1-2. Yebesi dɛn dze afotu a ɔwɔ Mbɛbusɛm 4:25 no ayɛ edwuma? Ma ho nhwɛdo.

HOM mma yensusu dɛm nhwɛdo ebiasa yi ho nhwɛ. Hɛn akyerɛbaa Christiannyi bi a ne mfe akɔ enyim rodwendwen ndzɛmba pa a osisii wɔ n’asetsena mu no ho. Ɔwɔ mu dɛ orihyia nsɛndzendzen wɔ n’asetsena mu dze, naaso ɔrobɔ mbɔdzen dɛ ɔbɛyɛ dza obotum biara ama Jehovah. (1 Cor. 15:58) Da biara, otwa ɔno nye n’adɔfo a woehyia mu wɔ Paradise no ho mfonyin wɔ n’adwen mu. Akyerɛbaa bi so akaa adze bi a no nua Christiannyi bi dze yɛɛ no ma ɔyɛɛ no yaw, naaso osi gyinae dɛ ɔremmfa dza woesi no ho ebufuw nnhyɛ no mu. (Col. 3:13) Onua aberantsɛ bi akaa mfom a odzii mber bi a woetwa mu no, naaso osi n’adwen pi dɛ ofi dɛm aber no rokɔ no, ɔbɔkɔ do dze nokwardzi asom Jehovah.​—Ndw. 51:10.

² Ebɛn nsɛdzi na ɔwɔ dɛm Christianfo baasa yi hɔn asɛm no mu. Hɔn nyina kaakaa dza woesi wɔ hɔn asetsena mu ma woetwa mu no, naaso wɔnnkɔ do nndwendwen ho. Mbom no, wɔdze hɔn adwen si nhyira a wobenya no daakye no do.​—Kenkan Mbɛbusɛm 4:25.

3. Ebɛnadze ntsi na ɔsɛ dɛ yɛdze hɛn adwen si nhyira a yebenya no daakye no do?

³ Ebɛnadze ntsi na no ho hia dɛ yɛdze hɛn adwen si nhyira a yebenya no daakye no do? Sɛ obi renantsew na ɔtaa hwɛ n’ekyir a, orunntum nnkɔ tsenn. Dɛmara na ɔsom a yɛdze ma Jehovah no tse. Sɛ yɛtaa dze hɛn adwen si nsɛm a woesisi wɔ hɛn asetsena mu no do anaa ndzɛmba a yɛyɛe mber bi a woetwa mu no do a, yerunntum nnsom Jehovah nnkesi ase.​—Luke 9:62.

4. Ebɛnadze na yebosusu ho wɔ adzesua yi mu?

⁴ Adzesua yi mu no, yɛbɔhwɛ ndzɛmba ebiasa a obotum esua hɛn efir ma yɛdze hɛn adwen eesi nsɛm a osisii wɔ hɛn asetsena mu no do. Dɛm ndzɛmba ebiasa yi nye: (1) hɛn asetsena pa a woetwa mu a yɛdze hɛn adwen besi do, (2) afofor ho ebufuw a yɛdze  bɛhyɛ hɛn mu, na (3) hɛn tsibowa a yɛbɛma wɔakɔ do ebu hɛn fɔ. Wɔ tsebea no mu biara mu no, yɛbɔhwɛ mbrɛ Bible mu ngyinadonsɛm botum aboa hɛn amma yaammfa hɛn adwen ennsi “ndzɛmba a ɔwɔ ekyir” no do na mbom, ‘yaatwe hɛn mu akɔ enyim dze no ho.’​—Phil. 3:13.

