1. Ebɛnadze na ɔkyerɛ dɛ nna Kyerɛwnsɛm no da Jesus n’akoma do?

 TWA ho mfonyin hwɛ dɛ etsena Jesus ne nkyɛn na ɔrekyerɛkyerɛ. Ɔfa Kyerɛw Krɔnkrɔn no mu nsɛm ka no mpɛn pii aber mpo a ɔnnhwɛ nwoma biara mu! Nokwasɛm nye dɛ, asɛm a odzi kan a Jesus kae aber a wɔbɔɔ no esu, nye dza ɔkae ansaana orubowu a wɔayɛ ho kyerɛwtohɔ no nyina, ɔfaa no wɔ Kyerɛwnsɛm no mu. b (Deut. 8:3; Ndw. 31:5; Luke 4:4; 23:46) Afei so, mfe ebiasa na fa a Jesus dze yɛɛ no som edwuma no, mpɛn pii no, nna ɔfa Kyerɛwnsɛm no mu nsɛm ka, ɔkenkan na ɔkyerɛkyerɛ mu wɔ bagua mu.​—Matt. 5:17, 18, 21, 22, 27, 28; Luke 4:16-20.

2. Aber a Jesus rinyin no, ebɛnadze na ɔboaa no ma ohun Kyerɛwnsɛm no yie? (Hwɛ mfonyin a ɔwɔ Ɔweɔn-Aban yi enyim no.)

² Ansaana Jesus rebɛhyɛ no som edwuma ase no, nna ɔtaa kenkan na otsie Nyankopɔn n’Asɛm no. Ɔda edzi dɛ, da biara sɛ nna hɔn ebusua no robɔ nkɔmbɔ wɔ fie a, nna Joseph na Mary ka Kyerɛwnsɛm no mu asɛm. c (Deut. 6:6, 7) Yebotum aka dɛ, nna Jesus nye n’ebusua kɔ nhyiamudan mu Ahomgyeda biara. (Luke 4:16) Ɔda edzi dɛ, sɛ wɔwɔ hɔ na wɔrekenkan Kyerɛwnsɛm no a, nna Jesus tsie no yie. Ber bi ekyir no, Jesus nankasa suaa mbrɛ obesi akenkan Kyerɛw Krɔnkrɔn no. Ne dɛm ntsi, Jesus bohun Kyerɛwnsɛm no yie. Naaso nnyɛ ɔno nko, n’enyi bɛgyee ho paa, na ɔdze no mu nsɛm no so bɔɔ ne bra. Dɛ nhwɛdo no, ana ekaa asɛm a osii wɔ asɔrfi hɔ aber a nna Jesus edzi mfe 12 pɛ no? Akyerɛkyerɛfo a nna wonyim Moses Mbra no yie a nna wɔwɔ asɔrfi hɔ no mpo, Jesus “ne ntseasee nye ne mbuae yɛɛ hɔn nwanwa.”​—Luke 2:46, 47, 52.

3. Ebɛnadze na yebosusu ho wɔ adzesua yi mu?

 ³ Hɛn so, sɛ yɛkenkan Kyerɛwnsɛm no da biara a, yebohu mu yie na hɛn enyi so bɛgye ho. Naaso yebesi dɛn enya dza yɛkenkan no do mfaso kɛse? Nsɛm a Jesus kaa kyerɛɛ hɔn a nna wonyim Mbra no, tse dɛ akyerɛwfo, Phariseefo, nye Sadduceefo no, yebotum esua biribi efi mu. Ɔwɔ mu dɛ nna dɛm nkorɔfo yi taa kenkan Kyerɛwnsɛm no dze, naaso awerɛhosɛm nye dɛ nna wonnya mfaso biara mmfi dza wɔkenkan no mu. Jesus twee adwen sii ndzɛmba ebiasa bi a nkyɛ ɔwɔ dɛ wɔyɛ no do ama woeenya dza wɔkenkan no do mfaso kɛse. Nsɛm a Jesus kaa kyerɛɛ hɔn no botum aboa hɛn ma yeetu mpon wɔ akwan ebiasa yi do. Ɔno nye dɛ (1) yɛbɛtse dza yɛkenkan fi Nyankopɔn n’Asɛm mu no ase, (2) yebohu Bible mu nokwasɛm a ɔsom bo, na (3) yɛdze no mu nsɛm no abɔ hɛn bra.

