1. Ebɛn asɛm na David kãe faa Jehovah n’ahobrɛadze ho?

ANA yebotum akã dɛ Jehovah brɛ noho adze? Nyew, yebotum. Mber bi mu, David kãa dɛ: “Edze wo nkwagye kyɛm no so ama me: na w’ahobrɛadze ama mayɛ kɛse.” (2 Sam. 22:36; Ndw. 18:35) Ber a David kyerɛɛw dɛm asɛm yi no, obotum aba dɛ nna ɔrekaakaa ber a Samuel kɔr ɔno David n’egya ne fie dze ngo kɛseraa nyia nna daakye ɔbɛyɛ Israelhen no. David nye no nuanom mbanyin no, nna wɔyɛ baawɔtwe. Nna ɔno na osuar koraa wɔ mu. Naaso, nna ɔno nye nyia Jehovah eyi no dɛ ɔbɛhyɛ Ɔhen Saul n’anan.​—1 Sam. 16:1, 10-13.

2. Ebɛnadze na yerubosusu ho wɔ adzesua yi mu?

² David nye ɔdwontofo a ɔkãa dɛm asɛm yi faa Jehovah ho no bɛyɛ adwen. Ɔdwontofo no kãa dɛ: ‘Ɔno a ɔbrɛ noho adze hwɛ ndzɛmba a ɔwɔ sor na ase, ɔma ɔbɔbɔnyi do fi huntuma mu, na ɔma ohianyi do ama ɔdze no aatsena etsitsir nkyɛn.’ (Ndw. 113:6-8) Adzesua yi mu no, yebedzi kan ahwɛ tsebea ahorow bi a Jehovah daa ahobrɛadze edzi wɔ mu nye esuadze etsitsir bi a ɔfa ahobrɛadze ho. Ɔno ekyir no, yebosũa ahobrɛadze ho adze pii efi Ɔhen Saul, nkɔnhyɛnyi Daniel na Jesus hɔn nhwɛdo no mu.

3. Ebɛn kwan do na Jehovah nye hɛn dzi, na ebɛnadze na iyi da no edzi?

³ Mbrɛ Jehovah nye nyimpa a yɛtɔ sin dzi no da no edzi dɛ ɔwɔ ahobrɛadze. Nnyɛ hɛn som nko na ɔgye to mu, mbom obu hɛn dɛ yɛyɛ n’anyɛnkofo so. (Ndw. 25:14) Jehovah dze ne Ba no bɔɔ afɔr maa hɛn bɔn mbrɛ ɔbɛyɛ a yebotum nye no enya anyɛnkofa. Ampaara, Jehovah wɔ ehumbɔbɔr na ayamuhyehye ma hɛn.

4. Ebɛn ho kwan na Jehovah dze ama hɛn, na ebɛnadze ntsi a?

⁴ Ma yɛnhwɛ ɔkwan fofor a Jehovah afa do ada no edzi dɛ ɔwɔ  ahobrɛadze. Jehovah nye Ɔbɔadze no, nkyɛ obotum abɔ hɛn wɔ ɔkwan bi do a ɔremma hɛnankasa yerunntum mmpaw dza yebotum ayɛ wɔ hɛn asetsena mu. Naaso, ɔannyɛ dɛm. Ɔbɔɔ hɛn wɔ no suban do, na ɔdze ho kwan no ama hɛn dɛ yemfi hɛn pɛ mu nyɛ adze. Sɛ yɛdze hɛnho toto Jehovah ho a, yehu dɛ yɛyɛ mberɛw na yesuar koraa, naaso gyinae ahorow a yesisi no ho hia Jehovah. Ɔpɛ dɛ yesi gyinae dɛ yebefi hɛn akoma mu asom no, osiandɛ yɛdɔ no na yenyim mfaso a ɔwɔ do dɛ yɛbɛyɛ setsie ama no. (Deut. 10:12; Isa. 48:17, 18) Yɛda Jehovah ase papaapa dɛ ɔda ahobrɛadze a ɔtse dɛm edzi!

