Minyinii wɔ Montreal, ɔyɛ kurow bi a nna no mu asetsena yɛ dzen. Aber a midzii abosoom esia pɛ na me papa wui, na iyi maa hɛn ebusua no mu asodzi nyina bɛdaa me maame do. Nna yɛyɛ mbofra baawɔtwe; emi na meyɛ kaekyir.

Aber a minyinii no, nna monom ndubɔn, motow kyakya na midzi nsɛmbɔn so. Nna m’anyɛnkofo nyina so yɛ nsɛmbɔndzifo. Midzii mfe du no, meyɛɛ edwuma maa hɔn a wɔbɔ ndwamanbra nye hɔn a wɔbɔ nkorɔfo bosa na wɔgye nsiho akɛse. Nna minndzi nokwar koraa, na nna misisi nkorɔfo so. Sɛ nna minya obi sisi no a, nna m’enyi agye dei. Nna nsisii ayɛ dɛ edziban a midzi.

Aber a midzii mfe 14 no, nna mutum sisi nkorɔfo a wonnhu ekyir; nna maben wɔ mu paa. Dza nna metaa yɛ no bi nye yi: Nna motɔ watch, adze a wɔto nsa na nkaba a wɔdze gold kakra ayeyɛ ho. Afei mekyerɛw ho dɛ 14-karat dze, kyerɛ dɛ, gold pii na wɔdze yɛe. Muwie a medze kɔ kwan ho nye beebi a wɔdze kaar sisi wɔ store akɛse enyim kɔtɔn. Nna m’enyi gye kwan tsiabaa a wɔfa do nya sika no ho paa. Da bi mpo dze, medze da kor pɛr nyaa dɔla 10,000!

Wɔdze me kɔtoo mbofra bɔn skuul, na midzii mfe 15 no, woyii me edzi. Ntsi nna minnyi beebi a mebɛda. Nna meda abɔntsen nye m’anyɛnkofo hɔn efie.

Osiandɛ nna misisi nkorɔfo ntsi, aporisifo so enngyaa me haw da. Nna munnwia adze nntɔn, ntsi wɔannkyer me annkɔto efiadze da. Naaso osiandɛ nna misisi nkorɔfo na minnyi tum krataa a wɔdze tɔn adze ntsi, nna aporisifo no taa bɔ me kaw paa. Nna munnsuro obiara, ntsi nna mutum kɛgyegye sika brɛ hɔn a wɔbɔ nkorɔfo bosa gye nsiho akɛse no. Nna dɛm edwuma no yɛ hũ paa, ntsi nna ɔyɛ a medze itur hyɛ moho. Afei so nna ɔtɔfabi a medze moho kɔ bɔ amambɔefo.

Aber a metsee Bible ho asɛm no nna medzi mfe 17. Dɛm aber no, nna menye me mpona bi tse, naaso nna menye ɔbaa fofor bi so hyehyɛ hɔ. Me mpona no hyɛɛ ase dɛ ɔnye Jehovah Adasefo rusũa Bible no. Nna m’enyi nngye dza Bible no kã fa m’abrabɔ ho no, ntsi mutuu kɛtsenaa ɔbaa fofor a nna menye no hyehyɛ hɔ no nkyɛn.

Dza ɔsesaa m’abrabɔ nye dɛ, ɔbaa fofor a menye no kɛtsenae no so hyɛɛ ase nye Adasefo no sũaa adze! Ɔyɛɛ nsesa pii wɔ n’asetsena mu. Mbrɛ nna ɔahyɛ ase reda ɔdwe edzi, nye abotar a afei nna orinya no kaa m’akoma paa. Jehovah Adasefo too nsa frɛɛ me kɔr hɔn Ahendzi Asa do, ntsi mokɔr hɔn nhyiamu no bi. Nyimpa a muhun hɔn wɔ hɔ no, nna woesiesie hɔnho kama na wɔpɛ nyimpa so. Me nã woo me, m’egya woo me, munnhun biribi a ɔtse dɛm da! Adze yi mara nna m’ebusua apow me, na wɔmmfa me nnyɛ hwee so. Ntsi ofi me mbofraber mu nyina obiara annda ɔdɔ edzi annkyerɛ me da. Ɔdɔ a Jehovah Adasefo daa no edzi kyerɛɛ me no ara nye adze a nna morohwehwɛ. Ntsi aber a Adasefo no kãa dɛ wɔnye me bosũa Bible no, megyee too mu ntsɛmara.