4. Ebɛnadze na Luke 10:25-29 ma yehu fa Nyankopɔn n’Asɛm a yɛbɛkenkan no ho?

⁴ Sɛ yɛkenkan Nyankopɔn n’Asɛm no a, yɛpɛ dɛ yɛtse ase. Naaso sɛ yɛkenkan na yɛanntse ase a, yerinnya mfaso ahen biara mmfi mu. Dɛ nhwɛdo no, ma yɛnhwɛ nkɔmbɔ bi a ɔkɔr do wɔ Jesus nye ɔbarimba bi a nna onyim mbra no yie no ntamu. (Kenkan Luke 10:25-29.) Aber a ɔbarimba no bisaa Jesus dza ɔsɛ dɛ ɔyɛ ama oeenya onnyiewiei nkwa no, Jesus twee n’adwen sii Nyankopɔn n’Asɛm no do, na obisaa no dɛ: “Ebɛnadze na wɔakyerɛw no mbra no mu? Ekenkan [no] dɛn?” Ɔbarimba no buaa asɛm no yie paa. Ɔfaa Kyerɛwnsɛm no mu asɛm bi a ɔno nye dɛ yɛndɔ Nyankopɔn na hɛn nyɛnko nyimpa no dze yii asɛmbisa no ano. (Lev. 19:18; Deut. 6:5) Naaso hyɛ asɛm a ɔsanee bisae no nsew. Obisaa dɛ: “Me nyɛnko nye woana?” Ɔbarimba no maa ɔdaa edzi dɛ, saana dza ɔkenkan no ara mpo ɔnntse ase papa. Dɛm ntsi, nna onnhu mbrɛ obesi dze dza kyerɛwnsɛm no ka no ayɛ edwuma yie.

5. Ebɛn kwan do na sɛ yɛbɔ mpaa na yɛtɔ hɛn bo ara kenkan Bible no a ɔbɔboa hɛn ma yaatse dza yɛkenkan no ase yie?

⁵ Sɛ yɛma hɛn akenkan tu mpon a, ɔbɔboa hɛn ma yaatse Nyankopɔn n’Asɛm no ase yie. Ndzɛmba a odzidzi do yi botum aboa wo. Ɔyɛ a, dzi kan bɔ mpaa ansaana akenkan Bible no. Jehovah na obotum aboa hɛn ma yaatse Kyerɛwnsɛm no ase. Dɛm ntsi serɛ no dɛ ɔmfa no sunsum krɔnkrɔn no mboa wo ma fa w’adwen si dza erekenkan no do. Afei, tɔ bo ara kenkan. Iyi bɔboa wo ma aatse dza erekenkan no ase. Ɔyɛ a kenkan ma ompue w’ano anaa ibotum edzi Bible akenkan a wɔbɔ tsie no ekyir aber a erekenkan Bible no. Sɛ eyɛ dɛm a, ɔbɔboa wo ma aatse Nyankopɔn n’Asɛm no ase, akaa na esua pii efi mu. (Josh. 1:8) Sɛ eyɛ wo Bible akenkan no wiei a, san bɔ mpaa na da Jehovah ase dɛ ɔdze n’Asɛm no ama wo. Afei so, serɛ no dɛ ɔmboa wo ma fa dza akenkan no bɔ wo bra.

6. Ebɛn kwan do na sɛ ibisa woho nsɛm na ekyerɛw nsɛm ntsiantsia bi to hɔ a ɔbɔboa wo aber a erekenkan Bible no? (Hwɛ mfonyin no so.)

