1. Dɛ mbrɛ wɔakã wɔ 3 John 3, 4 no, ebɛnadze na ɔma hɛn enyi gye?

BER a ɔsomafo John tsee dɛ hɔn a ɔboaa hɔn ma wobohun nokwar no da ho ara rosom Jehovah wɔ nokwardzi mu no, mbrɛ n’enyi sii gyee fae no, ana ibotum etwa ho mfonyin wɔ w’adwen mu? Nna John bu dɛm enuanom yi dɛ wɔyɛ ne mba. Wohyiaa ɔhaw pii, na John bɔɔ mbɔdzen hyɛɛ dɛm Christianfo anokwafo yi hɔn gyedzi dzen. Dɛmara so na ɔtse wɔ hɛn afamu. Hɛn mba anaa hɔn a yɛaboa hɔn ma wɔaba nokwar no mu no, sɛ wohyira hɔnho do ma Jehovah na wɔkɔ do som no a, ɔma hɛn enyi gye.​—Kenkan 3 John 3, 4.

2. John ne nkrataa a ɔkyerɛwee no, nna ne tsirmpɔw nye dɛn?

² Afe 98 H.B. no, nna ɔbɛyɛ dɛ John tse Ephesus anaa beebi a ɔbɛn hɔ. Obotum aba dɛ aber a woyii no fii efiadze wɔ Patmos supɔw do no na ɔkɛtsenaa hɔ. Bɛyɛ dɛm aber no na Jehovah no sunsum krɔnkrɔn kaa no ma ɔkyerɛɛw nkrataa ebiasa no. Tsirmpɔw a ɔdze kyerɛɛw nkrataa yi nye dɛ, obekenyan nokwar Christianfo ma gyedzi a wɔwɔ wɔ Jesus mu no, wɔaakɔ do ahyɛ mu dzen na wɔaakɔ do anantsew nokwar no mu.

3. Ebɛn nsɛmbisa na yebenya ho mbuae?

³ Aber a John kyerɛɛw ne nkrataa no, nna ɔno nkotsee nye ɔsomafo a ɔtse ase. Nna nkantando bɔn a ator akyerɛkyerɛfo rinya wɔ asafo ahorow no do no ho asɛm haw no. * (1 John 2:18, 19, 26) Nna awaafo yi kã dɛ wonyim Nyankopɔn, naaso nna wonndzi Jehovah n’ahyɛdze do. Hom mma yɛnhwɛ afotu a ofi sunsum mu a John dze mae no. Aber a yɛreyɛ dɛm no, yebenya nsɛmbisa ebiasa yi ho mbuae: Nokwar no mu a yɛbɛnantsew no kyerɛ dɛn? Ebɛn ɔhaw ahorow na yehyia? Yebesi dɛn aboa hɛnho ma yaakɔ do anantsew nokwar no mu?

4. Dɛ mbrɛ 1 John 2:3-6 nye 2 John 4, 6 kyerɛ no, nokwar no mu a yɛbɛnantsew no kyerɛ dɛn?

⁴ Sɛ yebotum anantsew nokwar no mu a, ɔsɛ dɛ yehu nokwasɛm a ɔwɔ Nyankopɔn n’Asɛm Bible mu no. Sɛ ɔno da nkyɛn a, ɔsɛ dɛ “yedzi [Jehovah] n’ahyɛdze do,” kyerɛ dɛ, ɔsɛ dɛ yɛyɛ setsie ma no. (Kenkan 1 John 2:3-6; 2 John 4, 6.) Jesus ayɛ setsie a yɛbɛyɛ ama Jehovah no ho nhwɛdo a odzi mũ ama hɛn. Ntsi, ɔkwan tsitsir kor a yebotum afa do ayɛ setsie ama Jehovah nye dɛ yebedzi Jesus no nhwɛdo ekyir pɛɛ.​—John 8:29; 1 Pet. 2:21.

