1. Dɛ mbrɛ Ɔsɛnkafo 7:20 ma yehu no, ebɛn nokwasɛm na Ɔhen Solomon kae?

 ƆHEN Solomon kaa dɛ: “Ɔtseneneenyi nnyi asaase do a ɔyɛ papa na ɔnnyɛ bɔn.” (Ɔsɛnk. 7:20) Asɛm yi yɛ nokwar paa! Hɛn nyina bɔn wɔ hɛnho. (1 John 1:8) Dɛm ntsi sɛ yɛfom Nyankopɔn a yebehia no hɔ bɔnfakyɛ na dɛmara na sɛ yɛfom hɛn nuanom so a yebehia hɔn hɔ bɔnfakyɛ.

2. Sɛ wo nyɛnko bi a ɔbɛn wo paa dze wo mfom kyɛ wo a, etse nka dɛn?

² Ana ekaa ber bi a eyɛɛ adze ma ɔhaaw wo nyɛnko bi a ɔbɛn wo paa? Nna epɛ dɛ ɔdze wo mfom kyɛ wo na hom siesie hom ntamu, ntsi ifii w’akoma mu paa no kyɛw. Aber a wo nyɛnko no fii n’akoma mu dze wo mfom kyɛɛ wo no, etsee nka dɛn? Aso w’akoma tɔɔ wo yamu? Ekyingye biara nnyi ho dɛ w’akoma tɔɔ wo yamu na w’enyi gyee so!

3. Ebɛnadze na yebosusu ho wɔ adzesua yi mu?

³ Yɛpɛ dɛ yɛnye Jehovah nya anyɛnkofa a no mu yɛ dzen paa. Naaso, ɔtɔ da a, yɛbɛka asɛm bi anaa yɛbɛyɛ biribi ma wɔaahaw no. Ebɛnadze ntsi na ɔsɛ dɛ yenya awerɛhyɛmu dɛ Jehovah pɛ paa dɛ ɔdze hɛn bɔn kyɛ hɛn? Sɛ yɛdze mbrɛ Jehovah dze bɔn kyɛ no toto mbrɛ nyimpa dze bɔn kyɛ no ho a, ebɛnadze ntsi na yebotum aka dɛ Jehovah nedze no yɛ soronko koraa? Afei, woananom na Nyankopɔn dze hɔn bɔn kyɛ hɔn? Yebosusu dɛm nsɛmbisa yinom ho wɔ adzesua yi mu.

4. Ebɛnadze ntsi na yebotum enya awerɛhyɛmu dɛ Jehovah ayɛ krado dɛ ɔdze hɛn bɔn bɛkyɛ hɛn?

⁴ Nyankopɔn n’Asɛm no ma hɛn awerɛhyɛmu dɛ, Jehovah wɔ ɔpɛ dɛ ɔdze hɛn bɔn bɛkyɛ hɛn. Aber a Jehovah yii noho  edzi kyerɛɛ Moses wɔ Bepɔw Sinai do no, ɔnam ɔbɔfo bi do kaa dɛ: ‘Jehovah, Jehovah, Nyankopɔn a ayamuhyehye nye adom ahyɛ no ma, ɔfa ebufuw nyaa, na no mbɔbɔrhu nye no nokwar dɔɔ so; osie mbɔbɔrhu ma mpempem, na ɔdze emumuyɛ nye mbrato nye bɔn kyɛ.’ (Ex. 34:6, 7) Jehovah ne yamu ye na ɔyɛ ehumbɔbɔr Nyankopɔn a ɔayɛ krado aber nyina dɛ ɔdze ndzebɔnyɛfo a woenu hɔnho no hɔn bɔn bɛkyɛ hɔn.​—Neh. 9:17; Ndw. 86:15.