5. Ebɛnadze na obotum esua hɛn efir a Ɔsɛnkafo 7:10 bɔ hɛn kɔkɔ wɔ ho no?

⁵ Kenkan Ɔsɛnkafo 7:10. Hyɛ no nsew dɛ dɛm kyerɛwsɛm yi nnkã dɛ ɔyɛ mfomdo dɛ yɛbɛkã dɛ: “Ɔyɛ dɛn ntsi na nkan no nda no yɛ papa?” Osiandɛ nsɛm a ɔyɛ enyigye a osisii wɔ hɛn asetsena mu a yɛbɛkaakaa no yɛ akyɛdze a ofi Jehovah hɔ. Mbom no, dɛm kyerɛwsɛm no kã dɛ: “Mma woara ennkã dɛ, Ɔyɛ dɛn ntsi na nkan no nda no oye sen iyinom yi?” Ɔkwan bi do no, dza obotum esua hɛn efir nye dɛ yɛdze hɛn nkan asetsena bɔtoto dza yɛwɔ mu seseiara no ho, na yaakã dɛ asetsena a yɛwɔ mu seseiara no asɛɛ koraa. Bible nkyerɛase fofor bi so kã dɛ: “Mma mmbisa da dɛ, ‘Ao, ebɛnadze ntsi na nkan no ndzɛmba no ye papaapa?’ Nyansa nnyi mu dɛ ibebisa dɛm.”

6. Ebɛnadze ntsi na nyansa nnyi mu dɛ yɛbɔkɔ do enya adwen dɛ, mbrɛ nna hɛn asetsena tse nkan no ye sen ndɛ? Ma nhwɛdo.

⁶ Ebɛnadze ntsi na nyansa nnyi mu dɛ yɛbɔkɔ do enya adwen dɛ, mbrɛ nna hɛn asetsena tse nkan no ye sen ndɛ? Osiandɛ sɛ yɛyɛ dɛm a, ɔbɛma yɛakaakaa ndzɛmba pa a osisii wɔ hɛn asetsena mu no nkotsee, na annhwɛ mpo a, hɛn werɛ befir dɛ yɛafa abɛbrɛsɛ mu. Dɛ nhwɛdo no, hom mma yensusu tsetse Israelfo no hɔn asɛm no ho nhwɛ. Wofii Egypt no, annkyɛr koraa na hɔn werɛ fiir atseetsee a wɔfaa mu wɔ hɔ no. Mbom no, wɔdze hɔn adwen sii edziban pa a nna wonya dzi no do. Wɔkãa dɛ: “Yɛkaakaa esunam a yedzii no wɔ Egypt no kwa; efer nye anamuna, nye fan, nye anwew nye enyian [garlic] no.” (Nka. 11:5) Naaso, aso wodzii edziban no “kwa”? Oho. Israelfo no berɛɛ ankasa; aber a nna wɔyɛ nkowaa wɔ Egypt no, wɔtseetsee hɔn. (Ex. 1:13, 14; 3:6-9) Iyi nyina ekyir no, hɔn werɛ fiir abɛbrɛsɛ a wɔfaa mu wɔ Egypt no ma mpo wonyae a, nkyɛ wɔbɛsan akɔ hɔn dadaw mu. Wɔammfa hɔn adwen ennsi ndzepa a nna Jehovah ayɛ ama hɔn  no do. Mbom no, wɔdze hɔn adwen sii asetsena pa a nna wɔwɔ mu mber bi a woetwa mu no do. Suban a wɔdaa no edzi no, Jehovah n’enyi anngye ho.​—Nka. 11:10.