5. Ebɛnadze na ɔsɛ dɛ yɛgye dzi?

⁵ Sɛ yɛbɔkɔ do anantsew nokwar no mu a, ɔsɛ dɛ yɛgye to mu dɛ Jehovah kã nokwar aber nyina, na biribiara a ɔkã kyerɛ hɛn wɔ n’Asɛm Bible no mu no yɛ nokwar. Afei so, ɔsɛ dɛ yɛgye to mu dɛ Jesus na ɔyɛ Messiah a wɔbɔɔ noho anohoba no. Ndɛ, nyimpa pii nngye nnto mu dɛ Jesus nye Nyankopɔn n’Ahendzi no do Hen a ɔasera no. John kãa dɛ, nna “ndaadaafo pii” wɔ hɔ a wobotum adaadaa hɔn a wonnsuoo nokwasɛm a ɔfa Jehovah na Jesus ho no mu dzen no. (2 John 7-11) John kyerɛɛw dɛ: “Woana na ɔyɛ ɔtorfo dɛ nyia ɔpow dɛ Jesus nye Christ no?” (1 John 2:22) Ɔkwan kortsee a yebotum afa do a ɔnnkɛma afofor adaadaa hɛn nye dɛ yebosũa Nyankopɔn n’Asɛm no. Sɛ yɛyɛ dɛm nkotsee dze a, yebohu Jehovah na Jesus yie. (John 17:3) Na iyi na ɔbɛma yɛagye edzi dɛ yɛwɔ nokwar no.

6. Ebɛnadze na obotum esiw Adasefo a wɔyɛ mbabun no kwan dɛ wɔbɛnantsew nokwar no mu?

⁶ Ɔsɛ dɛ Christianfo nyinara ma hɔn enyi da hɔ amma nyimpa nyansapɛ aanndaadaa hɔn. (1 John 2:26) Christianfo a wɔyɛ mbabun tsitsir na ɔsɛ dɛ wɔyɛ ahwɛyie na wɔaanntɔ efir a ɔtse dɛm mu. Alexia * yɛ hɛn akyerɛbaa a ɔyɛ Frenchnyi a oedzi mfe 25. Ɔkãa dɛ: “Ber a nna mokɔ skuul no, musũaa adandandzi nye nyimpa nyansapɛ ho adze. Iyi maa m’adwen mu yɛɛ me konsee wɔ nokwar no ho. Ɔtɔ da a, nna m’enyi gye nkyerɛkyerɛ a ɔtse dɛm ho. Naaso, nna mususu dɛ ɔnnkɛyɛ papa dɛ mubobu m’enyi egu dza Bible no kyerɛkyerɛ do na maagye dza m’akyerɛkyerɛfo bɛkã biara ato mu.” Alexia sũaa nwoma a wɔato dzin Life​—How Did It Get Here? By Evolution or by Creation? Adapɛn kakraabi ntamu no, n’adwen mu annyɛ no konsee bio. Alexia kãa dɛ: “Musũaa Bible no na mebɛgyee dzii dɛ dza ɔkã no  yɛ nokwar. Afei, mubohun dɛ, sɛ medze no mu gyinapɛn bɔ me bra a, mibenya enyigye na asomdwee.”

7. Ebɛnadze na ɔsɛ dɛ yɛhwɛ yie na yaannyɛ, na ebɛnadze ntsi a?

⁷ Christianfo nyinara, dɛ wɔyɛ mpanyimfo anaa mbofra no, ɔsɛ dɛ wɔyɛ ahwɛyie na annkɛyɛ dɛ wɔrosom Jehovah, naaso ber kor no ara wɔreyɛ ndzebɔn. John kãa no pefee dɛ yerunntum nnantsew nokwar no mu na ber kor no ara yɛmmbɔ bra bɔn. (1 John 1:6) Sɛ yebenya Nyankopɔn n’enyimpa ndɛ na daakye a, ɔsɛ dɛ da biara yɛma ɔtsena hɛn adwen mu dɛ, Nyankopɔn hu dza yɛreyɛ biara. Sɛ nyimpa nnhu dza yɛreyɛ wɔ sum adze mpo a, Jehovah hu biribiara a yɛyɛ.​—Heb. 4:13.