5. Ebɛn kwan do na Jehovah kyerɛkyerɛ hɛn dɛ yɛmbrɛ hɛnho adze? (Hwɛ mfonyin a ɔwɔ Ɔweɔn-Aban yi enyim no.)

⁵ Jehovah kyerɛkyerɛ hɛn dɛ yɛmbrɛ hɛnho adze. Ɔnam ɔkwan a ɔfa do nye hɛn dzi no do na ɔyɛ dɛm. Jehovah na ɔyɛ Onyansafo a ɔkyɛn biara wɔ amansan yi mu. Ɔno mpo no, ɔwɔ ɔpɛ dɛ ɔbɛgye afofor hɔn adwenkyerɛ ato mu. Dɛ nhwɛdo no, Jehovah maa ne Ba no boaa no aber a nna ɔrobɔ adze nyina no. (Mbɛ. 8:27-30; Col. 1:15, 16) Ɔwɔ mu dɛ Jehovah nye adze nyina do tumfo no dze, naaso ɔdze asodzi hyehyɛ afofor hɔn nsa. Dɛ nhwɛdo no, ɔapaw Jesus dɛ ɔnyɛ Ahendzi no do Hen. Na nyimpa 144,000 a wɔnye Jesus bɔbɔ mu edzi hen no, ɔbɛma hɔn tum bi. (Luke 12:32) Nokwasɛm nye dɛ, Jehovah na ɔtsetsee Jesus dɛ Ɔhen nye Sɔfopanyin. (Heb. 5:8, 9) Afei so, ɔtsetse hɔn a wɔnye Jesus bɔbɔ mu edzi hen no. Naaso dwumadzi a Jehovah dze ma hɔn no, ɔnnhyɛ hɔn nnkyerɛ hɔn kwan pɔtsee a wɔmfa do nyɛ no. Mbom ɔgye hɔn dzi dɛ wɔbɛyɛ n’apɛdze.​—Nyi. 5:10.

6-7. Ɔdze fa tum na asodzi a yɛdze bɛhyehyɛ afofor hɔn nsa ho no, ebɛnadze na yebotum esũa efi hɛn sor Egya no hɔ?

⁶ Sɛ hɛn sor Egya a onnhia obiara no mboa mpo no dze tum hyehyɛ afofor nsa a, mpɛn  dodow ahen na ɔwɔ dɛ hɛn so yɛyɛ dɛm! Dɛ nhwɛdo no, ana eyɛ ebusua tsir anaa asafo mu panyin? Sũasua Jehovah no nhwɛdo no na fa dwumadzi hyehyɛ afofor hɔn nsa. Mma nnhyɛ hɔn nnkyerɛ hɔn mbrɛ wonsi nyɛ edwuma no. Sɛ isũasua Jehovah, na edze dwumadzi hyehyɛ afofor hɔn nsa a, nnyɛ edwuma no nko na wɔbɛyɛ, na mbom ebɛtsetse afofor na aaboa hɔn ma woeenya ahotodo kɛse wɔ hɔn mu so. (Isa. 41:10) Ebɛnadze bio na hɔn a tum hyɛ hɔn nsa no botum esũa efi Jehovah hɔ?

⁷ Bible no ma yehu dɛ Jehovah gye abɔfo a ɔnye hɔn wɔ sor no hɔn adwenkyerɛ to mu. (1 Ahe. 22:19-22) Awofo, hom besi dɛn esũasua Jehovah no nhwɛdo yi? Sɛ ɔbɛyɛ yie a, hom mbisa hom mba ma wɔnkyerɛ hɔn adwen wɔ mbrɛ hom besi edzi tsebea bi ho dwuma. Na sɛ hɔn adwenkyerɛ no botum ama hom eedzi tsebea no ho dwuma a, hom botum dze ayɛ edwuma.

8. Ebɛn kwan do na Jehovah nye Abraham nye Sarah dzii wɔ abotar mu?

⁸ Jehovah n’abotar ma yehu dɛ ɔwɔ ahobrɛadze. Dɛ nhwɛdo no, sɛ Jehovah n’asomfo fi obu mu kyerɛ hɔn adwen wɔ ne gyinaesi ahorow ho a, onya hɔnho abotar. Aber a Abraham kãa dɛ osusu dɛ ɔnnyɛ no kwan do dɛ Jehovah bɛsɛɛ Sodom na Gomorrah no, ɔyɛɛ aso tsiee no. (Gen. 18:22-33) Hom mma yɛnhwɛ mbrɛ Jehovah sii nye Abraham ne yer Sarah dzii. Jehovah bɔɔ anohoba dɛ Sarah benyinsen wɔ ne mberwabɔ mu. Asɛm yi yɛɛ Sarah serew, naaso Jehovah no bo emmfuw no. (Gen. 18:10-14) Mbom, ɔnye Sarah dzii no wɔ obu mu.

