1. Ebɛn ndzɛmba na otum bɔ hɛn hu?

 HOM mma yensusu Jehovah Adasefo binom hɔn asetsena mu nsɛm ho nhwɛ. Nna Nestor na ne yer María pɛ dɛ wɔkɔsom wɔ beebi a mboa ho hia kɛse. * Nna ohia dɛ wɔma hɔn asetsena ba famu mbrɛ ɔbɛyɛ a wobotum akɔsom wɔ hɔ. Naaso, nna wosuro dɛ sɛ wɔma hɔn asetsena ba famu a, annhwɛ a worinnya enyigye ankasa. Aber a Biniam bɛyɛɛ Jehovah Dasefo no, nna ɔman a ɔwɔ mu no, wɔsoɛr tsia hɛn som edwuma no. Dɛm ntsi ohun dɛ, ɔabɛyɛ Nyankopɔn no somfo yi ara dze, obotum ehyia ɔsoɛrtsia. Iyi maa ɔbɔɔ hu. Naaso, dza nna ɔbɔ no hu kɛse koraa nye dza n’ebusuafo bɛyɛ aber a woebohu dɛ ɔabɛyɛ Jehovah Dasefo no. Valérie so, wɔkaa kyerɛɛ no dɛ oenya cancer bi a ɔyɛ hu paa. Ɔyɛɛ araa dɛ obenya dɔkta bi a ɔbɛyɛ no oprehyɛn a ɔremmfa bɔgya nndzi dwuma, naaso nna onnya bi. Nna osuro dɛ annhwɛ a obowu, na yɛtse no ase.

2. Ebɛnadze ntsi na no ho hia dɛ yɛbɔ mbɔdzen dɛ yebedzi dza ɔbɔ hɛn hu no do?

² Ana dza yɛaka ho asɛm yi mu bi ama abɔ hu pɛn? Hɛn mu pii ehyia tsebea a ɔtse dɛm. Naaso, sɛ yeenndzi suro a ɔtse dɛm do a, obotum ama yeesisi gyinae a ɔnnyɛ papa na obotum asɛɛ yɛnye Jehovah ntamu ebusuabɔ no. Satan n’akoma do adze ara nye no. Ɔyɛ so a, otum gyina ndzɛmba a ɔma yɛbɔ hu no do bɔ mbɔdzen dɛ ɔbɛma yeebu Jehovah ne mbra do. Mbra no bi nye ahyɛdze a Jehovah dze ama hɛn dɛ yɛnka asɛmpa no. (Nyi. 12:17) Satan ne tsirmu yɛ dzen, ɔwɔ tum na ɔdze biribi si n’enyi do dɛ ɔbɛyɛ na ɔnnyɛe a, noho nntɔɔ no. Naaso, enyigyesɛm nye dɛ, yebotum abɔ hɛnho ban efi Satan ho. Yebesi dɛn ayɛ dɛm?

3. Sɛ yebotum edzi dza ɔma yɛbɔ hu no do a, ebɛnadze na ɔsɛ dɛ yɛyɛ?

 ³ Jehovah dɔ hɛn paa, na ɔwɔ hɛn afa aber nyinara dɛ ɔbɔboa hɛn. Sɛ yɛgye dɛm asɛm yi dzi a, biribiara nnyi hɔ a Satan bɛyɛ a ɔbɔbɔ hɛn hu. (Ndw. 118:6) Dɛ nhwɛdo no, obi a ɔkyerɛɛw Ndwom 118 no hyiaa tsebea ahorow bi ma noho yeraaw no paa. Nna nkorɔfo pii tan no; nna dɛm nkorɔfo yi mu bi mpo yɛ hɔn a wɔwɔ dzibew akɛse (nyiyimu 9, 10). Ɔtɔ da a, nna dadwen hyɛ no do (nyiyimu 13). Afei, nna Jehovah atsea no paa (nyiyimu 18). Ne nyina mu no, ɔdwontofo no kaa dɛ: “Murunnsuro.” Ebɛnadze na ɔmaa ɔdwontofo no nyaa awerɛhyɛmu a ɔtse dɛm? Nna onyim dɛ no sor Egya Jehovah dɔ no papaapa ɔmmfa ho dɛ ɔatsea no no. Nna ɔdwontofo no gye dzi paa dɛ Nyankopɔn dɔ no na ɔayɛ krado dɛ ɔbɔboa no ma oeegyina tsebea biara a obehyia no ano.​—Ndw. 118:29.