5. Dɛ mbrɛ Ndwom 103:13, 14 ma yehu no, mbrɛ Jehovah si nyim hɛn yie no ka no ma ɔyɛ dɛn?

⁵ Jehovah nye hɛn Bɔfo ntsi onyim hɛnho biribiara. Ɔwodze dwen ho hwɛ! Onyim obiara a ɔwɔ asaase do no ho nsɛm nyina. (Ndw. 139:15-17) Dɛm ntsi onyim sintɔ a wɔdze woo hɛn no nyina. Dza ɔkyɛn dɛm mpo no, dza yɛafa mu wɔ asetsena mu nyina Jehovah n’enyiwa tua, ntsi onyim siantsir a yɛda suban ahorow bi edzi wɔ hɛn abrabɔ mu no. Mbrɛ Jehovah si nyim hɛn yie no ka no ma ɔyɛ dɛn? Iyi ka no ma ohu hɛn mbɔbɔr.​—Ndw. 78:39; kenkan Ndwom 103:13, 14.

6. Ebɛn kwan do na Jehovah ada no edzi dɛ ɔpɛ paa dɛ ɔdze hɛn bɔn kyɛ hɛn?

⁶ Jehovah ada no edzi dɛ ɔpɛ paa dɛ ɔdze hɛn bɔn kyɛ hɛn. Onyim dɛ osian Adam no bɔn ntsi, nyimpa nyina yɛ bɔn na yewu. (Rom. 5:12) Biribiara nnyi hɔ a yebotum ayɛ dze agye hɛnho anaa obi fofor biara efi bɔn na owu mu. (Ndw. 49:7-9) Naaso, hɛn Nyankopɔn a ɔwɔ ɔdɔ no daa ayamuhyehye edzi na ɔyɛɛ nhyehyɛɛ a ɔbɛma yɛadze hɛnho. Ebɛnadze na ɔyɛe? Dɛ mbrɛ John 3:16 ma yehu no, Jehovah somaa no Dɔba no ma obowui maa hɛn. (Matt. 20:28; Rom. 5:19) Jesus wui maa hɛn mbrɛ ɔbɛyɛ a ɔbɛgye obiara a ɔkyerɛ no mu gyedzi no efi bɔn na owu mu. (Heb. 2:9) Ɔwodze, hwɛ yaw kɛsenara a Jehovah faa mu aber a ohun dɛ no Dɔba no ruwu enyimguase wu a ɔyɛ yaw no! Ɔyɛ ampa dɛ sɛ Jehovah mmpɛ dɛ ɔdze hɛn bɔn kyɛ hɛn a, nkyɛ ɔamma ne Ba no emmbowu amma hɛn.

7. Ebɛn Bible mu nhwɛdo na ɔkyerɛ dɛ Jehovah dze nyimpa binom hɔn bɔn kyɛɛ hɔn?

⁷ Sɛ yɛhwɛ Bible mu a, yehu nyimpa pii a Jehovah dze hɔn bɔn kyɛɛ hɔn. (Eph. 4:32) Sɛ yɛka dɛm a, woana ho asɛm na ɔba w’adwen mu? Bi a Ɔhen Manasseh ho asɛm ba w’adwen mu. Dɛm ɔhen bɔn yi yɛɛ bɔn akɛse pii tsiaa Jehovah. Ɔsoom abosom na ɔhyɛɛ nkorɔfo so nkuran ma wɔyɛɛ dɛmara. Ɔdze nankasa ne  mba bɔɔ afɔr maa abosom. Ɔamma aannso hɔ ara, ɔdze bosom bi no honyi a ɔyɛe no kesii Jehovah n’asɔrfi hɔ. Bible no ka noho asɛm dɛ: “Ɔbɔɔ mbusu pii wɔ Ewuradze enyi do dze yii no ebufuw.” (2 Mber. 33:2-7) Naaso, aber a Manasseh nuu noho wɔ n’akoma mu no, Jehovah dze no bɔn kyɛɛ no. Ekyir yi, Nyankopɔn sanee dze no baa n’ahendzi no mu. (2 Mber. 33:12, 13) Bi a nyimpa fofor a noho asɛm ba w’adwen mu nye Ɔhen David. Ɔyɛɛ bɔn akɛse tsiaa Jehovah. No mu bi nye dɛ ɔfaa obi ne yer na ɔmaa wokum ɔbarimba no so kaa ho. Ne nyina mu no, aber a David nuu noho nokwar mu na ɔgyee too mu dɛ ɔayɛ bɔn no, Jehovah dze kyɛɛ no. (2 Sam. 12:9, 10, 13, 14) Yebotum enya awerɛhyɛmu dɛ Jehovah pɛ paa dɛ ɔdze hɛn bɔn kyɛ hɛn. Yebohu wɔ adzesua yi mu dɛ, mbrɛ Jehovah dze bɔn kyɛ no, yerunntum mmfa nntoto nyimpa biara nedze ho.