7. Ebɛnadze na ɔboaa akyerɛbaa bi ma okwetsiir efir a ɔnye dɛ ɔdze n’adwen besi asetsena pa a woetwa mu no do?

⁷ Yebesi dɛn ekwetsir efir a ɔnye dɛ yɛdze hɛn adwen besi asetsena pa a woetwa mu no do? Hom mma yensusu hɛn akyerɛbaa bi no nhwɛdo ho nhwɛ. Afe 1945 na ɔhyɛɛ ase dɛ ɔrosom wɔ Brooklyn Bethel. Mfe bi ekyir no, ɔwaar onua bi a no so yɛ edwuma wɔ Bethel na wɔdze mfe pii bɔɔ mu somee wɔ hɔ. Naaso, wɔ afe 1976 no, yarba bi bɔɔ no kun no. Ɔkãa dɛ, aber a no kun no hun dɛ orubowu no, ɔmaa no afotu pa a nna obotum aboa no wɔ no kunayɛ mu. Ɔkãa kyerɛɛ no dɛ: “Yeenya enyigye pii wɔ hɛn awar mu. Nyimpa piinara ennya no dɛm.” Ɔsanee tuu no fo dɛ: “Ɔwɔ mu dɛ ebɛkaakaa ndzɛmba dze, naaso mma nndwendwen dza woetwa mu no ho. Ɔkyɛr kakra a, wo werɛ befir. Mma wo bo mmfuw woho na mma inndzi awerɛhow. Ma w’enyi ngye dɛ inyaa enyigye nye nhyira a ɔtse dɛm. . . . Kaa a yetum kaa adze no yɛ akyɛdze a Nyankopɔn dze ama hɛn.” Ana enngye nnto mu dɛ dɛm afotu yi yɛ afotu pa?

8. Aber a hɛn akyerɛbaa no ammfa n’adwen ennsi asetsena pa a woetwa mu do no, ebɛn mfaso na onyae?

⁸ Hɛn akyerɛbaa yi dze no kun n’afotu no yɛɛ edwuma. Ɔdze nokwardzi soom Jehovah kesii dɛ owui. Owui no nna oedzi mfe 92. Wɔaka mfe kakra ma oeewu no, ɔkãa dɛ: “Sɛ mutwa m’enyi hwɛ mfe 63 a medze ayɛ Jehovah ne ber nyina som edwuma no a, mubotum akã dɛ, m’asetsena ayɛ dza akomatɔyamu wɔ mu papaapa.” Ebɛnadze ntsi a? Ɔkyerɛɛ mu dɛ: “Dza ɔma yenya akomatɔyamu ankasa nye hɛn wiadze nyina enuayɛkuw a ɔsom bo no nye enyidado a yɛwɔ dɛ yɛnye hɛn nuanom bɛtsena paradise asaase do asom hɛn Bɔfo Kɛse Jehovah, nokwar Nyankopɔn kor no dabaa no.” * Hɛn akyerɛbaa yi dze n’adwen sii nhyira a obenya no daakye no do. Hwɛ nhwɛdo pa ara a ɔtse dɛm!

9. Dɛ mbrɛ wɔakã wɔ Leviticus 19:18 no, ebɛn aber na obotum ayɛ dzen ama hɛn papaapa dɛ yebeyi obi noho ebufuw efi hɛn mu?

⁹ Kenkan Leviticus 19:18. Mpɛn pii no, ɔyɛ dzen dɛ yebeyi obi noho ebufuw efi hɛn mu nkanka ber a nyimpa a ɔafom hɛn no yɛ hɛn nua Christiannyi, hɛn nyɛnko berɛbo, anaa hɛn busuanyi. Dɛ nhwɛdo no, akyerɛbaa bi twaa asɛm too akyerɛbaa fofor do dɛ oewia ne sika. Ekyir yi, akyerɛbaa a otwaa asɛm too no nua do no kɔree kɛpaa no kyɛw. Naaso no nua no kɔr do dze n’adwen sii dza nna oesi no do. Ana atse nka dɛm pɛn? Sɛ mpo tsebea a ɔtse dɛm nntoo hɛn da a, obotum aba dɛ hɛn mu piinara wɔ hɔ a yeenya obi ho ebufuw da, na yɛtsee nka dɛ yerunntum nnyi noho ebufuw mmfi hɛn mu da.

10. Sɛ yenya obi noho ebufuw a, ebɛnadze na obotum aboa hɛn?

¹⁰ Sɛ yenya obi noho ebufuw a, ebɛnadze na obotum aboa hɛn? Ɔsɛ dɛ yɛkaa dɛ Jehovah hu biribiara. Onyim dza yɛrefa mu nyinara na sɛ mpo nkorɔfo nye hɛn enndzi no yie a, ohu. (Heb. 4:13) Sɛ yehu amandze a, ɔyɛ no yaw. (Isa. 63:9) Sɛ wɔnye hɛn enndzi no yie ma ntsi yeruhu amandze a, ɔahyɛ bɔ dɛ, mbrɛ ɔtse biara, obeyi efi hɔ.​—Nyi. 21:3, 4.

