SƐ WO nsa ka krataa a ɔhyɛ nkuran a wo nyɛnko pa bi akyerɛw abrɛ wo a, etse nka dɛn? Christiannyi suanyi Timothy nyaa krataa a ɔtse dɛm fii ɔsomafo Paul ne nkyɛn. Dɛm krataa no na ndɛ wɔfrɛ no 2 Timothy a ɔwɔ Bible mu no. Ekyingye biara nnyi ho dɛ nna Timothy dze ahoper bɔkɔ akɔhwehwɛ beebi a hɔ yɛ dzinn ahyɛ mbrɛ ɔbɛyɛ a obotum akenkan krataa a ne nyɛnko a ɔdɔ no akyerɛw abrɛ no no. Obotum aba dɛ, Timothy dwendween ho dɛ: ‘Paul noho tse dɛn? Ana ɔwɔ afotu bi ma me a obotum aboa me ma maayɛ edwuma a ɔhyɛ me nsa no yie? Ana krataa yi botum aboa me ma maayɛ asɛnka nye ɔkyerɛkyerɛ edwuma no yie na maaboa afofor?’ Dɛ mbrɛ yebohu no, Timothy nyaa nsɛmbisa yi nye afofor pii ho mbuae wɔ dɛm krataa a ɔsom bo yi mu. Naaso seseiara dze, hom mma yɛnhwɛ afotu pa a yebotum enya efi dɛm krataa yi mu.

Ber a Timothy hyɛɛ ase dɛ ɔrekenkan krataa no, nsɛm a Paul dze hyɛɛ ne krataa no ase no maa ohun no amonmu hɔ ara dɛ Paul dwen no ho. Paul fii ɔdɔ mu frɛɛ Timothy dɛ no “dɔba.” (2 Tim. 1:2) Timothy ne nsa kaa krataa yi wɔ bɛyɛ afe 65 H.B. Obotum aba dɛ dɛm aber no nna oedzi mfe 30 na no mboree. Afei so, nna ɔyɛ asafo mu panyin a noho akokwaa. Bio so, nna ɔnye Paul abɔ mu ayɛ edwuma bɔbor mfe du na oesũa pii efi no hɔ.

Obotum aba dɛ, aber a Timothy bohun dɛ Paul dze nokwardzi egyina ahohia pii ano no, ɔhyɛɛ no nkuran papaapa. Dɛm aber no, nna wɔdze nkɔnsɔnkɔnsɔn egu Paul ne nsa wɔ Rome a ɔrotweɔn dɛ woboku no. (2 Tim. 1:15, 16; 4:6-8) Nna Timothy botum ehu akokodur a Paul reda no edzi no, osiandɛ Paul kyerɛɛw dɛ: “Mosɔw yinom nyina.” (2 Tim. 2:8-13) Dɛ mbrɛ abotar a Paul dze tsimii no hyɛɛ Timothy dzen no, dɛmara na hɛn so obotum ahyɛ hɛn dzen.

Paul tuu Timothy fo dɛ ombu dwumadzi a ɔhyɛ ne nsa wɔ Nyankopɔn no som mu no dɛ ɔsom bo. Nna Paul pɛ dɛ Timothy ‘kũa Nyankopɔn akyɛdze’ a ɔwɔ no mu no. (2 Tim. 1:6) Paul dze Greek kasafua khaʹri·sma gyinaa hɔ maa “akyɛdze.” Dza dɛm Greek kasafua yi kyerɛ nye akyɛdze a yɛmmfata dɛ hɛn nsa bɛka naaso yeenya no kwa. Timothy nyaa dɛm akyɛdze yi ber a wɔdze dwumadzi soronko bi hyɛɛ ne nsa wɔ asafo no mu no.​—1 Tim. 4:14.

 Nna ebɛnadze na ɔsɛ dɛ Timothy dze dɛm akyɛdze yi yɛ? Aber a Timothy kenkaan Paul n’asɛm no na ohun kasafua “kũa” no, bi a n’adwen kesii fie gya bi a ɔreyɛ edum a ɔsɛ dɛ wokũa mu ma ɔsan sɔ no do. Nkasafua nkyerɛase nwoma bi kã dɛ, Greek nyɛe kasafua (a·na·zo·py·reʹo) a Paul dze dzii dwuma no kyerɛ dɛ “ibekenyan, ibonunu, anaa ibohuta gya mu.” Ɔkwan bi do no, dza ɔkyerɛ nye dɛ “edze enyigye nye nsi bɛyɛ edwuma bi.” Ntsi nna Paul rutu Timothy fo dɛ: ‘Fi w’akoma mu yɛ edwuma a wɔdze ahyɛ wo nsa no!’ Dɛmara na ndɛ ɔsɛ dɛ hɛn so yɛdze nsi yɛ edwuma a wɔdze ahyɛ hɛn nsa no.