8. Jehovah nye Ɔtsɛmbuafo a ɔsen biara. Ebɛn kwan do na iyi ka mbrɛ osi dze bɔn kyɛ no?

⁸ Jehovah yɛ ‘asaase nyinara Ɔtsɛmbuafo.’ (Gen. 18:25) No ho hia dɛ ɔtsɛmbuafo pa biara tse mbra a ɔdze bu atsɛn no ase yie. Jehovah nye hɛn Tsɛmbuafo, na onyim mbra no yie osiandɛ ɔnoara nye hɛn Mbrahyɛfo. (Isa. 33:22) Obiara nnyi hɔ a obotum akyerɛ hɛn papa na bɔn ho asɛm yie akyɛn Jehovah. Ebɛnadze bio na ɔsɛ dɛ ɔtsɛmbuafo pa biara yɛ? Ɔsɛ dɛ osusu nokwasɛm biara a ɔwɔ asɛm bi mu no ho ansaana oebu atsɛn. Iyi mu so yehu dɛ Jehovah nye Ɔtsɛmbuafo a ɔsen biara, osiandɛ ɔnodze aber nyina onyim nokwasɛm a ɔwɔ asɛm bi mu no.

9. Ebɛnadze na Jehovah gyina do hwɛ dɛ ɔdze obi no bɔn bɛkyɛ no anaa ɔremmfa nnkyɛ no?

⁹ Jehovah nntse dɛ nyimpa atsɛmbuafo, osiandɛ asɛm biara a ɔbɛba n’enyim no, onyim nokwasɛm a ɔwɔ mu nyinara. (Gen. 18:20, 21; Ndw. 90:8) Jehovah dze, ɔnntse dɛ ɔdasanyi na oeegyina dza ɔtse nye dza ohu do ebu atsɛn. Jehovah nyim paa dɛ obi no suban a wɔdze woo no, mbrɛ wosii tsetsee no, beebi a ɔtse, mbrɛ ɔtse nka nye mbrɛ ɔdwen ndzɛmba ho no tum ka ne ndzeyɛɛ. Afei so, Jehovah nyim hɛn akoma mu nsɛm nyinara. Siantsir a yɛyɛ ndzɛmba ahorow bi no, ɔtse ase paa. Jehovah dze, biribiara nnyi hɔ a obotum esuma no. (Heb. 4:13) Iyi ma yehu dɛ aber nyina Jehovah gyina nyim a onyim asɛm bi mu yie no do na ɔdze obi no bɔn kyɛ no.

10. Ebɛnadze ntsi na yebotum aka dɛ Jehovah bu atsɛntsenenee aber nyina na ɔnnyɛ nyiyimu? (Deuteronomy 32:4)

¹⁰ Jehovah bu atsɛntsenenee aber nyina na ɔnnyɛ nyiyimu. Iyi kyerɛ dɛ ɔnnyɛ enyimhwɛ wɔ atsɛmbu mu. Jehovah nngyina mbrɛ obi tse, sika a ɔwɔ, dzin a ɔagye anaa dza otum yɛ do ana ɔdze no bɔn akyɛ no. (1 Sam. 16:7; Jas. 2:1-4) Obiara nnyi hɔ a obotum ama Jehovah bribe anaadɛ obotum ahyɛ no dɛ ɔnyɛ biribi. (2 Mber. 19:7) Onndzi n’akoma ekyir anaa onngyina mbrɛ osi tse nka do nnyɛ adze. (Ex. 34:7) Jehovah nye Ɔtsɛmbuafo a ɔkyɛn biara, osiandɛ ɔtse hɛn ase na dza ɔkɔ do wɔ hɛn asetsena mu biara so onyim.​—Kenkan Deuteronomy 32:4.