11. Sɛ yeyi afofor ho ebufuw fi hɛn mu a, ebɛn kwan do na ɔboa hɛnara?

¹¹ Ɔsɛ dɛ yɛkaa so dɛ sɛ yeyi afofor ho ebufuw fi hɛn mu a, ɔboa hɛnara. Dɛm na akyerɛbaa a wotwaa asɛm too no do no bohunii. Ber kɔr do no, otumii yii ebufuw no fii no mu. Obohun dɛ sɛ yɛdze afofor hɔn mfom kyɛ hɔn a, Jehovah so dze hɛn dze bɛkyɛ hɛn. (Matt. 6:14) Nna onyim dɛ dza hɛn akyerɛbaa no dze yɛɛ no no nnyɛ, naaso osii gyinae dɛ obegyaa mu ma wɔaaka. Dza ofii mu bae nye dɛ, hɛn akyerɛbaa no enyi gyee na afei otumii dze n’adwen sii ɔsom a ɔdze ma Jehovah no do.

12. Ebɛnadze na yesũa fi 1 John 3:19, 20 mu?

¹² Kenkan 1 John 3:19, 20. Hɛn nyinara ɔtɔ da a, hɛn tsibowa bu hɛn fɔ. Dɛ nhwɛdo no, binom wɔ hɔ a, hɔn tsibowa bu hɔn fɔ wɔ ndzɛmba a wɔyɛe ansaana worubohu nokwar no ho. Afofor so dze, mfomdo bi a wodzii wɔ hɔn esubɔ ekyir no ma hɔn tsibowa bu hɔn fɔ. Sɛ yɛtse nka dɛm a, ɔnnyɛ nwanwa. (Rom. 3:23) Ɔda edzi dɛ yɛpɛ dɛ yɛyɛ dza ɔtsen dze, naaso “hɛn nyina yɛfom ndzɛmba pii mu.” (Jas. 3:2; Rom. 7:21-23) Ɔwɔ mu dɛ hɛn enyi nngye ho dɛ hɛn tsibowa bobu hɛn fɔ dze, naaso obotum aboa hɛn wɔ kwan bi do. Ebɛnadze ntsi a? Osiandɛ sɛ hɛn tsibowa bu hɛn fɔ a, obotum aboa hɛn ma yaasesa hɛn akwan, na yeesi hɛn bo dɛ yerinndzi mfom a ɔtse dɛm bio.​—Heb. 12:12, 13.

13. Ebɛnadze ntsi na no ho hia dɛ yekwetsir dɛ yɛbɛma hɛn tsibowa akɔ do ebu hɛn fɔ?

¹³ Naaso, sɛ yeenu hɛnho ma Jehovah dze hɛn bɔn akyɛ hɛn mpo a, obotum aba dɛ yɛbɛma hɛn tsibowa aakɔ do ebu hɛn fɔ. Sɛ yɛma hɛn tsibowa kɔ do bu hɛn fɔ a, obotum ayɛ hũ. (Ndw. 31:10; 38:3, 4) Ebɛn kwan do? Hɛn akyerɛbaa bi maa ne tsibowa kɔr do buu no fɔ wɔ bɔn a ɔyɛe mber bi a woetwa mu no ho. Hom mma yɛnhwɛ dza ɔkãe no. Ɔkãa dɛ: “Metsee nka dɛ no ho nnhia dɛ mebɛhaw moho wɔ Jehovah no som mu, osiandɛ ɔtse dɛ mbrɛ murunntum nnyɛ ho hwee bio.” Hɛn mu piinara wɔ hɔ a, yebotum atse nka dɛ mbrɛ hɛn akyerɛbaa no tsee nka no. No ho hia papaapa dɛ yebokwetsir efir a ɔnye dɛ yɛbɛma hɛn tsibowa akɔ do ebu hɛn fɔ no. Dwen ho hwɛ o, sɛ yɛma kwan ma hɛn tsibowa kɔ do bu hɛn fɔ ɔmmfa ho dɛ Jehovah dze hɛn bɔn akyɛ hɛn no a, hwɛ dɛ mbrɛ ɔbɛma Satan n’enyi agye afa!​—Fa toto 2 Corinthfo 2:5-7, 11 ho.