4. Sɛ yɛgye dzi dɛ Nyankopɔn dɔ hɛn a, ɔbɔboa hɛn ma yeedzi ndzɛmba a ɔma yɛbɔ hu no do. Dɛm ndzɛmba no bi nye dɛn?

⁴ Ɔsɛ dɛ yɛgye dzi paa dɛ Jehovah dɔ hɛn mu biara. Dɛm a yɛbɛyɛ no bɔboa hɛn ma yeedzi ndzɛmba ebiasa bi a ɔtaa bɔ hɛn hu no do. Ɔno nye: (1) hɛn ebusuafo a yesuro dɛ bi a yerunntum nnhwɛ hɔn, (2) nyimpa ho suro, nye (3) owu ho suro. Enuanom a yɛkaa hɔnho asɛm wɔ nkyekyɛmu 1 no mu no, hɔn nyinara tumii dzii dza nna ɔma wɔbɔ hu no do, osiandɛ nna wɔgye dzi dɛ Nyankopɔn dɔ hɔn.

5. Ebɛn tsebea ahorow na obotum egya ebusuatsir bi adwendwen? (Hwɛ mfonyin a ɔwɔ Ɔweɔn-Aban yi enyim no.)

⁵ Mbusua tsir a wɔsom Jehovah no bu asodzi a wɔwɔ dɛ wɔhwɛ hɔn mbusua no enyibersɛm. (1 Tim. 5:8) Sɛ eyɛ ebusua tsir a, bi a aber a yarba bɔn no tserɛwee no, nna erodwen ho paa dɛ annhwɛ a na w’edwuma efi wo nsa. Bi mpo a ibisaa woho dɛ ibesi dɛn ama w’ebusua hɔn nsa akɔ hɔn ano na etua wo dan kaw. Bi so a nna isuro dɛ w’edwuma befi wo nsa, na sɛ ɔba no dɛm a bi a na ennya edwuma fofor annyɛ. Anaa bi a wo tsebea no tse dɛ Nestor na María a yeedzi kan aka hɔnho asɛm no. Obotum aba dɛ nna ɔyɛ dzen ma wo dɛ ebɛyɛ nsesa wɔ mber a edze yɛ edwuma no mu mbrɛ ɔbɛyɛ a w’asetsena bɛba famu. Satan ama nkorɔfo pii dze hɔn adwen esi suro a ɔtse dɛm do ma woegyaa Jehovah som.

6. Ebɛn adwen na Satan bɔ mbɔdzen dɛ ɔbɛma yeenya?

⁶ Satan yɛ dza obotum biara dɛ ɔbɛma yeenya adwen dɛ Jehovah nndwen hɛnho. Afei so, ɔpɛ dɛ yɛtse nka dɛ, mbrɛ yebesi ahwɛ hɛn ebusua ho asɛm mmfa Jehovah ho, ɔyɛ hɛnara hɛn gyegyiregye. Iyi ntsi, annhwɛ a yebenya adwen dɛ, sɛ Jehovah ne mbra na ɔsɛ dɛ yepia to nkyɛn mbrɛ ɔbɛyɛ a hɛn edwuma nnkefi hɛn nsa mpo a, yɛbɛyɛ.