⁶ Ndzɛmba ebien a odzidzi do yi so botum aboa wo ma aatse Bible no ase yie aber a erekenkan no. Sɛ erekenkan Bible no a, bisa woho nsɛm ahorow bi. Sɛ erekenkan kyerɛwtohɔ pɔtsee bi a, ɔyɛ a bisa woho dɛ: ‘Woananom paa na kyerɛwsɛm yi ka hɔnho asɛm? Woana na ɔkaa dɛm asɛm yi? Ɔkaa kyerɛɛ woana, na ebɛnadze ntsi na ɔkaa dɛm? Ebɛn aber na asɛm yi sii na osii wɔ hen?’ Nsɛmbisa a ɔtsetse dɛm no bɔboa wo ma adwendwen nsɛntsitsir a ɔwɔ  dza erekenkan no mu no ho na edzi ekyir. Adze fofor so a ibotum ayɛ nye dɛ ebɛkyerɛw nsɛm ntsiantsia bi ato hɔ. Sɛ ekyerɛw nsɛm a ɔtsetse dɛm to hɔ a, ɔbɔboa wo ma aadwendwen dza erekenkan no ho akɔ ekyir na atse ase yie. Afei so dɛm a ebɛyɛ no bɔboa wo ma aakaa dza ekenkan no. Nsɛmbisa bi a ewɔ, nhwehwɛmu a ayɛ, nsɛntsitsir a ɔwɔ mu, mbrɛ ibesi dze dza erekenkan no ayɛ edwuma, nye mbrɛ etse nka wɔ asɛm no ho no, ibotum akyerɛw ne nyina ato hɔ. Ibohu dɛ sɛ ekyerɛw nsɛm a ɔtsetse dɛm to hɔ a, ɔbɔboa wo ma eehu dɛ Bible no mu nsɛm no fa woara woho.

7. Sɛ yɛrekenkan Bible a, ebɛn su na yehia, na ebɛnadze ntsi a? (Matthew 24:15)

⁷ Sɛ yebotum akenkan Bible no atse ase a, Jesus kaa su tsitsir bi a ɔsɛ dɛ yenya. Ɔno nye nhumu. (Kenkan Matthew 24:15.) Sɛ wɔka nhumu a, ɔkyerɛ dɛn? Sɛ obi tum dze asɛm bi toto fofor ho na ohu mbrɛ osi hyia nye mbrɛ ɔnye asɛm fofor bɔ ebira, na otum hu esuadze a wɔannka ho asɛm pɔtsee no a, ɔkyerɛ dɛ ɔwɔ nhumu. Jesus sanee kyerɛɛ dɛ, yehia nhumu ama yeetum ehu ndzɛmba ahorow bi a ɔkyerɛ dɛ Bible nkɔnhyɛ bi rinya ne mbamu. Afei so, asɛm biara a yɛbɛkenkan no wɔ Bible mu no, sɛ yebotum atse ase a, yehia nhumu.

8. Sɛ yɛrekenkan adze a, yebesi dɛn ada nhumu edzi?

⁸ Jehovah ma n’asomfo nhumu. Dɛm ntsi, bɔ no mpaa na serɛ no dɛ ɔmboa wo ma nya nhumu. (Mbɛ. 2:6) Ibesi dɛn ayɛ wo mpaabɔ no ho edwuma? Sɛ erekenkan adze a, dwendwen ho yie, na hwɛ mbrɛ dza erekenkan no nye biribi a inyim no dada no hyia. Dza obotum aboa wo ma aayɛ dɛm no, yɛ nhwehwɛmu wɔ hɛn nwoma ahorow a yɛdze sua Bible no mu. Dɛ nhwɛdo no, ibotum dze Buukuu A Jehovah Adasefo Dze Yɛ Nhwehwɛmu no ayɛ dɛm. Hɛn nwoma ahorow yi botum aboa wo ma aatse Bible mu nsɛm bi ase yie, na ehu akwan a ibotum afa do dze ayɛ edwuma wɔ w’asetsena mu. (Heb. 5:14) Sɛ eda nhumu edzi aber a erekenkan Kyerɛwnsɛm no a, ɔbɛma atse ase yie.

