1. Ɔbɛyɛ dɛ ebɛnadze ntsi na Jesus dze n’ekyirdzifo totoo nguan ho?

JESUS dze ebusuabɔ a ɔnye n’ekyirdzifo wɔ no totoo ebusuabɔ a no mu yɛ dzen a oguanhwɛfo nye no nguan wɔ no ho. (John 10:14) Dɛm ntotoho yi yɛ dza ɔfata. Nguan nyim hɔn hwɛfo na wotsie ne ndze. Ɔbarimba bi a ɔkɔr nserahwɛ wɔ beebi hun dɛ dɛm asɛm yi yɛ nokwar. Ɔbɔɔ amandzɛɛ dɛ: “Nna yɛpɛ dɛ yetwa nguan bi mfonyin wɔ beebi a yɛkɔree no. Ntsi, yɛyɛɛ biribi a ɔbɛma wɔabɛn hɛn. Naaso, wɔannkasa hɛnho osiandɛ nna wonnyim hɛn ndze. Annkyɛr na banyimba bi a ɔhwɛ hɔn do no baa hɔ. Obuee n’ano ara na wotui dzii n’ekyir.”

2-3. (a) Ebɛn kwan do na Jesus n’ekyirdzifo da no edzi dɛ wotsie ne ndze? (b) Ebɛnadze na yebosusu ho wɔ adzesua yi nye dza odzi hɔ no mu?

² Ɔbarimba yi ma yɛkaa asɛm a Jesus kãe faa no nguan ho, kyerɛ, n’ekyirdzifo. Ɔkãa dɛ: “Wobetsie me ndze.” (John 10:16) Naaso Jesus wɔ sor, ntsi yebesi dɛn etsie ne ndze? Ɔkwan tsitsir a yɛkyerɛ dɛ yetsie hɛn Wura ne ndze nye dɛ yɛdze ne nkyerɛkyerɛ bɔbɔ hɛn bra.​—Matt. 7:24, 25.

³ Yebosusu nsɛm a Jesus kãe wɔ ne nkyerɛkyerɛ mu no bi ho wɔ adzesua yi nye dza odzi hɔ no mu. Yebohu dɛ, Jesus kyerɛkyerɛɛ hɛn ndzɛmba bi a onnyi dɛ yɛyɛ nye ndzɛmba bi so a ɔwɔ dɛ yɛyɛ. Odzi kan, yɛbɔhwɛ ndzɛmba etsitsir ebien bi a oguanhwɛfo pa no kãa dɛ yengyaa yɛ.

4. Dɛ mbrɛ Luke 12:29 kyerɛ no, ebɛnadze na obotum ama hɛn ‘adwen ayɛ hɛn konsee’?

⁴ Kenkan Luke 12:29. Jesus hyɛɛ n’ekyirdzifo nkuran dɛ  “mma hom adwen nnyɛ hom konsee” wɔ honam afamu ehiadze ho. Yenyim dɛ Jesus n’afotu dze oye, na nyansa wɔ mu aber nyina. Dɛm ntsi, yɛpɛ dɛ yɛdze n’afotu bɔ hɛn bra. Naaso, ɔtɔ da a, obotum ayɛ dzen ama hɛn dɛ yɛbɛyɛ dɛm. Ebɛnadze ntsi a?

5. Ebɛnadze ntsi na nyimpa binom hɔn honam afamu ehiadze botum egya hɔn adwendwen?

 ⁵ Nyimpa binom wɔ hɔ a, edziban a wobedzi, atar a wɔbɛhyɛ nye beebi a wɔbɛda gyaa hɔn adwendwen. Bi a ɔman a wɔtse mu no, ne sikasɛm nnyɛ koraa. Ntsi, obotum ayɛ dzen ama hɔn dɛ wobenya sika dze ahwɛ hɔn mbusua. Bi so a, nyia ɔkɔ ba ma ebusua no nsa kɔ hɔn ano no efi mu, na iyi ama worihyia sikasɛm mu ahokyer. Obotum so aba dɛ COVID-19 yarba bɔn no ama hɔn edwuma efi hɔn nsa ma ntsi wonnya sika. (Ɔsɛnk. 9:11) Sɛ yehyia tsebea a ɔtse dɛm anaa nsɛndzendzen afofor a, yebesi dɛn dze Jesus n’afotu a ɔnye dɛ yengyaa adwendwen no ayɛ edwuma?