8. Ebɛnadze na ɔsɛ dɛ yɛpow?

⁸ Ɔsɛ dɛ yɛpow adwen a wiadze no wɔ wɔ bɔn ho no. Ɔsomafo John kyerɛɛw dɛ: “Sɛ yɛkã dɛ yennyi bɔn a, yɛdaadaa hɛnho.” (1 John 1:8) John n’aber do no, nna awaafo kã dɛ obi botum ayɛ ndzɛmba a Nyankopɔn akã dɛ ɔyɛ bɔn no na ɔaakɔ do ara ayɛ Nyankopɔn ne nyɛnko. Ndɛ, nyimpa a yɛnye hɔn tse no wɔ adwen a ɔtse dɛm. Nyimpa pii kã dɛ wɔgye Nyankopɔn dzi, naaso dza Jehovah kã dɛ ɔyɛ bɔn no, wɔnngye nnto mu. Wɔnngye dza Jehovah kã fa ɔbarimba na ɔbaa ntamu nda ho no nnto mu koraa. Ndzeyɛɛ bi a ɔfa ɔbarimba na ɔbaa ntamu nda ho a Jehovah bu no dɛ ɔyɛ bɔn no, dɛm nkorɔfo yi kã dɛ, sɛ obi pɛ dɛ ɔyɛ ndzeyɛɛ a ɔtse dɛm a, ɔnnyɛ bɔn, ɔyɛ nankasa ne gyinaesi.

9. Sɛ mbabun yɛ dza Bible no kã dɛ ɔtsen no a, ebɛnadze ntsi na mfaso wɔ do?

⁹ Obotum ayɛ dzen papaapa ama Christianfo a wɔyɛ mbabun no dɛ, wobenya adwen a ɔtsen wɔ ɔbarimba na ɔbaa ntamu nda ho ber a hɔn a woetwa hɔnho ehyia wɔ edwuma mu anaa skuul mu no nngye dza Bible no kã fa ɔbarimba na ɔbaa ntamu nda ho nnto mu no. Dɛm na ɔtoo Aleksandar. Ɔkãa dɛ: “Mbaa bi a wɔwɔ mo skuul mu hyɛɛ me dɛ menye hɔn nda. Wɔkãa dɛ, sɛ minnyi mpona dze a, nna ɔnodze meyɛ ɔbarimba  a menye mbarimba da.” Ibotum ehyia tsebea a ɔtse dɛm. Naaso, sɛ eyɛ dza inyim dɛ Bible no kã dɛ ɔtsen no a, w’enyi bɛgye, ebɔbɔ wo nkwa, w’akoma nye ebusuabɔ a enye Jehovah wɔ no ho ban. Aber biara a ibedzi nsɔhwɛ do no, ɔbɛyɛ mberɛw ama wo dɛ ebɛyɛ dza ɔtsen. Kaa so dɛ, adwen a ɔnntsen a wiadze no wɔ wɔ ɔbarimba na ɔbaa ntamu nda ho no fi Satan. Ntsi, sɛ epow adwen a ɔtse dɛm a, ‘ibedzi ɔbɔn no do konyim.’​—1 John 2:14.