9. Ebɛn Kyerɛwnsɛm mu nokwasɛm tsitsir na Sadduceefo no buu hɔn enyi guu do?

⁹ Nna Sadduceefo no nyim nwoma enum a odzi kan wɔ Hebrew Kyerɛwnsɛm no mu no yie paa. Naaso wobuu hɔn enyi guu nokwasɛm etsitsir a Nyankopɔn maa wɔkyerɛwee wɔ dɛm nwoma ahorow yi mu no do. Dɛ nhwɛdo no, ɔwodze hwɛ asɛm a Jesus kaa kyerɛɛ Sadduceefo no aber a wobebisaa no owusoɛr ho asɛm no. Obisaa hɔn dɛ: “Ana hom nnkenkaan no wɔ Moses nwoma no mu, mbrɛ Nyankopɔn kasaa kyerɛɛ no wɔ haban no mu dɛ, Emi nye Abraham Nyankopɔn, Isaac Nyankopɔn, Jacob Nyankopɔn?” (Mark 12:18, 26) Ɔwɔ mu dɛ nna Sadduceefo no akenkan dɛm kyerɛwsɛm yi mpɛn pii dze, naaso asɛm a Jesus bisaa hɔn no maa ɔdaa edzi dɛ nna woebu hɔn enyi egu Kyerɛwnsɛm mu asɛntsitsir bi do. Ɔno nye owusoɛr ho nkyerɛkyerɛ no.​—Mark 12:27; Luke 20:38. d

10. Sɛ yɛrekenkan Bible no a, ebɛnadze na ɔsɛ dɛ yɛdze hɛn adwen si do?

¹⁰ Ebɛnadze na yebotum esua efi mu? Sɛ yɛrekenkan Bible mu asɛm bi a, ɔsɛ dɛ yɛdze hɛn adwen si dza yebotum esua efi mu no do. Yɛmmpɛ dɛ ɔba no dɛ Bible mu mfitsiase nkyerɛkyerɛ nkotsee na yebohu. Mbom ɔsɛ dɛ yɛbɔ mbɔdzen dɛ yebohu nokwasɛm ahorow bi a ɔsom bo a ɔwɔ Bible mu, nye afotusɛm bi a wɔannka ho asɛm pɔtsee no.

11. Ebɛn kwan do na 2 Timothy 3:16, 17 no botum aboa wo ma eehu Bible mu nokwasɛm a ɔsom bo?

¹¹ Sɛ erekenkan Bible no a, ibesi dɛn ehu nokwasɛm ahorow bi a ɔsom bo? Susu asɛm a 2 Timothy 3:16, 17 ka no ho hwɛ. (Kenkan.) Hyɛ no nsew dɛ ɔkaa dɛ ‘Kyerɛwsɛm biara ye’ ma (1) nkyerɛkyerɛ, (2) nkaenyim, (3) ndzɛmba atsentsen, nye (4) ntsea. Bible mu nwoma ahorow bi a enntaa nnkenkan no mpo, ibotum enya mfaso anan a yɛaka ho asɛm yi efi mu. Susu dza erekenkan no ho, na hwɛ dɛ ibohu dza ɔrekyerɛkyerɛ wo ma eehu afa Jehovah, n’apɛdze anaa n’afotusɛm bi ho. Yensusu kwan a Bible no ye ma nkaenyim no so ho nhwɛ. Sɛ erekenkan Bible no a, ɔyɛ a hyɛ mbrɛ kyerɛwnsɛm no roboa wo ma eehu nsusui bɔn anaa suban bɔn bi no nsew. Iyi bɔboa wo ma eetum ako etsia, na akɔ do edzi Jehovah nokwar. Afei, hwɛ kwan a ibotum afa do dze dza erekenkan no atsen adwen bi a ɔnntsen. Obotum mpo ayɛ nkyerɛkyerɛ bi a ɔnye Bible no nnhyia a ihyiae wɔ asɛnka mu. Afei so, ntsea biara a Jehovah nam kyerɛwnsɛm no do dze rema wo mbrɛ ɔbɛyɛ a ibenya adwen a ɔwɔ wɔ ndzɛmba ho no bi no, fa w’adwen si do. Sɛ ema dɛm ndzɛmba anan yi tsena w’adwen mu a, ɔbɔboa wo ma eehu Bible mu nokwasɛm a ɔsom bo, na ɔbɛma enya wo Bible akenkan do mfaso kɛse.