7. Ebɛn awerɛhyɛmu na Jesus dze ama hɛn?

⁷ Jesus nyim Egya no kyɛn obiara, na ɔma hɛn awerɛhyɛmu dɛ Nyankopɔn ‘nyim ndzɛmba a ohia hɛn ansaana yebisa no mpo.’ (Matt. 6:8) Jesus san so nyim dɛ, Jehovah ayɛ krado dɛ ɔdze dza yehia biara bɛma hɛn. Osiandɛ yɛsom Jehovah ntsi, yɛka n’ebusua no ho. Jehovah nye hɛn ebusua Tsir, na yɛwɔ ahotodo dɛ asɛm a nara aka wɔ 1 Timothy 5:8 no, obedzi do.

8. (a) Sɛ ɔyɛ na yɛtse nka dɛ annhwɛ a yerunntum nnhwɛ hɛn ebusua a, ebɛnadze na ɔbɔboa hɛn ma yeedzi dɛm suro no do? (Matthew 6:31-33) (b) Yehu wɔ mfonyin no mu dɛ awarfo bi dze edziban rekɛma akyerɛbaa bi. Ebɛnadze na yebotum esua efi hɔn hɔ?

⁸ Jehovah dɔ hɛn na ɔdɔ hɛn ebusua so. Sɛ yɛgye dɛm asɛm yi dzi a, ɔrennyɛ dzen mma hɛn dɛ yebenya no mu awerɛhyɛmu dɛ ɔdze dza yehia biara bɛma hɛn. (Kenkan Matthew 6:31-33.) Jehovah wɔ ɔpɛ dɛ ɔbɛma hɛn nsa  aka dza yehia biara. Ɔyɛ Egya a ɔdɔ hɛn, ne yamu ye na ɔdze hɛn ehiadze ma hɛn! Aber a ɔbɔɔ asaase no, ɔdze dza yebehia ama yeetum atsena ase no maa hɛn. Ɔnnyɛ ɔno nko, ofi ɔdɔ mu bɔɔ ndzɛmba ahorow a ɔbɛma nyimpa enya enyigye wɔ asaase no do. (Gen. 2:9) Sɛ ɔtɔ da na dza yehia nkotsee mpo na yɛwɔ, na yennyi biribiara bio a, ɔsɛ dɛ yɛkaa dɛ kakra a yɛwɔ no mpo Jehovah na ɔdze ama hɛn. (Matt. 6:11) Ɔnnsɛ dɛ hɛn werɛ fir da dɛ biribiara a yɛdze bɔbɔ afɔr no, Jehovah bɛhyɛ hɛn ananmu ma wɔaabor do koraa. Na daakye so ɔbɛma hɛn onnyiewiei nkwa. Nestor na ne yer María hun dɛ asɛm yi yɛ nokwar paa.​—Isa. 65:21, 22.

9. Ebɛnadze na yebotum esua efi Nestor na María hɔn asɛm no mu?

⁹ Nna Nestor na María tse fie papabi mu na wɔwɔ edwuma papabi so yɛ wɔ Colombia. Wɔkaa dɛ: “Nna yɛpɛ dɛ yɛma hɛn asetsena ba famu na yɛyɛ pii wɔ Jehovah no som mu. Naaso, nna yesuro dɛ sɛ yɛma hɛn asetsena ba famu a, hɛn enyi renngye.” Ebɛnadze na ɔboaa hɔn ma wotumii dzii suro a nna wɔwɔ no do? Wɔdwendween ndzɛmba a Jehovah efi ɔdɔ mu ayɛ ama hɔn no ho. Dɛm a wɔyɛe no maa wɔgyee dzii paa dɛ Jehovah bɔhwɛ hɔn aber nyina. Dɛm ntsi wogyaa hɔn edwuma a nna sika wɔ mu no. Afei wɔtɔɔn hɔn fie no na wotui kɔr ɔman no ne fa beebi a wohia Ahendzi adawurbɔfo pii wɔ hɔ. Gyinae a wosii no maa wɔtsee nka dɛn? Nestor kaa dɛ: “Yeehu dɛ asɛm a ɔwɔ Matthew 6:33 no yɛ nokwar paa. Hɛnho nnkyeer hɛn wɔ honam afamu da. Na enyigye a yɛwɔ no ndɛ dze, ɔkyɛn dza nna yɛwɔ no nkan no koraa.”

