YOMARA nye no nuanom mbanyin Marcelo na Hiver wɔ Guatemala ekuraase bi. Yomara na Jehovah Adasefo hyɛɛ ase nye no suaa Bible no. Ekyir yi na no nuanom beenu no so bɛkaa no ho wɔ Bible adzesua no mu. Naaso, nna ndzɛmba mu nnyɛ bɛtɛɛ mma hɔn. Nna hɔn baasa nyina yɛ enyifurafo, na hɔn so a wonnyim braille kenkan. Ntsi, dza nna onua a ɔnye hɔn sua Bible no yɛ nye dɛ, nna ɔkenkan nkyekyɛmu ahorow no nye no mu kyerɛwnsɛm no kyerɛ hɔn.

Nna ofi beebi a wɔtse no kɔ Ahendzi Asa a ɔbɛn hɔn no yɛ minitsi 40, ntsi nna enuanom baasa a wonnhu adze yi nkotsee runntum nntwa kwan nnkɔ hɔ. Iyi ntsi nna ɔyɛ dzen ma hɔn dɛ wɔbɔkɔ asafo nhyiamu. Naaso enuanom a wɔwɔ asafo no mu no yɛɛ nhyehyɛɛ ma wotumii kɔr asafo nhyiamu ahorow nyina bi. Afei, aber a wɔhyɛɛ ase dɛ wɔreyɛ dwumadzi wɔ dapɛn finimfin nhyiamu ase no, nna enuanom no boa hɔn ma wɔkyer dza wɔbɛka no gu hɔn tsir mu.

Wɔhyɛɛ ase yɛɛ asafo nhyiamu wɔ Yomara na no nuanom no hɔn ekuraase hɔ wɔ May 2019. Dɛm aber no, nna awarfo bi a wɔyɛ akwampaafo aba ekuraase hɔ. Nna awarfo yi nnyim mbrɛ wosi kenkan braille mpo na akantam woehu n’akyerɛw. Naaso wɔdze sii hɔn enyi do dɛ wɔbɛkyerɛ enuanom baasa no ma woeehu braille akenkan na akyerɛw. Ntsi, wɔkɔr nwomakorabea bi kosuaa braille ho adze, mbrɛ ɔbɛyɛ a wobotum akyerɛ afofor ma hɔn so woeehu mbrɛ wobesi akenkan na wɔakyerɛw.

Abosoom kakraabi ekyir no, nna Yomara, Marcelo, na Hiver tum kenkan braille a wɔmmberɛ ho koraa. a Iyi boaa hɔn ma wɔnye Jehovah ntamu ebusuabɔ no so mu yɛɛ dzen paa. Seseiara hɔn baasa nyinara yɛ akwampaafo, na Marcelo rosom dɛ asafo mu somfo. Dapɛn mu no nyina, wɔyɛ dza wobotum biara wɔ Jehovah no som mu. Sɛ afofor hwɛ nsi na ahokeka a wɔdze rosom Jehovah no a, opusuw hɔn ma hɔn so wɔyɛ pii ma Jehovah.

Yomara na no nuanom no enyi sɔ mboa a enuanom a wɔwɔ asafo no mu dze ama hɔn no paa. Yomara kaa dɛ: “Ofitsi da a menye mo nuanom no hyiaa Jehovah Adasefo no, wɔakyerɛ dɛ wɔdɔ hɛn paa.” Marcelo so dze kaa ho dɛ: “Yɛwɔ anyɛnkofo a wɔpɛ hɛn asɛm pii wɔ hɛn asafo no mu. Na yenyim dɛ yɛka wiadze nyina enuayɛkuw bi a ɔdɔ na koryɛ wɔ hɔn ntamu no ho.” Yomara nye no nuanom no rohwɛ ber a wɔdze hɔn enyiwa bohu mbrɛ Jehovah bɛma asaase no adan Paradise no kwan dzendzenndzen.​—Ndw. 37:10, 11; Isa. 35:5.