ANA Nyankopɔn tsie mpaabɔ nyina, ɔmmfa ho nyame kor a wɔrobɔ no mpaa no? Wɔ ndɛ wiadze yi mu no, nkorɔfo pii taa susu dɛ dɛmara na ɔtse. Hɔn a wɔpen gyedzi aforafora do no enyi gye adwen a ɔtse dɛm ho, na dɛmara na hɔn a wɔpɛ dɛ wɔgye ɔsom nyina to mu ɔmmfa ho dɛ ɔsor hɔn gyedzi ahorow no so enyi gye ho. Naaso, ana obotum aba dɛ adwen a ɔtse dɛm no nnyɛ nokwar?

Nokwasɛm nye dɛ, Bible kyerɛkyerɛ dɛ ɔnnyɛ Nyankopɔn ankasa na nyimpa pii bɔ no mpaa no. Aber a nna wɔrekyerɛw Bible no, nna nkorɔfo taa bɔ ehonyi mpaa. Naaso Nyankopɔn kasaa tsiaa dza nna wɔreyɛ no mpɛn pii. Dɛ mfatoho no, Ndwom 115:4-6 kã fa ehonyi ho dɛ: “Wɔwɔ asowa, na wɔnntse asɛm.” Asɛm no mu da hɔ yie. Ebɛnadze ntsi na onnyi dɛ ebɔ nyame a ɔrenntse dza ebɛkã no mpaa?

Bible kyerɛwtohɔ a no mu da hɔ kyerɛkyerɛ asɛm yi mu kɔ ekyir. Aber a Elijah a ɔyɛ nkɔnhyɛnyi nokwafo no rutwa Baal nkɔnhyɛfo no mpoa no, ɔkãa kyerɛɛ hɔn dɛ wɔmbɔ hɔn nyame mpaa, na ɔno ekyir no, ɔno so bɔbɔ ne Nyankopɔn mpaa. Elijah kãa dɛ nokwar Nyankopɔn no bobua ne mpaabɔ, naaso ator nyame no rummbua hɔn. Baal nkɔnhyɛfo no peen do, na wɔbɔɔ mpaa tsetsenntsen a no mu yɛ dzen, na wɔtseatseaa mu mpo​—naaso ennkesi hwee! Kyerɛwtohɔ no kã dɛ: “Ndze biara nnyi hɔ, na nyia ɔgye do so nnyi hɔ.” (1 Ahemfo 18:29) Naaso aber a Elijah bɔɔ mpaa no, ebɛn asɛm na osii?

Elijah bɔɔ ne mpaa no wiei ara pɛ, ne Nyankopɔn buaa ne mpaabɔ no ntsɛmara wɔ hɔ no ara. Ɔmaa ogya fii sor bɛhyeew afɔr a nna Elijah ahyehyɛ esi hɔ no. Nna ebɛn nsonsonee na ɔwɔ mu? Adze kor bi wɔ Elijah ne mpaabɔ a wɔayɛ ho kyerɛwtohɔ wɔ 1 Ahemfo 18:36, 37 no mu. Nna ɔyɛ mpaa tsiabaa​—nsɛmfua bɛyɛ 30 pɛ na ɔwɔ mu wɔ Hebrew kasa a wɔdze kyerɛwee no mu. Naaso wɔ nsɛmfua kakra no mu no, Elijah bɔɔ Nyankopɔn ne dzin Jehovah mprɛnsa.

Nna Baal a wɔkyerɛ ase dɛ “owura” no yɛ Canaanfo nyame, naaso nna ɔsor mbrɛ obiara bu dɛm nyame yi wɔ beebi a nna ɔtse no. Naaso dzin Jehovah no yɛ soronko, na wɔdze frɛ Nyankopɔn nkotsee wɔ amansan yi nyina mu. Dɛm Nyankopɔn yi kãa kyerɛɛ no nkorɔfo dɛ: “Emi mara nye [Jehovah]; me dzin nye no: na meremmfa m’enyimnyam mma obi.”​—Isaiah 42:8.

Aso Nyankopɔn tsiee Elijah ne mpaabɔ no nye Baal nkɔnhyɛfo no so hɔn mpaabɔ? Baal asomfo no dze ndwamanbra a ɔkɔ do wɔ hɔn som mu nye nyimpa a woku hɔn dze bɔ afɔr no guu nyimpa enyim ase. Naaso Jehovah no som maa no nkorɔfo a wɔyɛ Israelfo no enyim baa nyam, na ɔmaa wɔgyee hɔnho fii ndzeyɛɛ a no ho nntsew a ɔtse dɛm no ho. Ntsi ɔwodze susu ho hwɛ: Sɛ ehyɛ da kyerɛw krataa kɛma wo nyɛnko bi a ibu no paa a, aso ebɔhwɛ kwan dɛ wɔdze wo krataa no bɛma obi fofor a ɔsor ne dzin, ɔagye dzin bɔn, na no suban nye wo nyɛnko nedze bɔ ebira koraa? Oho!

Sɛ ebɔ Jehovah mpaa a, kaa dɛ nyia a ɔyɛ Ɔbɔadze a ɔyɛ adasamba nyina hɔn Egya no na erobɔ no mpaa. * Nkɔnhyɛnyi Isaiah kãa wɔ mpaabɔ mu dɛ: “[Jehovah], ɔwoara nye hɛn egya.” (Isaiah 63:16) Jesus kãa Nyankopɔn kor yi ara ho asɛm aber a ɔkãa kyerɛɛ n’ekyirdzifo no dɛ: “Morobɔkɔ sor wɔ m’Egya nye hom Egya, me Nyankopɔn nye hom Nyankopɔn nkyɛn.” (John 20:17) Jehovah yɛ Jesus n’Egya. Ɔno nye Nyankopɔn a Jesus bɔɔ no mpaa no, na ɔno na Jesus kyerɛɛ n’ekyirdzifo no dɛ wɔmbɔ no mpaa no.​—Matthew 6:9.

Aso Bible no kyerɛkyerɛ hɛn dɛ yɛmbɔ Jesus, ne nã Mary, ahotseweefo, anaa abɔfo mpaa? Oho​—Jehovah nkotoo na ɔwɔ dɛ yɛbɔ no mpaa. Susu siantsir ebien a ɔwɔ dɛ yɛyɛ dɛm no ho hwɛ. Dza odzi kan no, mpaabɔ yɛ ɔsom, na Bible no kã dɛ ɔsɛ dɛ yɛsom Jehovah nkotoo. (Exodus 20:5) Dza otsĩa ebien, Bible no da no edzi dɛ Jehovah na wɔdze abɔdzin Mpaabɔ tsiefo frɛ no. (Ndwom 65:2) Ɔwɔ mu dɛ Jehovah fi ayamuyie mu dze asodzi pii ahyehyɛ afofor nsa dze, naaso mpaabɔ dze ɔmmfaa nnhyɛɛ obiara nsa. Ɔyɛ Nyankopɔn a ɔabɔ anohoba dɛ nankasa betsie hɛn mpaabɔ.

Dɛm ntsi sɛ epɛ dɛ Nyankopɔn tsie wo mpaabɔ a, kaa Bible mu afotusɛm yi: “Obiara a ɔbɔbɔ [Jehovah] ne dzin no, wɔbɛgye no nkwa.” (Asomafo Ndwuma 2:21) Naaso, ana Jehovah tsie mpaabɔ nyina? Anaadɛ sɛ yɛpɛ dɛ Jehovah tsie hɛn mpaabɔ a, aso biribi fofor bi wɔ hɔ a no ho hia dɛ yehu?