14. Yebesi dɛn ehu ampaara dɛ Jehovah dze hɛn bɔn akyɛ hɛn?

¹⁴ Bi a yɛbɔkɔ do enya adwen dɛ, ‘Mibesi dɛn ehu ampaara dɛ Jehovah dze mo bɔn akyɛ me?’  Wɔ ɔkwan bi do no, sɛ yebisa dɛm asɛm yi a, ɔno kyerɛ dɛ Jehovah botum dze hɛn bɔn akyɛ hɛn. Mfe pii a etwa mu no, Ɔweɔn-Aban no kãa dɛ: “Yebotum edzi mfomdo kor no ara mpɛn pii. Obotum aba dɛ mberɛwyɛ bi a nna yɛwɔ ansaana yɛrobɔsom Nyankopɔn no, yenntumii nndzii do. . . . Naaso mma w’abaw mu mmbu. Mma nnya adwen dɛ ayɛ bɔn bi a Jehovah runntum mmfa nnkyɛ wo da. Dɛm adwen no na Satan pɛ dɛ inya. Sɛ idzi mfom a ɔtse dɛm a, idzi awerɛhow na eyɛ basaa. Ɔno mpo kyerɛ dɛ ennyɛ nyimpa bɔn na Jehovah botum dze wo bɔn akyɛ wo. Brɛ woho adze na kɔ do bɔ Nyankopɔn mpaa ma ɔmfa wo bɔn nkyɛ wo, ɔmboa wo ma nya tsibowa pa, na ɔmboa wo na eetum egyaa mfom no dzi. Ɔmmfa ho mpɛn dodow a abofra bi behyia ɔhaw bi no, ɔkɔ do bisa ne papa hɔ mboa. Dɛm ntsi, kɔ do serɛ Jehovah dɛ ɔmboa wo, na ɔbɔboa wo osian n’adom no ntsi.” *

15-16. Ber a binom bohun dɛ Jehovah dze hɔn bɔn akyɛ hɔn no, wɔtsee nka dɛn?

¹⁵ Hu a Jehovah no nkorɔfo piinara ehu dɛ ɔdze hɔn bɔn akyɛ hɔn no ama woenya awerɛkyekyer. Dɛ nhwɛdo no, wɔ mfe bi a etwa mu no, suahu bi a onua bi kenkanee wɔ nsɛm a nna ɔba ndzidzido ndzidzido a wɔato dzin “Bible No Tum Sesa Nyimpa N’abrabɔ” no hyɛɛ no nkuran papaapa. Wɔ asɛm a ɔkenkanee no mu no, akyerɛbaa bi kãa dɛ, osian ndzɛmba bɔn a osisii wɔ n’asetsena mu ntsi, nna ɔyɛ dzen ma no dɛ ɔbɛgye ato mu dɛ Jehovah botum adɔ no. Ɔbɔɔ esu ekyir mfe pii no, nna ɔda ho ara tse nka dɛmara. Naaso, ber a ɔdwendween werdam no ho no, ɔboaa no ma obohun dɛ Jehovah dɔ no. *

¹⁶ Ebɛn kwan do na akyerɛbaa no suahu no boaa onua no? Ɔkyerɛɛw dɛ: “Aber a nna musuar no, mohwɛɛ ponografi ma ɔkaa me hɔ, naaso mobɔɔ mbɔdzen gyaae. Ndaansa yi ara masan akɔhwɛ bio. Asafo mu mpanyimfo aboa me ma metum edzi do. Mpanyimfo no ama matse ase dɛ, Nyankopɔn dɔ me na ɔdze mo bɔn akyɛ me. Naaso, ɔtɔ mber bi a, metse nka dɛ mfaso biara nnyi mo do, na Jehovah nndɔ me. [Akyerɛbaa yi] no suahu a mekenkanee no aboa me papaapa. Afei dze, mebohu dɛ, sɛ mekã dɛ Nyankopɔn runntum mmfa mo bɔn nnkyɛ me a, nna merepɛ akyerɛ dɛ mo bɔn sõ dodow ma ne Ba no n’afɔrbɔ no. Metwa suahu no ato beebi, ntsi aber biara a mebɛtse nka dɛ mfaso biara nnyi mo do no, mebɛkenkan na maadwendwen ho.”