10. Ebɛn kwan do na 1 John 1:9 no boa hɛn ma yɛdze tsibowa pa som Jehovah?

¹⁰ Yɛgye to mu dɛ Jehovah na ɔwɔ ho kwan dɛ ɔkyerɛ dza ɔyɛ bɔn. Ntsi, yɛyɛ dza yebotum biara dɛ, yɛrennyɛ bɔn. Naaso, sɛ yɛyɛ bɔn a, ɔsɛ dɛ yɛkã ho asɛm wɔ mpaabɔ mu kyerɛ Jehovah. (Kenkan 1 John 1:9.) Sɛ yɛyɛ bɔn a no mu yɛ dur a, yɛhwehwɛ mboa fi asafo mu mpanyimfo a Jehovah apaw hɔn dɛ wɔnhwɛ hɛn do no hɔ. (Jas. 5:14-16) Naaso, onnyi dɛ yɛdwendwen bɔn a yɛyɛe mber a woetwa mu no ho ma ɔhyɛ hɛn do. Ebɛnadze ntsi a? Osiandɛ, hɛn Egya a ɔwɔ ɔdɔ no dze ne Ba no werdam afɔrbɔ no ama mbrɛ ɔbɛyɛ a, wobotum dze hɛn bɔn akyɛ hɛn. Sɛ Jehovah kã dɛ ɔdze ndzebɔnyɛfo a woenu hɔnho no hɔn mfom bɛkyɛ hɔn a, ɔdze bɛkyɛ hɔn ampa. Ntsi, biribiara nnyi hɔ a obotum esiw hɛn kwan dɛ yɛdze tsibowa pa bɔsom Jehovah.​—1 John 2:1, 2, 12; 3:19, 20.

11. Yebesi dɛn abɔ hɛn adwen ho ban efi nkyerɛkyerɛ a obotum asɛɛ hɛn gyedzi ho?

¹¹ Ɔsɛ dɛ yɛpow awaafo nkyerɛkyerɛ. Ofitsi ber a wɔhyehyɛɛ Christianfo asafo no, Abɔnsam nam ndaadaafo pii do abɔ mbɔdzen dɛ ɔbɛma Nyankopɔn n’asomfo anokwafo hɔn adwen mu ayɛ hɔn konsee. Dɛm ntsi, ɔwɔ dɛ yehu mbrɛ yebesi adwen ho ehu nsonsonee a ɔda nokwar na ator ntamu. * Bi a hɛn atamfo bɔbɔ mbɔdzen dɛ wɔbɛfa intanɛt anaa sohyial media do asɛɛ gyedzi a yɛwɔ wɔ Jehovah mu nye ɔdɔ a yɛwɔ ma hɛn nuanom no. Kaa nyia  ɔtaa atorsɛm a ɔtse dɛm ekyir, na pow atorsɛm a ɔtse dɛm!​— 1 John 4:1, 6; Nyi. 12:9.

12. Nokwar a yeesũa wɔ Bible mu no, ebɛnadze ntsi na ɔwɔ dɛ yɛhyɛ gyedzi a yɛwɔ wɔ mu no mu dzen?

¹² Mbrɛ ɔbɛyɛ a yɛbɔkõ etsia mbɔdzen a Satan robɔ dɛ ɔbɛsɛɛ hɛn gyedzi no, gyedzi a yɛwɔ wɔ Jesus mu nye dwuma a odzi wɔ Nyankopɔn ne tsirmpɔw mu no, ɔsɛ dɛ yɛhyɛ mu dzen. Afei so, hɔn a ndɛ Jehovah nam hɔn do kyerɛ n’ahyehyɛdze no kwan no, hɔn nkotsee na ɔsɛ dɛ yenya gyedzi wɔ hɔn mu. (Matt. 24:45-47) Sɛ yɛkenkan Nyankopɔn n’Asɛm daa a, yebotum ahyɛ hɛn gyedzi mu dzen. Hɛn gyedzi bɛyɛ tse dɛ dua a no ndwow ahɛn asaasetsirmu no. Paul kãa asɛm a ɔtse dɛm aber a ɔkyerɛɛw krataa kɛmaa Colossae asafo no. Ɔkãa dɛ: “Dɛ mbrɛ hom gyee Christ Jesus Ewuradze no, hom nnantsew no mu dɛmara: hom agye ndwow, na wɔdze hom esi no mu, na hom etsim wɔ gyedzi mu.” (Col. 2:6, 7) Christiannyi a ɔahyɛ nankasa ne gyedzi dzen no, biribiara nnyi hɔ a Satan anaa hɔn a wɔtaa n’ekyir no botum ayɛ dze esiw no kwan wɔ nokwar no mu a ɔbɛnantsew no.​—2 John 8, 9.