Aber a Timothy gu do rekenkan krataa a onyae fii ne nyɛnko pa no hɔ no, ɔsanee hun asɛm bi a ɔbɔboa no ma oeetum ayɛ no som edwuma no yie. Paul kyerɛɛw dɛ: “Akoradze pa a wɔdze hyɛɛ wo nsa no dua sunsum krɔnkrɔn a ɔtse hɛn mu no do kora do.” (2 Tim. 1:14) Nna dɛm akoradze no yɛ ebɛnadze? Nna ebɛn akoradze pa na wɔdze ahyɛ Timothy ne nsa no? Wɔ nyiyimu 13 no mu no, Paul twee adwen sii “nsɛm pa” no, kyerɛ dɛ, nokwasɛm a ɔwɔ Kyerɛwnsɛm no mu no do. (2 Tim. 1:13) Dɛ ɔsomfo no, nna ɔsɛ dɛ Timothy kyerɛkyerɛ hɔn a wɔwɔ asafo no mu nye hɔn a wɔwɔ n’asaasesin no mu no nokwar no. (2 Tim. 4:1-5) Bio so, nna wɔapaw Timothy dɛ asafo mu panyin a ɔhwɛ Nyankopɔn no nguankuw no do. (1 Pet. 5:2) Akoradze a nna wɔdze ahyɛ Timothy ne nsa no, kyerɛ nokwar no a ɔbɛkyerɛkyerɛ afofor no, nna ɔsɛ dɛ ɔdze noho to Jehovah no sunsum krɔnkrɔn no nye n’Asɛm no do ama oeetum akora do.​— 2 Tim. 3:14-17.

Ndɛ, wɔdze nokwar a hɛn so yɛkyerɛkyerɛ afofor wɔ asɛnka mu no ahyɛ hɛn nsa. (Matt. 28:19, 20) Sɛ yebotum akɔ do akyerɛ dɛm akoradze a ɔsom bo yi ho enyisɔ a, ɔsɛ dɛ yɛkɔ do bɔ mpaa na yenya ɔpɛ dɛ yebosũa Nyankopɔn n’Asɛm no da biara. (Rom. 12:11, 12; 1 Tim. 4:13, 15, 16) Yebotum so asan enya ho kwan dɛ yɛbɔsom dɛ asafo mu mpanyimfo, anaa dɛ ber nyina asomfo. Ɔsɛ dɛ akoradze a ɔsom bo dɛm a ɔhyɛ hɛn nsa no ma yɛbrɛ hɛnho adze na yɛdze hɛnho to Nyankopɔn do hwehwɛ no mboa. Sɛ yebu akoradze a ɔhyɛ hɛn nsa no dɛ ɔsom bo na yɛserɛ Jehovah dɛ ɔmboa hɛn ma yɛnhwɛ do yie a, yebotum akora do anaa yaabɔ ho ban.

Nna edwuma a ɔhyɛ Timothy ne nsa no ne fã bi hwehwɛ dɛ ɔtsetse afofor ama hɔn so woeetum ayɛ edwuma no bi. Dɛm ntsi na Paul tuu Timothy fo dɛ: “Dza etsee no m’anomu . . . no, fa hyɛ nyimpa anokwafo a wobotum akyerɛkyerɛ binom so nsa.” (2 Tim. 2:2) Nokwasɛm nye dɛ, nna ɔsɛ dɛ Timothy sũa biribi fi no nuanom Christianfo mbarimba no hɔ, na ɔdze dza onyim no kyerɛkyerɛ hɔn. Ndɛ so, no ho hia dɛ ɔhwɛfo biara a ɔwɔ Christianfo asafo no mu no bɔ mbɔdzen dɛ ɔbɛyɛ dɛmara. Ɔhwɛfo pa mmfa nyimdzee a ɔwɔ wɔ edwuma bi ho nnsie no nuanom, mbom no ɔdze kyerɛkyerɛ hɔn ma hɔn so wotum dzi dwuma a ɔtse dɛmara. Onnsuro dɛ sɛ ɔdze nyimdzee a ɔwɔ no kyerɛ hɔn a, wobohu pii asen no anaa wɔbɛyɛ edwuma no yie akyɛn no. Ntsi sɛ ɔhwɛfo no rekyerɛ mbrɛ wosi yɛ edwuma bi a, ɔnnkyerɛ no enyido-enyido. Ɔpɛ dɛ ɔboa hɔn a ɔretsetse hɔn no ma wonya atsɛmpa nye nhumu ma wɔaabɛyɛ Christianfo a hɔnho akokwaa. Wɔ dɛm kwan no do no, “nyimpa anokwafo” a ɔakyerɛkyerɛ hɔn no botum mpo ayɛ pii dze aboa asafo no.

Ekyingye biara nnyi ho dɛ, Timothy n’enyi sɔɔ krataa a ɔhyɛ nkuran a onyae fii Paul hɔ no. Yebotum dze hɛn adwen ebu mpɛn dodow a ɔkenkaan afotu a mfaso wɔ do no, na ɔdwendween mbrɛ obesi dze ayɛ edwuma yie wɔ no dwumadzi mu no ho.

Hɛn so yɛpɛ dɛ yɛdze dɛm afotu yi yɛ edwuma. Ebɛn kwan do? Yebotum abɔ mbɔdzen ekũa hɛn akyɛdze no mu dɛ gya, yaakora dza wɔdze ahyɛ hɛn nsa no do, na yɛdze hɛn suahu nye hɛn nyimdzee aakyerɛkyerɛ afofor. Wɔ dɛm kwan no do no, dɛ mbrɛ Paul kãa kyerɛɛ Timothy no, yebotum ‘ewie hɛn som no koraa.’​—2 Tim. 4:5.