12. Ebɛnadze ntsi na Jesus bisaa Phariseefo no dɛ ‘Ana hom nnkenkanee?’

¹² Jesus bisaa Phariseefo no so dɛ, ‘Ana hom nnkenkanee?’ Obisaa hɔn dɛm asɛm yi dze kyerɛɛ dɛ, nna wɔwɔ Kyerɛwnsɛm no ho adwen a ɔmmfata. (Matt. 12:1-7) e Dɛm aber no, nna Phariseefo no reka dɛ Jesus n’esuafo no ebu Ahomgyeda mbra no do. Jesus rema hɔn mbuae no, ɔkaa nhwɛdo ebien bi a ɔwɔ Kyerɛwnsɛm mu ho asɛm, na ɔfaa asɛm bi a ɔwɔ Hosea nwoma no mu kae dze kyerɛɛ dɛ Phariseefo no nnyim siantsir a Ahomgyeda mbra no wɔ hɔ. Afei so, nna wonnhu nkorɔfo mbɔbɔr. Nna ebɛnadze ntsi na dɛm nkorɔfo yi mmfa dza wɔkenkan wɔ Nyankopɔn n’Asɛm mu no mmbɔ hɔn bra? Siantsir nye dɛ, nna wɔmema hɔnho do, na wɔkenkan Kyerɛwnsɛm no dze hwehwɛ afofor hɔnho mfomdo. Hɔn suban bɔn no ntsi, sɛ wɔkenkan Bible no mpo a, nna wɔnntse ase.​—Matt. 23:23; John 5:39, 40.

13. Sɛ yɛrekenkan Bible no a, ebɛn suban na ɔsɛ dɛ yɛda no edzi, na ebɛnadze ntsi a?

¹³ Asɛm a Jesus kae no ma yehu dɛ ɔsɛ dɛ yɛdze adwen pa kenkan Bible no. Ɔnnsɛ dɛ yesuasua Phariseefo no, mbom ɔsɛ dɛ yɛbrɛ hɛnho adze na yɛma kwan ma Jehovah kyerɛkyerɛ hɛn. Ɔsɛ dɛ yɛdze ‘ɔdwe gye asɛm a woedua wɔ hɛn mu no.’ (Jas. 1:21) Sɛ yɛdwe a, yɛbɛma kwan ma Nyankopɔn n’Asɛm no aboa hɛn ma yaasesa hɛn suban. Sɛ yebotum dze dza Bible no kyerɛkyerɛ fa ehumbɔbɔr, ayamuhyehye nye ɔdɔ ho no ayɛ edwuma a, ɔsɛ dɛ yɛbrɛ hɛnho adze. Afei so, ɔnnsɛ dɛ yɛkenkan dze hwehwɛ afofor ho mfomdo.

