiei nkwa.