11. Ebɛnadze ntsi na mbrɛ Jehovah dze bɔn kyɛ no yɛ soronko koraa?

¹¹ Hɔn a Jehovah maa wɔkyerɛɛw Hebrew Kyerɛwnsɛm no hun dɛ Jehovah no bɔnfakyɛ yɛ soronko koraa. Sɛ nna wɔrekyerɛw Jehovah no bɔnfakyɛ ho asɛm a, mpɛn pii no nna Hebrew kasafua bi na wɔdze dzi dwuma. Nhwehwɛmu nwoma bi ka dɛ wɔdze dɛm kasafua yi “dzi dwuma tsitsir ber a wɔreka bɔnfakyɛ a Nyankopɔn da no edzi kyerɛ nyimpa a ɔayɛ bɔn no ho asɛm. Wɔmmfa dɛm kasafua yi  nndzi dwuma aber a wɔreka bɔnfakyɛ a onndzi mu a nyimpa da no edzi kyerɛ ne nyɛnko nyimpa no ho asɛm.” Jehovah nkotsee na ɔwɔ tum dɛ ɔdze obi a oenu noho nokwar mu no bɔn kyɛ no koraa. Sɛ Jehovah dze hɛn bɔn kyɛ hɛn a, yɛtse nka dɛn?

12-13. (a) Sɛ Jehovah dze obi no bɔn kyɛ no a, nyimpa no tse nka dɛn? (b) Sɛ Jehovah dze hɛn bɔn kyɛ hɛn a, ebɛnadze na ɔrennsan nnyɛ?

¹² Sɛ yɛgye to mu ampaara dɛ Jehovah dze hɛn bɔn akyɛ hɛn a, ɔma yenya ahotɔ mber, kyerɛ dɛ, yenya asomdwee nye tsibowa pa. Jehovah nkotsee na sɛ ɔdze hɛn bɔn kyɛ hɛn a yebenya ahotɔ a ɔtse dɛm. (Andw. 3:19) Sɛ Jehovah dze hɛn bɔn kyɛ hɛn a, ɔdze kyɛ hɛn koraa. Jehovah siesie yɛnye no ntamu ebusuabɔ no ma ɔyɛ tse dɛ mbrɛ yɛnnyɛɛ no bɔn mpo da.

¹³ Sɛ Jehovah dze hɛn bɔn kyɛ hɛn a, ɔrennsan nnkɛfa ho asɛm mmba, dɛmara so na ɔronntwe hɛn aso wɔ bɔn no ho bio. (Isa. 43:25; Jer. 31:34) Sɛ Jehovah dze hɛn bɔn kyɛ hɛn a, ɔma yɛnye hɛn bɔn ntamu war dɛ mbrɛ “anee na boka ntamu war no.” * (Ndw. 103:12) Sɛ yɛdwendwen Jehovah no bɔnfakyɛ a ɔkɔ ekyir no ho a, ɔma hɛn enyi gye na yenya obu kɛse ma no. (Ndw. 130:4) Naaso, woananom na Jehovah dze hɔn bɔn kyɛ hɔn?

14. Dze besi ha yi, ebɛnadze na yeesua afa Jehovah no bɔnfakyɛ ho?

¹⁴ Dɛ mbrɛ yeehu wɔ adzesua yi mu no, sɛ Jehovah dze obi no bɔn bɛkyɛ no a, ɔnnhwɛ dɛ bɔn no yɛ kɛse anaa ɔyɛ ketseketse ansaana ɔdze akyɛ no. Sɛ Jehovah dze obi no bɔn bɛkyɛ no a, ɔdze ne nyansaa a ɔwɔ dɛ Bɔadze, Mbrahyɛfo nye Ɔtsɛmbuafo no dzi dwuma hwɛ dɛ nyimpa no fata bɔnfakyɛ anaa ɔmmfata. Naaso, ebɛn ndzɛmba na Jehovah gyina do hwɛ dɛ ɔsɛ dɛ ɔdze obi no bɔn kyɛ no anaa ɔnnsɛ dɛ ɔdze kyɛ no?