14. Yebesi dɛn ehu dɛ yɛdze Bible no mu nsɛm robɔ hɛn bra? (Hwɛ mfonyin ahorow no so.)

¹⁴ Mbrɛ yɛnye afofor dzi no botum akyerɛ dɛ yɛdze dza yɛkenkan wɔ Nyankopɔn n’Asɛm mu  no bɔ hɛn bra anaa yɛmmfa mmbɔ hɛn bra. Phariseefo no ammfa Nyankopɔn n’Asɛm no ammbɔ hɔn bra, dɛm ntsi ‘wobuu hɔn a nna wonndzi fɔ no fɔ.’ (Matt. 12:7) Dɛmara na hɛn so, adwen a yɛwɔ wɔ afofor ho nye mbrɛ yɛnye hɔn dzi no botum akyerɛ dɛ yɛdze dza yɛkenkan wɔ Nyankopɔn n’Asɛm mu no bɔ hɛn bra anaa yɛmmfa mmbɔ hɛn bra. Dɛ nhwɛdo no, yebotum ebisa hɛnho dɛ, ana yɛtaa kamfo afofor wɔ mbɔdzen a wɔbɔ no ho anaa hɔn mfomdo nkotsee na yehu? Ana yaayɛ krado dɛ yɛdze afofor hɔn mfomdo bɛkyɛ hɔn na yeehu hɔn mbɔbɔr anaa yɛkasa tsia hɔn na yɛtwe nsɛm mu tann? Nsɛmbisa a ɔtsetse dɛm no bɔboa hɛn ma yeetum ehu dɛ, dza yɛkenkan no roboa hɛn ma yaasesa hɛn nsusui, mbrɛ yesi tse nka nye hɛn ndzeyɛɛ anaa ɔnntse dɛm.​—1 Tim. 4:12, 15; Heb. 4:12.

15. Nna Jesus tse nka dɛn wɔ Kyerɛw Krɔnkrɔn no ho?

¹⁵ Nna Kyerɛw Krɔnkrɔn no da Jesus n’akoma do paa. Nkɔnhyɛ a ɔwɔ Ndwom 40:8 no kaa dɛ Jesus n’enyi bɛgye Kyerɛwnsɛm no ho. Hɔ ka dɛ: “Me Nyankopɔn, mepɛ dɛ meyɛ wo pɛ, nyew, wo mbra wɔ m’akoma mu.” Osiandɛ nna Kyerɛwnsɛm no da Jesus n’akoma do ntsi, ɔdze enyigye kɔr do soom Jehovah. Hɛn so sɛ yebotum akɔ do dze enyigye asom Jehovah a, ɔsɛ dɛ yɛkenkan Bible no na yɛma ɔda hɛn akoma do.​—Ndw. 1:1-3.

16. Ebɛn ndzɛmba na ibotum ayɛ ama eenya wo Bible akenkan do mfaso kɛse? (Hwɛ adakaba a wɔato dzin “ Nsɛm Bi A Jesus Kae No Botum Aboa Wo Ma Aatse Dza Ekenkan No Ase.”)

¹⁶ Ɔsɛ dɛ yɛma nsɛm a Jesus kae nye dza ɔyɛe no boa hɛn ma hɛn so yetu mpon wɔ hɛn Bible akenkan mu. Sɛ yebotum akenkan Bible no atse ase yie a, ɔsɛ dɛ yɛbɔ mpaa, yɛto hɛn bo ara kenkan, yebisa hɛnho nsɛm ahorow bi na yɛkyerɛw nsɛm ntsiantsia bi to hɔ. Sɛ yɛtɔ hɛn bo ara kenkan Bible no, na yɛdze hɛn nwoma ahorow no yɛ dza yɛakenkan no ho nhwehwɛmu a, ɔkyerɛ dɛ yɛreda nhumu edzi. Sɛ yɛhwehwɛ Bible mu nokwasɛm a ɔsom bo no a, ɔbɛma yɛatse Kyerɛwnsɛm no ase yie. Yebotum ayɛ dɛm wɔ kyerɛwnsɛm a yɛnntaa nnkenkan mpo mu. Afei so, sɛ yebotum dze dza yɛkenkan no abɔ hɛn bra a, ɔsɛ dɛ yɛbrɛ hɛnho adze na ɔnnsɛ dɛ yɛkenkan dze hwehwɛ afofor hɔnho mfomdo. Sɛ yɛdze dza yeesusu ho yi yɛ edwuma a, ɔbɛma yeenya hɛn Bible akenkan do mfaso kɛse na yɛbɔtwe abɛn Jehovah yie.​—Ndw. 119:17, 18; Jas. 4:8.