6. Kã dza mber bi ɔtoo ɔsomafo Peter no ho asɛm.

⁶ Ber bi, nna ɔsomafo Peter nye asomafo nkaa no dze hɛmba nam po do ma ehum rutu. Aber a wɔtse hɛn no mu no, wohun dɛ Jesus nam nsu no do. Peter kãa dɛ: “Ewuradze, sɛ woara a, hyɛ me ma membra wo nkyɛn wɔ nsu no do.” Ɔno ekyir no, Jesus see no dɛ “bra.” Peter fii hɛmba no mu na “ɔnantseew dɛ ɔrokɔ Jesus nkyɛn.” Hyɛ asɛm osii wɔ ɔno ekyir no nsew. Aber a Peter hun “mframa no, osuroi; na ɔhyɛɛ ase dɛ ɔrodɔ no, ɔkaa mu dɛ, Ewuradze gye me”! Jesus tseen ne nsa suoo no mu. Ɔsɛ dɛ yɛkaa dɛ, aber a Peter kɔr do dze n’enyi tsiim Jesus do no, otumii nantseew po a nna no do ayɛ begyabegya no do. Naaso aber a ohun mframa  no, osuroi na n’adwen mu yɛɛ no konsee. Iyi maa ɔhyɛɛ ase dɛ ɔrodɔ.​—Matt. 14:24-31.

7. Ebɛnadze na yebotum esũa efi dza ɔtoo Peter no mu?

⁷ Yebotum esũa biribi efi dza ɔtoo Peter no mu. Aber a Peter fii hɛn no mu sii nsu no do no, wɔammba ne tsirmu dɛ asorɛkye no bɔtwetwe n’adwen ma ɔaadɔ. Nna ɔpɛ dɛ ɔnantsew nsu no do kesi dɛ obodu no Wura no nkyɛn. Naaso odur beebi no, asorɛkye no twetwee n’adwen ma oyii n’adwen fii Jesus do. Nna Peter hia gyedzi dze anantsew po no do. Dɛmara na hɛn so yehia gyedzi dze egyina nsɛndzendzen a yehyia no ano. Sɛ yɛannkɔ do ammfa hɛn adwen ennsi Jehovah nye n’anohoba ahorow no do a, hɛn gyedzi botum ayɛ mberɛw. Ntsi sɛ ɔba no dɛ yehyia nsɛndzendzen a ɔtse dɛ ehum mpo a, ɔsɛ dɛ yɛkɔ do dze hɛn adwen si Jehovah do na yɛgye to mu dɛ obotum agye hɛn. Yebesi dɛn ayɛ dɛm?

8. Ebɛnadze na obotum aboa hɛn amma hɛn honam afamu ehiadze ho adwendwen aannhyɛ hɛn do?

⁸ Sɛ yenya Jehovah mu ahotodo, na yɛamma hɛn haw ho dadwen annhyɛ hɛn do a, ɔbɔboa hɛnara. Hom mma ɔntsena hɛn adwen mu dɛ, hɛn Egya Jehovah a ɔwɔ ɔdɔ no abɔ hɛn anohoba dɛ, sɛ yɛdze no som dzi kan wɔ hɛn asetsena mu a, ɔdze hɛn honam afamu ehiadze bɛma hɛn. (Matt. 6:32, 33) Yɛwɔ adanse a ɔkyerɛ dɛ odzi n’anohoba yi do aber nyinara. (Deut. 8:4, 15, 16; Ndw. 37:25) Sɛ Jehovah ma nnoma na nhyiren dza wohia a, nna ɔno ɔnnsɛ dɛ yɛma dza yebedzi anaa dza yɛbɛhyɛ ho adwendwen hyɛ hɛn do! (Matt. 6:26-30; Phil. 4:6, 7) Osiandɛ awofo dɔ hɔn mba ntsi wɔdze hɔn honam afamu ehiadze ma hɔn. Dɛmara na hɛn sor Egya no so dɔ hɛn ntsi, ɔdze hɛn honam afamu ehiadze ma hɛn. Nokwasɛm nye dɛ, yɛgye dzi dɛ Jehovah bɔhwɛ hɛn!