17. Ebɛn kwan do na ɔsomafo Paul kwetsiir dɛ ɔbɛma ne tsibowa akɔ do ebu no fɔ?

 ¹⁷ Suahu ahorow a ɔtse dɛm no ma yɛkaa ɔsomafo Paul. Ɔyɛɛ bɔn ahorow bi a no mu yɛ dur ansaana ɔrebɛyɛ Christiannyi. Nna ɔkaa ndzɛmba bɔn a ɔayɛ no, naaso ɔannkɔ do ammfa n’adwen ennsi do. (1 Tim. 1:12-15) Osian werdam afɔrbɔ no ntsi, nna ɔwɔ gyedzi dɛ wobotum dze no bɔn akyɛ no. Na ohun werdam no dɛ ɔyɛ akyɛdze a Nyankopɔn dze ama no. (Gal. 2:20) Paul amma ne tsibowa annkɔ do emmbu no fɔ, mbom no ɔdze sii n’enyiwa do dɛ ɔbɔkɔ do ayɛ pii ama Jehovah.

18. Ebɛnadze na yeesũa wɔ adzesua yi mu?

¹⁸ Ndzɛmba ahorow a obotum esua hɛn efir a yeesusu ho wɔ adzesua yi mu no, ebɛnadze na yeesũa efi mu? (1) Ndzɛmba papa a osisii wɔ hɛn asetsena mu a yɛbɛkaakaa no yɛ akyɛdze a ofi Jehovah hɔ; naaso ɔmmfa ho mbrɛ hɛn asetsena sii kɔr yie wɔ mber bi a woetwa mu no, asetsena a yebenya wɔ Paradise no bɛyɛ papa asen no koraa. (2) Obotum aba dɛ afofor bɛyɛ hɛn adze ma wɔaayɛ hɛn yaw, naaso sɛ yɛdze kyɛ hɔn na yeyi hɔnho ebufuw fi hɛn mu a, yebotum akɔ do asom Jehovah. (3) Sɛ yɛma hɛn tsibowa kɔ do bu hɛn fɔ wɔ bɔn bi a yɛyɛe mber bi a woetwa mu ho a, ɔremma yɛnnkɔ do mmfa enyigye nnsom Jehovah. Dɛ mbrɛ Paul yɛe no, hɛn so, ɔsɛ dɛ yenya gyedzi dɛ Jehovah dze hɛn bɔn akyɛ hɛn.

19. Yesi dɛn hu dɛ wɔ wiadze fofor no mu no, yɛrennkaa biribiara a ɔbɛma yeedzi awerɛhow?

¹⁹ Yɛwɔ enyidado dɛ yɛbɛtsena ase daa. Wɔ Nyankopɔn no wiadze fofor no mu no, yɛrennkaa biribiara a ɔbɛma yeedzi awerɛhow. Bible no kã dɛm mber no ho asɛm dɛ: “Nkan no ndzɛmba no wɔrennkaa” bio. (Isa. 65:17) Susu ho hwɛ: Hɛn mu piinara wɔ hɔ a yɛabɔ nkɔkora na mberwa wɔ Jehovah no som mu, naaso wɔ wiadze fofor no mu dze yɛbɛsan adan mberantsɛ na nkataasia. (Job 33:25) Dɛm ntsi, hom mma yensi hɛn bo dɛ yɛremmfa hɛn adwen nnsi nsɛm a osisii wɔ hɛn asetsena mu no do. Mbom no, hom mma yɛmfa hɛn adwen nyina nsi wiadze fofor no do, na yɛnyɛ dza yebotum biara dɛ yɛbɔkɔ hɔ bi!