15. Dɛ mbrɛ Luke 12:47, 48 kyerɛ no, adze kor a Jehovah gyina do hwɛ dɛ obi a ɔayɛ bɔn no fata bɔnfakyɛ anaa ɔmmfata nye dɛn?

¹⁵ Adze kor a Jehovah hwɛ nye dɛ, aso nna nyimpa no nyim dɛ dza ɔreyɛ no yɛ bɔn anaa nna onnyim. Jesus kaa iyi ho asɛm pefee wɔ Luke 12:47, 48. (Kenkan.) Sɛ obi hyɛ da ara bɔ pɔw kɛyɛ biribi a onyim paa dɛ Jehovah kyir a, ɔayɛ bɔn kɛse. Obotum aba  dɛ Jehovah remmfa obi a ɔtse dɛm no no bɔn nnkyɛ no. (Mark 3:29; John 9:41) Naaso hom mma yɛnka, ɔtɔfabi a, yetum yɛ biribi a yenyim paa dɛ ɔnnyɛ. Sɛ ɔba dɛm a, ana Jehovah botum dze hɛn bɔn akyɛ hɛn? Nyew! Iyi dze hɛn ba adze fofor a Jehovah gyina do hwɛ dɛ obi a ɔayɛ bɔn no fata bɔnfakyɛ anaa ɔmmfata.

16. Sɛ wɔka dɛ obi enu noho a, ɔkyerɛ dɛn? Sɛ Jehovah dze hɛn bɔn bɛkyɛ hɛn a, ebɛnadze ntsi na no ho hia dɛ yenu hɛnho?

¹⁶ Adze fofor a Jehovah gyina do hwɛ dɛ obi a ɔayɛ bɔn no fata bɔnfakyɛ anaa ɔmmfata nye dɛ, ɔhwɛ dɛ ana nyimpa no enu noho wɔ n’akoma mu anaa onnuu noho. Sɛ wɔka dɛ obi enu noho a, ɔkyerɛ dɛn? Ɔkyerɛ dɛ obi a ɔayɛ bɔn no “bɛsesa n’adwen anaa no suban.” Dza ɔka ho nye dɛ nyimpa no bedzi yaw anaa obedzi awerɛhow kɛse wɔ bɔn a ɔayɛ no ho anaa papa a ɔannyɛ no ho. Nnyɛ bɔn a ɔayɛ no nko na odzi yaw wɔ ho, mbom odzi yaw so wɔ sunsum afamu mberɛwyɛ a ɔkɔr mu ma ntsi ɔkɛyɛɛ dɛm bɔn no ho. Kaa dɛ Ɔhen Manasseh na Ɔhen David nyina yɛɛ bɔn akɛse, naaso osiandɛ wonuu hɔnho nokwar mu ntsi, Jehovah dze hɔn bɔn kyɛɛ hɔn. (1 Ahe. 14:8) Asɛm no nye dɛ, sɛ Jehovah dze obi no bɔn bɛkyɛ no a, gyedɛ oehu biribi a ɔkyerɛ dɛ nyimpa no enu noho ana. Naaso, sɛ yedzi yaw wɔ bɔn anaa dza ɔmaa yɛkɛyɛɛ bɔn no ho a, ɔno ara nndɔɔ so. Ɔsɛ dɛ yesi hɛn bo dɛ yɛbɛyɛ ndzɛmba ahorow bi so. * Iyi dze hɛn ba adze fofor so a Jehovah gyina do hwɛ dɛ obi fata bɔnfakyɛ anaa ɔmmfata.