9. Ebɛnadze na awofo na asafo mu mpanyimfo botum esũa efi Jehovah no nhwɛdo no mu?

⁹ Awofo nye asafo mu mpanyimfo, ebɛnadze na hom botum esũa efi Jehovah no nhwɛdo no mu? Sɛ hom mba anaa hɔn a wɔwɔ asafo no mu annye hom annyɛ adwen wɔ hom gyinaesi ahorow bi ho a, hom yɛ hom adze dɛn? Ana eyɛ ntsɛm kã dɛ wo gyinaesi na oye? Anaa ebɔ mbɔdzen dɛ ebɛtse dza wɔrekã no ase? Sɛ hɔn a yɛhyɛ hɔn ase no sũasua Jehovah a, mbusua na asafo no benya do mfaso. Ɔdze besi ha yi, yɛahwɛ ahobrɛadze ho esuadze efi Jehovah no nhwɛdo no mu. Afei, hom mma yɛnhwɛ nyimpa binom a hɔnho nsɛm wɔ Bible no mu na yensũa ahobrɛadze mfi nhwɛdo a wɔyɛe no mu.

10. Ebɛn kwan do na Jehovah dze nhwɛdo a afofor ayɛ dze kyerɛkyerɛ hɛn?

¹⁰ Jehovah na ɔyɛ hɛn ‘Kyerɛkyerɛfo’ Kunyin no. Mbrɛ ɔbɛyɛ a ɔbɛkyerɛkyerɛ hɛn no, ɔama hɛn nhwɛdo pii wɔ n’Asɛm no mu. (Isa. 30:20, 21) Sɛ yɛdwendwen Bible mu nsɛm a ɔfa nyimpa a nna wɔwɔ su ahorow a ɔsɔ Nyankopɔn enyi ho a, yesũa biribi fi mu. Ahobrɛadze ka su ahorow yi ho. Afei so, hɔn a wɔannda su pa ahorow no edzi no, yesũa biribi fi dza ɔtoo hɔn no mu.​—Ndw. 37:37; 1 Cor. 10:11.

11. Ebɛnadze na yebotum esũa efi nhwɛdo bɔn a Saul yɛe no mu?

¹¹ Susu dza ɔtoo Ɔhen Saul no ho hwɛ. Ɔhyɛɛ ase dɛ aberantsɛ a ɔbrɛ noho adze. Nna onyim dza obotum ayɛ nye dza onnkotum ayɛ. Nna ɔmmpɛ mpo dɛ ɔbɛgye asodzi pii ato noho do. (1 Sam. 9:21; 10:20-22) Naaso, mber rokɔ do no, Saul bɛyɛɛ ahantan, na ɔyɛɛ ndzɛmba a nna onnyi ho kwan dɛ ɔyɛ. Aber a ɔbɛyɛɛ ɔhen no, annkyɛr koraa na ɔhyɛɛ ase dɛ ɔreyɛ dɛm. Da kor bi, nna ɔwɔ dɛ ɔtweɔn nkɔnhyɛnyi Samuel ma ɔba, naaso oennya abotar anntwɔen no. Dɛ nkyɛ Saul dze noho bɔto Jehovah do ma oeedzi ama no nkorɔfo no, ɔbɔɔ ɔhyew-afɔr a nna onnyi ho kwan mpo dɛ ɔbɔ. Dɛm ntsi, Saul hweer Jehovah n’enyimpa, na ewiei koraa no Jehovah poow no dɛ ɔhen. (1 Sam. 13:8-14) Hwɛ nyansa a ɔwɔ mu dɛ yebosũa biribi efi dɛm asɛm yi mu na yeekwetsir dɛ yɛbɛyɛ ndzɛmba a yennyi ho kwan dɛ yɛyɛ.

12. Ebɛn nhwɛdo pa na Daniel yɛe a yebotum esũasua?

 ¹² Dza ɔnye nhwɛdo bɔn a Saul yɛe no bɔ ebira no, hom mma yɛnhwɛ nhwɛdo pa a nkɔnhyɛnyi Daniel yɛe no. Daniel n’asetsena nyinara mu no, ɔkɔr do brɛɛ noho adze na ɔhwehwɛɛ akwankyerɛ fii Jehovah Nyankopɔn hɔ aber nyina. Dɛ nhwɛdo no, aber a Jehovah dze Daniel dzii dwuma ma ɔkyerɛɛ Nebuchadnezzar ne daa no ase no, ɔammfa enyimnyamhyɛ no amma nankasa noho. Mbom no, ofii ahobrɛadze mu dze ayɛyi na enyimnyamhyɛ no nyinara maa Jehovah. (Dan. 2:26-28) Ebɛnadze na yebotum esũa efi mu? Sɛ enuanom enyi gye mbrɛ yesi ma ɔkasa ho anaa hɛn asɛnka edwuma rutu mpon a, ɔsɛ dɛ yɛdze enyimnyam no nyinara ma Jehovah. Ɔsɛ dɛ yefi ahobrɛadze mu gye to mu dɛ Jehovah ammboa hɛn a, yennkotum ayɛ ndzɛmba a ɔtsetse dɛm. (Phil. 4:13) Sɛ yɛyɛ dɛm a, nna yerusũasua nhwɛdo pa a Jesus yɛe no. Ebɛn kwan do?