10. Ebɛnadze ntsi na ɔnnyɛ nwanwa dɛ nyimpa suro ne nyɛnko nyimpa?

¹⁰ Ofitsi ber a Adam na Eve yɛɛ bɔn tsiaa Jehovah no, adasamba akɔ do ayɛ hɔnho bɔn paa. (Ɔsɛnk. 8:9) Dɛ nhwɛdo no, nyimpa binom dze hɔn tum dzi dwuma wɔ kwan bɔn do, nsɛmbɔndzifo yɛ basabasa, skuulfo binom sisi hɔn anyɛnkofo, wɔhyehyɛ hɔn ahorba na wopuw hɔn, na nyimpa binom mpo yɛ hɔn ebusuafo ayakayakadze. Ɔnnyɛ nwanwa dɛ ndɛ nyimpa hu ne nyɛnko nyimpa a osuro no! Ebɛn kwan do na Satan dze suro a ɔtse dɛm rusua hɛn efir?

11-12. Ebɛn kwan do na Satan dze nyimpa ho suro sua hɛn efir?

¹¹ Satan pɛ dɛ nyimpa ho suro hyɛ hɛn do mbrɛ ɔbɛyɛ a yebegyaa asɛnka edwuma no  nye ndzɛmba a Jehovah ka kyerɛ hɛn dɛ yɛnyɛ no. Satan piapia wiadze etumfo ma wɔbra hɛn som edwuma na wɔsoɛr tsia hɛn so. (Luke 21:12; Nyi. 2:10) Nyimpa piinara na wɔkeka akɔhwisɛm fa Jehovah Adasefo ho wɔ wiadze a Satan dzi do tum yi mu. Ɔtɔ da a, hɔn a wɔgye dɛm akɔhwisɛm yi dzi no serew hɛn, anaa mpo dɛ wɔtow hyɛ hɛn do yɛ hɛn basabasa. (Matt. 10:36) Aso dza Satan yɛ yi yɛ hɛn nwanwa? Dabida. Dɛmara na ɔyɛe wɔ tsetse Christianfo no hɔn aber do.​—Andw. 5:27, 28, 40.

¹² Nnyɛ ɔsoɛrtsia a aban ahorow dze ba hɛn do no nkotsee na Satan dze dzi dwuma mbrɛ ɔbɛyɛ a yɛbɔbɔ hu. Nyimpa binom wɔ hɔ a, wosuro dza hɔn ebusuafo bɛyɛ aber a woebohu nokwar no. Ɔtɔ da a iyi mpo bɔ hɔn hu kyɛn dɛ wɔbotow ahyɛ hɔn do ayɛ hɔn basabasa. Wɔdɔ hɔn ebusuafo paa na hɔn yamu a nkyɛ hɔn so woebohu Jehovah na wɔaadɔ no. Dɛm ntsi sɛ ɔba no dɛ hɔn ebusuafo kasa tsia Jehovah nye n’asomfo a, ɔyɛ a ɔyɛ hɔn yaw paa. Naaso, enyigyesɛm nye dɛ ɔtɔfabi a ebusuafo binom a nna wɔsoɛr tsia hɛn no, ebɔhwɛ no na hɔnara so abɛyɛ Jehovah Adasefo. Sɛ hɛn ebusuafo ka dɛ osiandɛ yɛabɛyɛ Jehovah Adasefo ntsi wɔnye hɛn nnyi hwee yɛ so ɛ? Sɛ ɔba no dɛm a, yɛbɛyɛ hɛn adze dɛn?