9. Ebɛnadze na yebotum esũa efi awarfo yi hɔn asɛm no mu?

⁹ Hom mma yɛnhwɛ asɛm bi a osii a ɔma yehu dɛ Jehovah botum ama hɛn nsa aka dza yehia. Awarfo bi a wɔyɛ ber nyina som edwuma no dze hɔn kaar dadaw bi twaa kwan bɔbor dɔnhwer kor kɔr etukɔfo asoɛe dɛ wɔrekɛfa nkyerɛbaa bi akɔ Christianfo nhyiamu bi. Banyin no kãa dɛ: “Aber a yɛpoon nhyiamu no, yɛtoo nsa frɛɛ nkyerɛbaa no dɛ wɔmbra fie ma yendzidzi. Naaso ekyir yi yehun dɛ saana yennyi hwee wɔ fie.” Ehwɛ a, ebɛnadze na awarfo yi bɛyɛ? Onua no toaa do dɛ: “Aber a yekodur fie no, yehun dɛ baag akɛse ebien a edziban wɔ mu si hɛn abow no ano. Nna yennyim obi a ɔdze besii hɔ. Jehovah na ɔmaa hɛn nsa kaa dza yehia no.” Mber bi ekyir no, awarfo yi hɔn kaar no sɛɛ. Nna ɔno na wɔdze kɔ asɛnka. Naaso, nna wonnyi sika a wɔdze bɛyɛ no yie. Wɔdze kaar no kɔr beebi a wɔyɛ kaar yie dɛ wɔrokɔhwɛ dɛ sɛ wosiesie a kaw ahen na wɔbɔbɔ. Ɔbarimba bi bae bebisaa hɔn dɛ: “Woana ne kaar nye yi?” Onua no kãa dɛ kaar no yɛ nedze naaso fault wɔ ho. Ɔbarimba no buaa dɛ: “Mma nnhaw woho. Dɛm kaar yi pɛpɛɛpɛr na me yer hia, na ɔpɛ no kɔla no so. Ahen na ebɛpɛ dɛ etɔn no?” Ɔbarimba no tɔɔ kaar no. Sika a otuae maa onua no, nna no mu yɛ dur araa ma obotum dze atɔ kaar fofor. Onua no kãa dɛ: “Dɛm da no, hɛn enyi gyee mbordo. Yehun dɛ ɔnnyɛ asɛm na ɔnye asɛm hyiae kɛkɛ. Jehovah na ɔboaa hɛn.”

10. Ebɛn asɛm na Ndwom 37:5 kã a ɔma yehu dɛ, ɔnnsɛ dɛ yɛma honam famu ehiadze ho dadwen hyɛ hɛn do?

¹⁰ Sɛ yetsie oguanhwɛfo pa no na yegyaa dɛ yɛbɛma honam afamu ndzɛmba ho dadwen ahyɛ hɛn do a, yebotum enya awerɛhyɛmu dɛ Jehovah dze hɛn ehiadze bɛma hɛn. (Kenkan Ndwom 37:5; 1 Pet. 5:7) Susu nsɛndzendzen  a yɛakã ho asɛm wɔ  nkyekyɛmu 5 no ho hwɛ. Obotum aba dɛ, Jehovah afa ebusua tsir bi anaa edwumawura bi do ama hɛn nsa aka hɛn daa daa ehiadze. Sɛ tsebea bi ntsi, ebusua tsir no runntum nnkɔ do nnhwɛ hɛn anaa hɛn edwuma fi hɛn nsa a, Jehovah bɔhwɛ hɛn wɔ kwan bi do. Yɛgye dzi dɛ ɔbɔhwɛ hɛn. Afei, hom mma yɛnhwɛ adze fofor bi a oguanhwɛfo pa no se mma yɛnnyɛ.

11. Dɛ mbrɛ Matthew 7:1, 2 kyerɛ no, ebɛnadze na Jesus kã kyerɛ hɛn dɛ mma yɛnnyɛ, na ebɛnadze ntsi na iyi ne yɛ botum ayɛ dzen?

¹¹ Kenkan Matthew 7:1, 2. Nna Jesus nyim dɛ ɔyɛ n’etsiefo a wonndzi mũ no hɔn su dɛ wobu afofor atsɛn. Dɛm ntsi ɔkãa kyerɛɛ hɔn dɛ: “Mma hom mmbu atsɛn.” Bi a yɛbɔbɔ mbɔdzen dɛ yerummbu hɛn nuanom atsɛn. Naaso hɛn nyinara yenndzi mũ, ntsi ɔtɔ da a yebu hɔn atsɛn. Sɛ ɔba no dɛm a ebɛnadze na ɔwɔ dɛ yɛyɛ? Tsie Jesus, na bɔ mbɔdzen dɛ irummbu afofor atsɛn.

12-13. Sɛ yesusu mbrɛ Jehovah nye Ɔhen David dzii no ho a, ebɛn kwan do na ɔbɔboa hɛn amma yeemmbu afofor atsɛn?