13. Sɛ yɛhwɛ asɛm a ɔwɔ John 5:19, 30 no a, ebɛnadze na yebotum esũa efi Jesus hɔ?

¹³ Ɔwɔ mu dɛ nna Jesus yɛ Nyankopɔn ne Ba a odzi mũ dze, naaso ɔkɔr do dze noho too Jehovah do. (Kenkan John 5:19, 30.) Jesus annyɛ n’adwen da dɛ ɔbɛgye tum a no sor Egya no wɔ no efi ne nsamu. Philippifo 2:6 kã kyerɛ hɛn dɛ Jesus ‘emmbu no ohwimadze dɛ ɔnye Nyankopɔn bɛsɛ.’ Nna Jesus yɛ Ɔba a ɔbrɛ noho adze, ohun dza obotum ayɛ nye dza onnkotum ayɛ, na ɔkyerɛɛ obu maa n’Egya no tumdzi.

14. Aber a wobisaa Jesus adze a nna onnyi tum dɛ ɔyɛ no, ɔyɛɛ n’adze dɛn?

¹⁴ Hom mma yensusu asɛm yi ho nhwɛ. Jesus n’esuafo James na John nye hɔn maame kɔr Jesus ne nkyɛn kɛserɛɛ ho kwan bi a nna onnyi tum dɛ ɔno na ɔdze ma. Jesus yɛɛ n’adze dɛn wɔ ho? Ntsɛmara na ɔkãa kyerɛɛ hɔn dɛ, n’abanyimfa nye n’abankum tsena wɔ n’Ahendzi mu dze, no sor Egya no nkotsee na obotum akyerɛ hɔn a wɔbɛtsena hɔ. (Matt. 20:20-23) Nna Jesus nyim beebi a no tum kodu. Afei so, nna onyim dza obotum ayɛ nye dza onnkotum ayɛ. Ɔannyɛ biribiara a Jehovah amma no tum dɛ ɔnyɛ. (John 12:49) Yebesi dɛn esũasua Jesus no nhwɛdo pa yi?

15-16. Yebesi dɛn dze afotu a ɔwɔ 1 Corinthfo 4:6 no ayɛ edwuma?

¹⁵ Sɛ yɛdze afotu a ɔwɔ 1 Corinthfo 4:6 no yɛ edwuma a, nna yerusũasua nhwɛdo pa a Jesus yɛe no. Hɔ kã dɛ: “Mma hom nntra dza wɔakyerɛw no.” Ntsi, sɛ yɛdze afotu rema afofor a, onnyi dɛ yɛhyɛ hɔn ma wɔgye hɛn nsusui to mu anaa yɛkã asɛm bi ber a yɛnndwen ho nnkɔ  ekyir. Ɔsɛ dɛ yɛtwe adwen si afotu a ɔwɔ Bible no nye hɛn nwoma nye dza ɔka ho mu no do. Sɛ yɛyɛ dɛm a, ɔkyerɛ dɛ yɛgye to mu dɛ nnyɛ biribiara na yenyim. Afei so, ɔkyerɛ dɛ yɛgye adze nyina do Tumfo no ne “ndzeyɛtsenenee” to mu.​—Nyi. 15:3, 4.

¹⁶ Jehovah a yɛbɛhyɛ no enyimnyam no da nkyɛn a, yɛwɔ siantsir afofor ntsi a ɔwɔ dɛ yɛda ahobrɛadze edzi. Sɛ yɛda ahobrɛadze edzi a, ebɛn kwan do na obotum ama hɛn enyi aagye na aaboa hɛn ma yɛnye afofor aatsena asomdwee mu? Hom mma yensusu iyi so ho.