17. Sɛ wɔka dɛ obi adan noho a, ɔkyerɛ dɛn, na ebɛnadze ntsi na iyi ho hia? (Isaiah 55:7)

¹⁷ Adze fofor so a no ho hia a Jehovah hwɛ nye dɛ, ana nyimpa no adan noho anaa ɔnnyɛɛ dɛm. Sɛ wɔka dɛ obi adan noho a, ɔkyerɛ dɛ nyimpa no egyaa ne nkan abrabɔ biara a omuo no na ɔahyɛ ase reyɛ dza Jehovah pɛ. (Kenkan Isaiah 55:7.) Ɔsɛ dɛ nyimpa no ma no nsusui nye Jehovah nedze hyia. (Rom. 12:2; Eph. 4:23) Ɔsɛ dɛ osi no bo dɛ obegyaa no nsusui a ɔnnyɛ papa no nye ne nkan abrabɔ nyina. (Col. 3:7-10) Yɛreka yi ara, ɔyɛ gyedzi a yɛwɔ wɔ Christ n’afɔrbɔ mu no na  Jehovah gyina do dze hɛn bɔn kyɛ hɛn na ɔtsew hɛnho fi hɛn bɔn ho. Naaso, sɛ Jehovah bɛyɛ dɛm a, gyedɛ ohu dɛ yɛrobɔ mbɔdzen dɛ yebegyaa ndzɛmba bɔn yɛ.​—1 John 1:7.

18. Ebɛnadze na yeesua afa Jehovah no bɔnfakyɛ ho?

¹⁸ Hom mma yɛnhwɛ nsɛntsitsir a yeesusu ho wɔ adzesua yi mu no bio. Sɛ yɛreka obi a ɔdze bɔn kyɛ paa wɔ amansan yi mu a, ɔno nye Jehovah. Ebɛnadze ntsi na yɛreka dɛm? Odzi kan, ɔayɛ krado aber biara dɛ ɔdze hɛn bɔn bɛkyɛ hɛn. Otsia ebien, onyim mbrɛ yɛtse papaapa. Onyim hɛnho biribiara, na ɔno nye Nyia ɔfata paa a obotum ehu dɛ yeenu hɛnho nokwar mu anaa yennuu hɛnho. Otsia ebiasa, sɛ Jehovah dze hɛn bɔn kyɛ hɛn a, ɔpepa fi hɔ korakora. Iyi boa hɛn ma yenya tsibowa pa na ɔma yenya Jehovah n’enyim adom.

19. Yɛyɛ nyimpa a yenndzi mu na yɛkɔ do yɛ bɔn dze, naaso ebɛnadze ntsi na yebotum enya enyigye?

¹⁹ Yɛyɛ nyimpa a bɔn wɔ hɛnho yi ara dze, ɔnyɛ dɛn ara a yɛbɛyɛ bɔn. Naaso, asɛm bi wɔ Insight on the Scriptures, Volume 2, krataafa 771 no. Dɛm asɛm no botum ama yeenya awerɛhyɛmu. Ɔka dɛ: “Jehovah nyim dɛ bɔn wɔ n’asomfo ho na ɔda mbɔbɔrhu edzi kyerɛ hɔn. Ntsi, ɔnnsɛ dɛ wodzi awerɛhow aber nyina wɔ bɔn a sintɔ a wɔdze woo hɔn ntsi wɔyɛ no ho. (Nd 103:8-14; 130:3) Sɛ wɔyɛ dza wobotum biara dɛ wɔbɛyɛ Nyankopɔn n’apɛdze a, ɔnodze wobotum enya enyigye ankasa. (Php 4:4-6; 1Jo 3:19-22).” Asɛm yi hyɛ nkuran paa!

20. Ebɛnadze na yebosusu ho wɔ adzesua a odzi hɔ no mu?

²⁰ Sɛ yɛyɛ bɔn na yenu hɛnho nokwar mu a, Jehovah ayɛ krado dɛ ɔdze hɛn bɔn bɛkyɛ hɛn. Iyi ma hɛn enyi gye paa! Naaso, yebesi dɛn esuasua mbrɛ Jehovah si dze bɔn kyɛ no? Ebɛn kwan do na mbrɛ nyimpa dze bɔn kyɛ no nye Jehovah nedze dzi nsɛ, naaso ebɛn kwan do na Jehovah nedze no yɛ soronko? Ebɛnadze ntsi na no ho hia dɛ yehu nsonsonee a ɔwɔ Jehovah no bɔnfakyɛ nye nyimpa dze mu no? Yebenya dɛm nsɛmbisa yi ho mbuae wɔ adzesua a odzi hɔ no mu.