Ɔnnyɛ dza musũae fii Bible no mu a, bi a nkyɛ ndɛ menntse ase. Ber bi, menye m’anyɛnkofo beenu bi yɛɛ hɛn adwen dɛ yɛbɔkɔ ekowia adze mbrɛ ɔbɛyɛ a yebenya sika dze etua kaw bi a nna yɛabɔ wɔ kyakyatow mu no. Nna yɛdze kaw bɔbor dɔla 50,000. Naaso mannkɔ, na ɔyɛ me dɛw paa dɛ meyɛɛ dɛm. M’anyɛnkofo beenu no dze wɔkɔe, na dza osii nye dɛ wɔkyeer kor, na kor no so wui.

Aber a mugu do rusũa Bible no, mubohun dɛ nna nsesa pii wɔ hɔ a ɔsɛ dɛ meyɛ. Dɛ nhwɛdo no, Bible no kã wɔ 1 Corinthfo 6:10 dɛ: ‘Ewifo, nye enyiberfo, nye asabokwafo, nye ntokwapɛfo, nye apempensifo rinnya Nyankopɔn ahenman no.’ Dɛm asɛm a me kenkaan no maa muhun dɛ bɔn a mayɛ no sõ, ntsi musui. Mubohun dɛ, ɔsɛ dɛ mesesa m’abrabɔ koraa. (Romefo 12:2) Nna m’enyi yɛ dzen na midzi nsɛmbɔn, na atordzi so dze, nna mefa no kwa.

Naaso ne nyina ekyir no, Bible a nna murusũa no maa mubohun dɛ Jehovah yɛ mbɔbɔrhufo na ɔdze bɔn kyɛ. (Isaiah 1:18) Mobɔɔ Jehovah mpaa dzendzenndzen dɛ ɔmboa me na mensesa mo suban bɔn no korakora. Jehovah boaa me, na nkakrankakra mutumii sesaa mo suban. Nsakyer kɛse a meyɛɛ nye dɛ, mowaar ɔbaa a nna menye no tse no wɔ mbra kwan do.

Midzii mfe 24 no, nna mawar kura mbofra baasa. Dza nna aka nye dɛ mibenya edwuma a asɛm biara nnyi ho ayɛ. Mara so na mannkɔ skuul ahen biara yi. Afei so, nna minnyim obiara a obotum edzi moho dase ma wɔaafa edwuma mu. Dɛm aber yi so, mobɔɔ Jehovah mpaa dzendzenndzen. Ntsi, medze me tsir faa mu dɛ morokɔhwehwɛ edwuma. Sɛ nna mudur edwumawura bi hɔ a, mekã kyerɛ no dɛ mepɛ dɛ meyɛ nsakyer wɔ m’abrabɔ mu na mifi m’akoma nyina mu yɛ edwuma. Ɔtɔfabi a, nna mekã kyerɛ edwumawuranom bi dɛ murusũa Bible no, na mepɛ dɛ meyɛ ɔmamba pa. Naaso, hɔn mu dodow no ara ammfa me wɔ hɔn ndwuma mu. Ekyir yi, mekãa m’asetsena mu nsɛm nyina kyerɛɛ edwumawura bi, na ɔkãa kyerɛ me dɛ: “Munnhu siantsir a ɔsɛ dɛ mefa wo! Naaso biribi kã kyerɛ me dɛ memfa wo edwuma mu.” Muhun dɛ Nyankopɔn na oetsie me mpaabɔ. Ber bi ekyir no, wonumaa emi na me yer nyina, na yɛbɛyɛɛ Jehovah Adasefo.

Bible mu nsɛm a medze yɛ edwuma nye mbrɛ mobɔ me bra dɛ Christiannyi ntsi na metse ase yi. Menya ebusua kama. Sesei mowɔ tsibowa pa, osiandɛ megye dzi paa dɛ Jehovah dze mo bɔn akyɛ me.

Bɛyɛ mfe 14 nye yi, bosoom biara medze ndɔnhwer pii kã ahendzi ho asɛmpa no, na moroboa afofor ma woeehu dza Bible no kyerɛkyerɛ. Ndaansa yi ara, me yer so abɛka mo ho ma hɛn nyina reyɛ dɛm edwuma yi bi. Medze bɛyɛ mfe 30 aboa nyimpa 22 a menye hɔn yɛ edwuma ma hɔn so rosom Jehovah. Meda ho ara kɔ store akɛse mu, naaso monnkɔ hɔ nnkesisi nkorɔfo. Sesei dze, biribi fofor koraa ntsi na ɔma mokɔ hɔ; me kɛkã me gyedzi ho asɛm, na mema nkorɔfo nya enyidado dɛ wiadze fofor bi reba. Dɛm wiadze no mu dze, obiara rinnsisi ne nyɛnko bio.​—Ndwom 37:10, 11.