17. Nyimpa a wɔbrɛ hɔnho adze no, wɔwɔ enyigye, ebɛnadze ntsi a?

¹⁷ Sɛ yɛbrɛ hɛnho adze a hɛn enyi botum agye. Ebɛnadze ntsi a? Osiandɛ, sɛ yɛgye to mu dɛ nnyɛ ndzɛmba nyina na yebotum ayɛ a, hɛn enyi bɔsɔ mboa biara a yebenya efi afofor nkyɛn no. Dɛ nhwɛdo no, ma yɛnhwɛ akwatafo du a Jesus saa hɔn yarba no. Hɔn mu kor pɛr na ɔsanee bae bɛdaa Jesus ase dɛ ɔasa ne yarba a ɔyɛ hũ no. Nna dɛm ɔbarimba a ɔbrɛ noho adze no nyim dɛ Jesus annsa no yarba a, nkyɛ orinnya ne yarba no n’ano edur. Ntsi ɔkyerɛɛ ho enyisɔ, na ɔhyɛɛ Nyankopɔn enyimnyam wɔ ayarsa a onyae no ho.​—Luke 17:11-19.

18. Sɛ yɛbrɛ hɛnho adze a, ebɛn kwan do na ɔboa hɛn ma yɛnye afofor tsena asomdwee mu? (Romefo 12:10)

¹⁸ Nyimpa a wɔbrɛ hɔnho adze no, wotum nye afofor tsena asomdwee mu, na wonya anyɛnkofo pii so. Ebɛnadze ntsi a? Osiandɛ, wofi hɔn akoma mu gye to mu dɛ afofor wɔ su pa, na wonya hɔn mu ahotodo so. Hɔn a wɔbrɛ hɔnho adze no, sɛ afofor bɔ hɔnho mbɔdzen wɔ dwumadzi biara mu a, hɔn enyi gye, wɔyɛ ntsɛm kamfo hɔn, na wodzi hɔn nyi so.​—Kenkan Romefo 12:10.

19. Siantsir a ɔwɔ dɛ yekwetsir dɛ yɛbɛyɛ ahantan no, bi nye dɛn?

¹⁹ Naaso, nyimpa a wɔyɛ ahantan dze, ɔyɛ  dzen ma hɔn dɛ wɔbɛkamfo afofor. Mbom, wɔpɛ dɛ afofor kamfo hɔn. Wɔdze hɔnho toto afofor ho, na wɔbɔ mbɔdzen dɛ wɔbɛkyɛn afofor. Dɛ nkyɛ wɔbɛtsetse afofor na wɔdze asodzi ahyehyɛ hɔn nsa no, wɔtaa kã dɛ, “Sɛ epɛ biribi yie a, ɔsɛ dɛ wankasa yɛ w’adze.” Biribi ne yieyɛ a wɔkã ho asɛm no yɛ adze a oye wɔ hɔnankasa hɔn enyi do. Obi a ɔyɛ ahantan no, mpɛn pii no ɔpɛ dɛ afofor tse nka dɛ noho hia sen hɔn. Na sɛ afofor bɔ mbɔdzen sen no a, ɔyɛ no yaw. (Gal. 5:26) Nyimpa a wɔtse dɛm no, ɔnnkyɛr na wɔnye afofor ntamu asɛɛ. Sɛ yehu dɛ yɛwɔ su a ɔtse dɛm a, ɔsɛ dɛ yɛbɔ Jehovah mpaa dzendzenndzen na ɔboa hɛn ma ‘yɛyɛ hɛn adwen fofor’ mbrɛ ɔbɛyɛ a dɛm suban bɔn yi nnkɛgye ndwow wɔ hɛn akoma mu.​—Rom. 12:2.

20. Ebɛnadze ntsi na ɔwɔ dɛ yɛbrɛ hɛnho adze?

²⁰ Yɛda Jehovah ase dɛ ɔayɛ nhwɛdo ama hɛn a yebotum esũasua! Mbrɛ osi nye n’asomfo dzi no ma yehu dɛ ɔwɔ ahobrɛadze, na yɛpɛ dɛ yesũasua no. Iyi da nkyɛn a, yɛpɛ dɛ yesũasua nyimpa a Bible no kãa hɔnho asɛm dɛ wɔdaa ahobrɛadze edzi na wɔnye Nyankopɔn nantsewee no. Ɔmbra dɛ yɛdze enyidzi na enyimnyamhyɛ a ɔfata Jehovah no bɛma no aber nyina. (Nyi. 4:11) Sɛ yɛyɛ iyinom nyina a, hɛn so yɛbɛfata dɛ yɛnye hɛn sor Egya no bɛnantsew, osiandɛ ɔdɔ nyimpa a wɔbrɛ hɔnho adze.