¹² Sɛ yɛdwendwen nhwɛdo a Jehovah ayɛ no ho a ɔbɔboa hɛn paa. Ɔdze n’adwen si su pa a afofor wɔ no do. Mbrɛ ɔnye Ɔhen David dzii no ma yehu iyi. David dzii mfomdo ahorow a no mu yɛ dur. Dɛ nhwɛdo no, ɔnye Bath-sheba sɛɛ awar, na ɔno ekyir no ɔhyɛe ma wokum no kun no mpo. (2 Sam. 11:2-4, 14, 15, 24) Dza David yɛe no annhaw nankotsee, mbom ɔhaw n’ebusua nye ne yernom nkaa no so. (2 Sam. 12:10, 11) Ber bi so, David ammfa noho nyina annto Jehovah do. Ɔdze nankasa ne pɛ kaan Israel nsordaafo no. Nna Jehovah nnhyɛɛ no dɛ ɔnnyɛ biribi a ɔtse dɛm. Obotum aba dɛ ahomemado nye gyedzi a nna ɔwɔ wɔ no nsordaafo dodow no mu ntsi na ɔyɛɛ dɛm. Ebɛnadze na ofii dza ɔyɛe no mu bae? Ɔyardɔm bi kunkum Israelfo bɛyɛ 70,000!​—2 Sam. 24:2-4, 10-15.

¹³ Sɛ nna ewɔ Israel dɛm aber no a, nkyɛ ebɛn adwen na ibenya wɔ David ho? Nkyɛ ibobu no atsɛn dɛ ɔmmfata dɛ Jehovah hu no mbɔbɔr anaa? Naaso Jehovah ennhu no dɛm. Ɔdze n’adwen sii David no nokwardzi, nye mbrɛ onuu noho nokwar mu no do. Iyi ntsi, Jehovah dze bɔn ahorow a no mu yɛ dur a David yɛe no kyɛɛ no. Nna Jehovah nyim dɛ David dɔ no paa, na ɔwɔ ɔpɛ dɛ ɔbɛyɛ dza ɔtsen. Aso ɔnnka w’akoma dɛ Nyankopɔn dze n’adwen si su pa a yɛwɔ no do?​—1 Ahe. 9:4; 1 Mber. 29:10, 17.

14. Ebɛnadze na ɔbɔboa Christianfo amma woeemmbu afofor atsɛn?

¹⁴ Jehovah nnhwɛ kwan dɛ yɛbɛyɛ nyimpa a yedzi mũ. Dɛmara na ɔnnsɛ dɛ yɛhwɛ kwan dɛ afofor bɛyɛ hɔn a wodzi mũ, mbom no ɔsɛ dɛ yɛdze hɛn adwen si su pa a wɔwɔ no do. Mpɛn pii no, ɔnnyɛ dzen koraa dɛ yɛdze hɛn adwen besi afofor hɔn sintɔ do na yeebu hɔn atsɛn wɔ ho. Naaso sɛ yesũasua Jehovah a, yebobu hɛn enyi egu hɔn sintɔ do na yaakɔ do nye hɔn atsena asomdwee mu. Dɛnkyɛmbo a wɔnnyɛɛ ho edwuma no, no ho nnyɛ fɛw. Naaso obi a onyim n’adze ban no nyim dɛ sɛ wɔyɛ ho edwuma a ɔbɛyɛ fɛw, na ɔbɛyɛ dza ɔsom bo. Ɔwɔ dɛ yesũasua Jehovah na Jesus na yɛdze hɛn adwen si su pa a afofor wɔ no do.

15. Sɛ yesusu tsebea a afofor refa mu wɔ asetsena mu no ho a, ebɛn kwan do na ɔbɔboa hɛn amma yeemmbu hɔn atsɛn?

¹⁵ Sɛ afofor hɔn su pa a yɛdze hɛn adwen besi do no da nkyɛn a, ebɛnadze bio na ɔbɔboa hɛn amma yeemmbu hɔn atsɛn? Fa w’adwen bu tsebea a wɔrefa mu wɔ asetsena mu no. Ma yensusu dɛm nhwɛdo yi ho. Da  kor bi a nna Jesus wɔ asɔrfi hɔ no, ohun kunafo hianyi bi a ɔdze mpɛsewamba ebien bi boguu ntoboa adaka no mu. Jesus emmbisa dɛ: “Ebɛnadze ntsi na kunafo no ammfa pii emmbogu mu?” Jesus ammfa n’adwen ennsi sika dodow a kunafo no yii no do, mbom ɔdze n’adwen sii adwen a kunafo dze yii ntoboa no nye dza nna ɔrefa mu wɔ asetsena mu no do. Afei ɔkamfoo no wɔ dza ofii n’akoma nyinara mu yɛe no ho.​—Luke 21:1-4.