13. Ebɛnadze na ɔwɔ dɛ yɛhwɛ kwan, na ebɛnadze ntsi a?

¹³ Ɔsɛ dɛ yɛhwɛ kwan dɛ wiadze no bɛtan hɛn. (1 John 3:13) John ama yeehu dɛ “wiadze nyina da ɔbɔn no mu.” (1 John 5:19) Aber a wiadze yi rokɔ n’ewiei no, Satan afa ebufuw kɛsenara. (Nyi. 12:12) Ɔnam enyifir kwan ahorow do tow hyɛ hɛn do. Bi nye ndwamanyɛ a ɔdze to hɛn brada anaa atorsɛm a awaafo kekã. Iyi da nkyɛn a, ɔtow hyɛ hɛn do tsenn. Bi nye ɔsoɛrtsia a n’ano yɛ dzen a ɔdze ba hɛn do no. Satan nyim dɛ ɔwɔ ber tsiabaa bi a ɔdze besiw asɛnka edwuma a yɛreyɛ no kwan anaa ɔdze bɛsɛɛ hɛn gyedzi. Ntsi, ɔnnyɛ nwanwa dɛ aman ahorow bi do no, wɔdze nsa ato hɛn edwuma ne fã bi do. Aman ahorow bi so wɔ hɔ a, wɔabra hɛn dwumadzi koraa. Ɔno mpo no, hɛn nuanom mbarimba na mbaa a wɔwɔ aman yi do no gyina hɔn nan do pintsinn. Wɔreda no edzi dɛ ɔmmfa ho dza Satan dze bɛba hɛn do no, yebotum edzi konyim!

14. Ɔkwan kor a yebotum afa do aboa hɛn nuanom mbarimba na mbaa ma wɔaakɔ do atsena nokwar no mu nye dɛn?

¹⁴ Sɛ yebotum aboa hɛn nuanom mbarimba na mbaa ma wɔaakɔ do atsena nokwar no mu a, ɔsɛ dɛ yɛda ayamuhyehye edzi kyerɛ hɔn. (1 John 3:10, 11, 16-18) Ɔnnyɛ ber a ndzɛmba rokɔ yie nko na ɔwɔ dɛ yɛda ɔdɔ edzi kyerɛ hɛnho, mbom ber a nsɛndzendzen asoɛr so. Dɛ nhwɛdo no, ana inyim obi a ɔahwer no dɔfo wɔ owu mu ma ntsi ohia awerɛkyekyer anaa ohia mboa wɔ kwan fofor bi do? Anaa atse dɛ atoyerɛnkyɛm ama wo nuanom binom ahwer hɔn egyapadze pii ma wohia mboa ama woeetum esi hɔn Ahendzi Asa anaa hɔn adan? Nnyɛ nsɛm a yɛkã nko na yɛdze kyerɛ mbrɛ yesi dɔ hɛn nuanom mbarimba na mbaa fa, na mbom dza ɔkyɛn dɛm no, yɛdze hɛn ndzeyɛɛ na yɛdze kyerɛ.