13. Sɛ hɛn ebusuafo soɛr tsia hɛn, na yɛgye dzi dɛ Jehovah dɔ hɛn a, ɔbɔboa hɛn ma yaayɛ dɛn? (Ndwom 27:10)

¹³ Asɛm bi wɔ Ndwom 27:10, ɔyɛ enyika paa na obotum akyekye hɛn werɛ. (Kenkan.) Sɛ wɔsoɛr tsia hɛn na yɛdwendwen mbrɛ Jehovah si dɔ hɛn no ho a, ɔbɔboa hɛn ma yɛdze enyigye egyina ano. Yɛgye dzi dɛ sɛ yemia hɛn enyi na yegyina ano a, Jehovah behyira hɛn. Jehovah bɔhwɛ ma hɛn nsa aka dza yehia wɔ asetsena mu, ɔbɔboa hɛn ma yeenya asomdwee nye enyigye, na ɔaaboa hɛn ma yaakɔ do nye no enya ebusuabɔ a no mu yɛ dzen. Obiara nnyi hɔ a obotum ayɛ dɛm ndzɛmba yi ama hɛn da! Biniam a yeedzi kan aka noho asɛm no bohun dɛ asɛm yi yɛ nokwar.

14. Ebɛnadze na yebotum esua efi Biniam n’asɛm no mu?

¹⁴ Nna Biniam nyim dɛ ɔman a ɔwɔ mu no, aban no rosoɛr tsia enuanom a wɔwɔ hɔ no dzendzenndzen ma ɔnnyɛ agor. Naaso ne nyina ekyir no ɔbɛyɛɛ Ɔdasefo. Nna Biniam nyim dɛ Jehovah dɔ no, na iyi boaa no ma otumii dzii nyimpa ho suro do. Biniam kaa dɛ: “Nna ɔsoɛrtsia no mu yɛ dzen paa, nna monnhwɛ kwan koraa dɛ dɛm na ɔbɛyɛ. Naaso, nna iyi mmbɔ me hu kɛse, mbom dza nna ɔbɔ me hu paa nye ɔsoɛrtsia a m’ebusuafo dze bɛba mo do no. Nna musuro dɛ gyinae a mesi abɛyɛ  Jehovah Dasefo no bɛma me papa edzi moho yaw na m’ebusuafo nkaa no so ebu me dɛ mfaso biara nnyi mo do.” Naaso, nna Biniam gye dzi dɛ Jehovah hwɛ hɔn a ɔdɔ hɔn no aber nyina. Ɔkaa dɛ: “Modwendween mbrɛ Jehovah esi aboa n’asomfo binom ma woetum egyina sikasɛm mu ahokyer, nyimpa mu nyiyimu nye basabasayɛ ano no ho. Nna minyim dɛ sɛ mokɔ do dzi Jehovah nokwar a, Jehovah behyira me. Wɔkyeer me mpɛn pii na wɔyɛɛ me ayakayakadze mpo. Dɛm aber no na mubohun paa dɛ, sɛ yɛkɔ do dzi Jehovah nokwar a, ɔboa hɛn wɔ hɛn ahohia ber mu.” Biniam bohun Jehovah dɛ Egya a ɔwɔ hɔ ankasa, na Jehovah n’asomfo so daa no edzi dɛ wɔyɛ Biniam n’ebusuafo ankasa.

15. Ebɛnadze ntsi na ɔnnyɛ nwanwa dɛ yesuro owu?

¹⁵ Bible no ma yehu dɛ owu yɛ hɛn tamfo. (1 Cor. 15:25, 26) Sɛ owu ho asɛm ba hɛn tsirmu a, annhwɛ a hɛn yamu bɛhyehye hɛn, nkanka aber a hɛnankasa anaa hɛn dɔfo bi yar ma no mu ayɛ dzen no. Ebɛnadze ntsi na yesuro owu? Siantsir no nye dɛ, Jehovah bɔɔ hɛn dɛ yɛmfa enyigye ntsena ase afebɔɔ. (Ɔsɛnk. 3:11) Sɛ yesuro dɛ yebowu a, ɔnnyɛ bɔn, osiandɛ suro a ɔtse dɛm no botum abɔ hɛnho ban. Dɛ nhwɛdo no, suro a ɔtse dɛm no botum aboa hɛn ma yaahwɛ hɛn edzidzi yie na yaatsentsen hɛn apɔw mu daa. Afei so, osiandɛ yɛmmpɛ dɛ yewu ntsi, sɛ yɛyar a yɛkɔ ayarsabea anaa yɛnom edur ama hɛnho aatɔ hɛn. Ɔno da nkyɛn a, ɔmma yɛnnyɛ ndzɛmba bi a ɔdze hɛn nkwa bɔto esian mu.