16. Ebɛnadze na ibotum esũa efi Veronica n’asɛm no mu?

¹⁶ Hɛn akyerɛbaa bi a wɔfrɛ no Veronica n’asɛm no ma yehu siantsir a no ho hia dɛ yesusu tsebea a afofor refa mu wɔ hɔn asetsena mu no ho. Nna ɔnye ɔbaatankor bi na ne babanyin na wɔwɔ asafo kor mu. Veronica kãa dɛ: “Emidze, nna muhu hɔn dɛ wɔnntaa mmba asafo nhyiamu nye asɛnka. Iyi ntsi, nna minnyi hɔnho adwen pa. Naaso, da kor bi menye maame no kɔr asɛnka. Ɔkãa ɔhaw a ɔrefa mu wɔ asetsena mu no kyerɛɛ me. Nna ne babanyin no wɔ adwen mu yarba bi, na nankotsee na ɔhwɛ no. Ber kor no ara so sɛ wɔbɔtwe abɛn Jehovah a, ogyina noara no do. Osian ne ba no ne yarba ntsi, nna ɔtɔ da a ɔkɔ asafo nhyiamu wɔ beebi fofor.” Veronica dze n’asɛm no reba ewiei no, ɔkãa dɛ: “Nna minnyim da dɛ ɔrefa ɔhaw a ɔtse dɛm mu. Seseiara dze, menya ɔdɔ a no mu yɛ dzen ama no, na mubu no paa wɔ mbɔdzen a ɔrobɔ wɔ Jehovah no som mu no ho.”

17. Ebɛnadze na James 2:8 kã kyerɛ hɛn dɛ yɛnyɛ? Na yebesi dɛn ayɛ dɛm?

 ¹⁷ Sɛ yehu dɛ yeebu hɛn nua bi atsɛn a, ebɛnadze na ɔwɔ dɛ yɛyɛ? Hom mma ɔntsena hɛn adwen mu dɛ ɔwɔ dɛ yɛdɔ hɛn nuanom. (Kenkan James 2:8.) Afei so, ɔwɔ dɛ yefi hɛn akoma mu bɔ mpaa serɛ Jehovah dɛ ɔmboa hɛn ma yengyaa dɛ yebobu afofor atsɛn. Ɔwɔ dɛ yɛyɛ hɛn mpaabɔ no ho edwuma, na yɛgye ber nye hɛn nua no a yeebu no atsɛn no bɔ nkɔmbɔ. Dɛm a yɛbɛyɛ no bɔboa hɛn ma yeehu no yie. Yebotum nye no akɔ asɛnka anaa yɛnye no ato nsa edzidzi. Sɛ yehu hɛn nua no yie a, ɔbɛma yɛdze hɛn adwen esi su pa a ɔwɔ no do. Sɛ yɛyɛ dɛm so a nna yerusũasua Jehovah na Jesus. Wɔ dɛm kwan no do no, nna yeritsie oguanhwɛfo pa no n’ahyɛdze a ɔnye dɛ mma yemmbu atsɛn no.

18. Yebesi dɛn akyerɛ dɛ yeritsie oguanhwɛfo pa no ne ndze?

¹⁸ Nguan tsie hɔn hwɛfo ne ndze, dɛmara na Jesus n’ekyirdzifo so tsie ne ndze. Sɛ yɛyer hɛnho dɛ yɛremma honam afamu ehiadze ho dadwen nnhyɛ hɛn do na yeemmbu afofor atsɛn a, Jehovah na Jesus behyira hɛn mbɔdzembɔ no do. Dɛ yɛka ‘nguankuw ketseaba’ no ho anaa yɛka ‘nguan fofor’ no ho no, ɔwɔ dɛ hɛn nyina yɛkɔ do tsie oguanhwɛfo pa no ne ndze na yɛyɛ setsie ma no. (Luke 12:32; John 10:11, 14, 16) Adzesua a odzi hɔ mu no, yɛbɔhwɛ ndzɛmba ebien bi a Jesus kãa kyerɛɛ n’ekyirdzifo dɛ wɔnyɛ.