15. Dɛ mbrɛ wɔakã wɔ 1 John 4:7, 8 no, ebɛnadze na ɔsɛ dɛ yɛyɛ?

¹⁵ Sɛ yɛda ɔdɔ edzi kyerɛ hɛnho a, nna yerusũasua hɛn sor Egya a ɔwɔ ɔdɔ no. (Kenkan 1 John 4:7, 8.) Ɔkwan tsitsir a yebotum afa do ada ɔdɔ edzi nye dɛ yɛdze hɛn nuanom hɔn bɔn bɛkyɛ hɔn. Dɛ nhwɛdo no, hɛn nua bi botum ayɛ adze ma aayɛ hɛn yaw, naaso bi a ekyir yi, ɔbɛpa hɛn kyɛw. Sɛ yɛdze no bɔn kyɛ no na yeyi dza ɔyɛe no fi hɛn adwen mu a, nna yɛreda ɔdɔ edzi. (Col. 3:13) Onua bi a wɔfrɛ no Aldo hyiaa nsɔhwɛ a ɔtse dɛm. Onua bi a Aldo bu no papaapa kãa asɛm bi tsiaa ebusua a ofi mu no. Asɛm no haaw Aldo papaapa. Ɔkãa dɛ, “Nna metaa bɔ mpaa serɛ Jehovah dɛ ɔmboa me amma meennya onua yi ho adwembɔn.” Naaso, Aldo yɛɛ biribi fofor. Ɔkãa kyerɛɛ onua  no dɛ ɔpɛ dɛ ɔnye no kɔ asɛnka. Aber a wɔbɔɔ mu kɔr asɛnka no, Aldo maa onua no hun mbrɛ asɛm a ɔkãe no sii haaw no fae. Aldo kãa dɛ, “Ber a onua no hun mbrɛ asɛm a ɔkãe no sii haaw me fae no, ɔpaa me kyɛw. Mbrɛ osii kasae no maa muhun mbrɛ oesi enu noho wɔ asɛm a ɔkãe no ho. Iyi ekyir no, yɛsanee bɛyɛɛ anyɛnkofo pa bio.”

16-17. Ebɛnadze na ɔsɛ dɛ yesi hɛn bo dɛ yɛbɛyɛ?

¹⁶ Nna ɔsomafo John dɔ no nuanom no papaapa ma ntsi, nna ɔpɛ dɛ wonya gyedzi kɛse. Iyi daa edzi kofee wɔ afotu a ɔdze maa hɔn wɔ ne nkrataa ebiasa a ofi sunsum mu a ɔkyerɛwee no mu. Hwɛ mbrɛ osi hyɛ nkuran dɛ yebohu dɛ, mbarimba na mbaa a wɔnye Christ bɔbɔ mu edzi hen no wɔ ɔdɔ na tsema tse dɛ John nankasa!​—1 John 2:27.

¹⁷ Ɔmbra dɛ hɛn nyina dze afotu a yɛakã ho asɛm no bɛyɛ edwuma. Hom mma yensi hɛn bo dɛ yɛbɛnantsew nokwar no mu, kyerɛ dɛ, yɛbɛyɛ setsie ama Jehovah wɔ hɛn asetsena nyinara mu. Sũa n’Asɛm no, na fa woho nyina to do. Nya gyedzi kɛse wɔ Jesus mu na hyɛ mu dzen. Pow nyimpa nyansapɛ na awaafo nkyerɛkyerɛ. Mma nnyɛ woho tse dɛ erosom Jehovah na ber kor no ara ennyɛ ndzeyɛbɔn. Afei so, mma nntsie hɔn a wɔdaadaa wo dɛ yɛ ndzeyɛbɔn no. Fa Jehovah n’abrabɔ gyinapɛn a ɔkrɔn no bɔ wo bra. Iyi da nkyɛn a, yɛmfa hɛn nuanom hɔn mfom nkyɛ hɔn, yɛmboa hɔn a wɔakɔ ahokyer mu no, na yɛmboa hɔn ma wɔnyɛ dzen wɔ gyedzi no mu. Dɛm no, ɔmmfa ho nsɛndzendzen a yehyia no, yɛbɔkɔ do anantsew nokwar no mu daa.