16. Ebɛn kwan do na Satan pɛ dɛ ɔfa owu ho suro a yɛwɔ no do ma yɛto Nyankopɔn ne mbra?

¹⁶ Satan nyim dɛ hɛn nkwa som bo ma hɛn papaapa. Ɔaka mpo dɛ dza nyimpa wɔ biara ɔdze bɛma dze aper no nkwa; ebusuabɔ a yɛnye Jehovah wɔ mpo ka ho. (Job 2:4, 5) Asɛm a Satan aka yi nnyɛ nokwar koraa! Naaso, osiandɛ Satan tum dze owu ba, na hɛn so yesuro dɛ yebowu ntsi, ɔbɔ mbɔdzen dɛ ɔbɛfa suro a ɔtse dɛm do ma yeebu Jehovah ne mbra do. (Heb. 2:14, 15) Ɔtɔ da a Satan dze nyimpa binom dzi dwuma ma wohunahuna Jehovah n’asomfo dɛ, sɛ woenngyaa Jehovah som a wobokuku hɔn. Ɔtɔfabi so a, ayarsa ho asɛm botum asoɛr dzendzenndzen, na Satan botum afa ɔno do dze asɛɛ hɛn gyedzi. Obotum aba dɛ adɔktafo anaa hɛn ebusuafo a wɔnnyɛ Adasefo bɛhyɛ hɛn dɛ yɛngye bɔgya. Naaso yenyim dɛ Jehovah kyir biribi a ɔtse dɛm. Anaadɛ bi a obi nye hɛn bɛkasa dɛ yɛnhwehwɛ ayarsa bi a Bible no kasa tsia.

17. Dɛ mbrɛ Romefo 8:37-39 ma yehu no, ebɛnadze ntsi na ɔnnsɛ dɛ yɛma owu bɔ hɛn hu?

¹⁷ Yɛmmpɛ dɛ yewu, naaso sɛ ɔkɛba dɛ yewu a Jehovah bɔkɔ do ada ɔdɔ edzi akyerɛ hɛn. (Kenkan Romefo 8:37-39.) Sɛ Jehovah n’asomfo wu a, no werɛ rimmfir hɔn da. Jehovah n’enyi do no, ɔtse dɛ mbrɛ wɔda ho ara tse ase. (Luke 20:37, 38) Ɔwɔ ɔpɛ a no mu yɛ dzen dɛ obenyan hɔn aba nkwa mu. (Job 14:15) Jehovah dze ne Ba no nkwa a ɔsom bo no maa hɛn ‘ama yeenya onnyiewiei nkwa.’ (John 3:16) Yenyim dɛ Jehovah dɔ hɛn papaapa na ɔdwen hɛnho so. Dɛm ntsi sɛ yɛyar anaa wɔdze owu hunahuna hɛn a, ɔsɛ dɛ yɛhwehwɛ awerɛkyekyer, nyansa nye ahoɔdzen fi Jehovah hɔ na ɔnnsɛ dɛ yɛdan hɛn ekyir ma no da! Dɛm pɛpɛɛpɛ na Valérie na no kun yɛe.​—Ndw. 41:3.

18. Ebɛnadze na yebotum esua efi Valérie n’asɛm no mu?

¹⁸ Aber a Valérie dzii mfe 35 no, wɔkaa kyerɛɛ no dɛ oenya cancer bi a ɔyɛ hu. Hwɛ mbrɛ ɔdɔ a Jehovah wɔ ma no no boaa no ma odzii owu ho suro a nna ɔwɔ no do. Ɔkaa dɛ: “Aber a wɔkaa kyerɛɛ me dɛ menya cancer no, ɔmaa hɛn asetsena sesaa prɛko pɛr. Mbrɛ tsebea no kɛyɛe no, sɛ nna mubotum atsena nkwa mu a, nna ɔsɛ dɛ wɔyɛ me oprehyɛn bi a ɔyɛ hu. Adɔktafo  pii a menye hɔn kasae no kaa dɛ sɛ wɔbɛyɛ me oprehyɛn no a gyedɛ wɔma me bɔgya. Ɔwɔ mu dɛ nna musuro dze, naaso nna memmpɛ dɛ mubu Nyankopɔn n’ahyɛdze do na megye bɔgya! M’asetsena nyina mu no, Jehovah ada no edzi dɛ ɔdɔ me paa. Afei dze, nna ɔsɛ dɛ mara so meyɛ biribi dze kyerɛ dɛ modɔ no. Aber biara a nna adɔktafo no bɛka akyerɛ me dɛ me yarba no reyɛ kɛse no, nna ɔno mbom ma misi mo bo paa dɛ mobɔkɔ do edzi Jehovah nokwar na maama Satan n’enyi ewu. Ewiei koraa no, minyaa dɔkta bi ma ɔyɛɛ me oprehyɛn no a ɔammfa bɔgya enndzi dwuma, na asɛm bɔn biara so ennsi. M’apɔwmudzen nnyɛɛ papa biara dze, naaso Jehovah akɔ do ara ama hɛn nsa aka dza yehia no. Dɛ nhwɛdo no, asafo nhyiamu a yɛkɔree ansaana wɔreka akyerɛ me dɛ menya cancer no, adzesua asɛm a yesusuu ho wɔ Ɔweɔn-Aban mu no, nna n’asɛntsir nye ‘Akokodur A Yɛdze Begyina Amandzehu Ano.’ * Dɛm adzesua asɛm no boaa hɛn paa. Yɛkaan no mpɛn pii. Nsɛm a ɔtsetse dɛm a yɛkenkan nye asafo nhyiamu na asɛnka a yɛkɔ no dabaa no ma menye mo kun nya akomatɔyamu na ɔboa hɛn ma yesisi gyinae pa.”

19. Ebɛn asɛm na obesi ndaansa yi ara?

¹⁹ Jehovah aboa Christianfo a wɔwɔ wiadze nyina ma woetum egyina tsebea ahorow a no mu yɛ dzen ano na woetum ako etsia Abɔnsam. (1 Pet. 5:8, 9) Obotum aboa woara so ma aayɛ dɛm. Ɔrennkyɛr biara, Jehovah bɛma Jesus nye hɔn a ɔnye hɔn bedzi adze no ‘asɛɛ Abɔnsam ndwuma.’ (1 John 3:8) Ɔno ekyir no, Nyankopɔn n’asomfo a wɔwɔ asaase do no runnsuro hwee na biribiara rommbɔ hɔn hu. (Isa. 54:14; Mic. 4:4) Naaso, seseiara a yɛrotweɔn dɛ dɛm aber no bɛba no, ɔsɛ dɛ yɛyer hɛnho dɛ yebedzi suro biara a yɛwɔ no do.

20. Ebɛnadze na ɔbɔboa hɛn ma yeedzi suro biara do?

²⁰ Ɔsɛ dɛ yɛkɔ do ara hyɛ gyedzi a yɛwɔ dɛ Jehovah dɔ hɛn na ɔbɔ hɛnho ban no mu dzen. Dza ɔbɔboa hɛn ma yaayɛ iyi nye dɛ yɛbɔdwendwen mbrɛ Jehovah sii bɔɔ n’asomfo ho ban wɔ mber bi a etwa mu no ho. Ɔno ekyir no, ɔsɛ dɛ yɛka ho asɛm kyerɛ afofor. Afei so, ɔsɛ dɛ yɛkaa dza Jehovah ayɛ dze aboa hɛnankasa ma yeetum egyina tsebea ahorow a no mu yɛ dzen ano no. Jehovah bɔboa hɛn ma yeetum edzi suro biara do!​—Ndw. 34:4.